शान्तश्री रत्न बज्राचार्यया बज्रयान पुजाविधि संग्रह सफू दुवाला

महायान, बज्रयान बौद्धमार्गी जुया जीवन न्ह्याकाच्वंपिं बज्रयानया आपालं खँत सय्का अभ्यास तकं याय्माःगु अवस्था दुृ । गुलिखय्सिनं यानाच्वंगु दुसा गुलिखय्सिनं मयाना च्वंगु अवस्था नं दु । बज्रयान पुजाविधिया खँल्हाना वनेबलय् आपालं ज्याखँत साधना याना बलेमाःगु खनेदु । थुकिया नितिं तच्वगु हे लगनशील आवश्यक जुयाच्वंगु खनेदु । बज्रयान पुजाविधिया सफूत स्वयावने बलय् जीवन दर्शनया आपालं खँत सीका काय् फयाच्वंगु दु । तर सिमित मनूतसें जक सय्का च्वंगु नं खनेदु । नेवाः समाज दुने आपालं हे जजमानपिन्सं बज्रयान पुजाविधियात छ्यला थःगु सामाजिक संस्कारया ज्याखँत न्ह्याका हयाच्वंगु दु ।
थुकथं नेवाःतसें बज्राचार्यपिन्त गुरुजुया रुपय् नाला वय्कःपिंपाखें हे पुजाआजाया ज्या न्ह्याकेगु यानाच्वंगु दु । थुकथं बज्रयानीतय्गु पुजाआजाया आधार हे बज्रचार्यपिं जुयाच्वंगु दु । जजमानपिन्सं नं पुजाआजाय् छ्यलावयाच्वंगु आपालं स्तोत्र व विषयत ब्वना कण्ठ याना थु्रकिया व्याख्या याय् फयकेगु ज्या याय्माःगु खः । तर पुजाआजाया ज्या क्वचायेगुलिइ जक सिमित जुयाच्वंगु दु । नेवाःतय् दुृने गुलि नं बज्रयान पुजा विधिकथं थःगु सामाजिक संस्कार व संस्कृतिया ज्या याय्माःपिं जजमानपिं दु ।
वय्कपिं सकसिनं बुलुहुं बज्राचार्यपिन्सं याना बिज्याइगु पुजा आजाया मर्म, दर्शन पक्ष व मानव जीवया नितिं आवश्यक पक्षया खँत सय्का सीकावन धाःसा बज्रयान बुद्ध धर्म क्वातुक हे विकास जुइगु खनेदु । थौंया इलय् वज्रयान पुजाविधिया आपालं सफूत पिदने धुंकूगु दु । संस्कृत भाषं च्वयातःगु आपालं श्लोक, वाक्ययात नेपालीभाषां व नेपालभाषां नं अनुवाद याना सफूत पिदनाच्वंगु दु । थुकथं स्वयावने बलय् बज्रयान बुद्ध धर्मया मर्म सय्का सीका काय् फइगु स्थिति दय्धूंकूगु खनेदु ।
हालय् तिनि शान्त श्रीरत्न बज्राचार्यजुयागु बज्रयान पुजाविधि संग्रह नांया सफू पिदंगु दु । थुगु सफूतिइ पुजाया विधि न्ह्योथनातःगुलिं बज्रचार्यपिन्सं बज्रयानकथं गुकथं पुजा आजा याना वयाच्वंगु दु धकाः सीका काय्फइगु जूगु दु । थुगु सफू स्वअध्ययान याना नं पुजाआजा सय्के फइगु खनेदु । थुगु सफूया च्वमिया सामान्य परिचय बिया वनेबलय् शिक्षित व्यत्तित्वया धनी, सफल व्यवसायी, कु्ल परम्परायात महसुस याना चक्रसम्वर, अचल आदि दीक्षा कयाः त्रिसमाधि योग, अचल योग नं लाभ यानादीम्ह व्यत्तित्व जुयाच्वनादीगु दु । थुगु सफूया अध्ययनपाखें झीसं न्हियां न्हिथं न्ह्याका वयाच्वनागु पुजाया खँत सीके फइगु खनेदु । उगु सफूया पक्षय् बिचाः बिमर्श यानावने बलय् सफूतिइ थुकथं दयाच्वंगु दु ।
थुगु तसकं हे महत्व जाःगु सफूतिइ नेपाल परम्परागत बौद्ध धर्म संघया नायो प्रा.डा. नरेशमान बज्राचार्यजु, बज्राचार्य संरक्षण गुथिया नायो फणीन्द्र रत्न बज्राचार्यजु, राजुगुरुजु मञ्जु श्रीरत्न बज्राचार्यजुपिन्सं थःथःगु नुगः खँ च्वया तयादीगु दु । सफूया संग्रहकर्ता शान्त श्री रत्न बज्राचार्यजुया अबुजु राज गुरुजु पुष्परत्न बज्राचार्य व तारादेवी बज्राचार्यप्रति समर्पित याना थुगु सफू यशोधरा बज्राचार्य, समन्त श्रीरत्न बज्राचार्य, मणि श्रीरत्न बज्राचार्यजुपिन्सं पिथनेगु यानातःगु खः । अथेहे राजगुरुजु मञ्जू श्री रत्न बज्राचार्यजुया निर्देशनय् तयार यानातःगु थुगु सफू च्वमि शान्त श्रीरत्न बज्राचार्यजुं भूमिका च्वयादीगु दु । थुगु सफू मुनामिया मां तारादेवी बज्राचार्यया खुलाया पुण्यतिथिइ पिथनातःगु खः ।
छापा आखलं सफू छापे याय्गु चलन वसेंलि तक्षबहाःया पं. सिद्धि हर्ष बज्राचार्य, सिखंमूबहाःया वै. रत्नमानन्द बज्राचार्य, ओबहाःया पं पुथ्वीमानन्द बज्राचार्य, सवल बहाःया पं जोगमुनि बज्राचार्य, गंबहाःया पं. अमोघबज्र वज्राचार्यपिन्सं गुरुमण्डल पुजाविधि सफू पिकया विज्यागु खः । थु्कथं हे पुजा सफू पिथनेगु झ्वलय् पं. अमोघबज्र बज्राचार्यजुं पिण्डविधान व होमबिधान सफू पिथना बिज्यागु खः । त्रिसमाधि न्हापां पिकया बिज्याम्ह गंबहाःया पं.पदम श्रीबज्र बज्राचार्यजु खः ।
थुकथं बज्रयानया पुजा विधिया सपःू पिथिना वनेगु झ्ेववलयज् अनं लिपा सवलबहाःया पं. रत्नकाजी बज्राचार्य, पं बद्रि रत्न बज्राचार्य, झ्वःबहाःया प्रा. डा. नरेशमान बज्राचार्य, फणीन्द्र रत्न बज्राचार्य, विकास रत्न बज्राचार्य, सिखमू बहाःया अ.व.राजेन्द्रमान बज्रचार्य, प्रा. यज्ञमानपति बज्राचार्य, मखंबहाःया शि. सिद्धि विलास बज्राचार्य, सवल बहाःया सर्वज्ञरत्न बज्राचार्य, यलया पं.रत्नबहादुर बज्राचार्य पं. हिराकाजी बज्राचार्यपिन्सं गुरुमण्डल, त्रि समाधि, पिण्ड विधान, होम विधान थें जाःगु बज्रयान पुजा विधिया नितिं तसकं आवश्यक सफू थःथःगु माथं पिथना बिज्यागु खः । थ्वहे झ्वलय् आः वया शान्त श्री रत्न बज्राचार्यजुं नं थःगु सफू पिथना बिज्यागु दु ।
थुगु सफूया न्हापांगु खण्डय् पुजाविधियात प्राथमिकता बियातःगु दु । उकिइ सामान्य बौद्ध नित्य कर्म ( न्हिकं) शीर्षक व मामकि सहित कलशाचर्ण पुजाया शीर्षक दुने सूर्यार्ध, गुरुमण्डल, पुजा संकल्प, पञ्चगव्य शोधन, सिन्दुरार्चन, अञ्जन शोधन, त्रिसमाधि, कलश, धौपति, मत व मामकी पुजा, प्रतिमा देवता पुजा, चाक्रपुजा, किगः तिने, सगं धौ, क्वकाय्, मण्डः विसर्जन देवदेवतापिनिगु स्तोत्र दुथ्याकातःगु दु् । अथेहे गथांमुगःया छेँ बौ बियगु पुजा, मोहनीया आगमय् याय्गु पुजा, स्वन्ति नखःया लक्ष्मी पुजा, म्हपुजा व किजापुजा, धौ सगं काय्गु स्वन्तिवाचन, खेँ सगं काय्गु मंगलाचरण, यज्ञ विधान, जन्म दिनया नवग्रह पुजा, निसाल, सि¥हादान काय्गु वाक्य, मत संकल्प वाक्य, अद्य काय्माःगु पञ्चांगज्वलं तिथि मितिया पूर्ण विवरण दुथ्याकातःगु दु ।
उगु सफूया खण्ड २ स बज्रयान बुद्धधर्मयात प्राथमिकता बिया जीवन न्ह्याका वयाच्वंपिन्सं महत्वपूर्ण बौद्ध दिनय् ब्वना वयाच्वंगु थीथी बौद्ध स्तोत्र बियातःगु दु । थुकथं बौद्ध स्तोत्रया नां कया वनेबलय् स्तुतमपि, अद्धयपरमार्थ नामसंगीति, सिद्धिमुनि, अतसिकु, उतिमञ्जुश्री, ब्रम्हादिदेव, इन्द्रादिदेव, स्निग्धनील, पूर्व दिगंपति, अरुणवर्ण, कांपोतल, नजातो, मध्येगत, दानबलने, वन्देश्री, भद्रचरी, आर्यतारा नामाष्टोत्तरशत स्तोत्र, जय नमःश्री, बसुन्धरादेवी स्तोत्र, हारतीमाता स्तोत्र, अनुत्तरबोधि, दानगाथा, दुथ्याकातःगु दु । अथेहे महायान सुत्रया दुने अपरिमितायु नाम महायान सूत्र, दुर्गतिपरिशोधन कल्पैकोदेश व पज्ञापारमिता ह्रदय सूत्र दुथ्याकातःगु दु । अथेहे थुगु सफूतिइ धारणी व पञ्चरक्षा सूत्रत नं दुथ्याकातःगु दु ।
झी बौद्धतसें याना च्वनेमाःगु पुजा व ब्वना च्वनेमाःगु स्तोत्रयात कया पिथनातःगु थुगु सफू जूगुलिं थुगु सफू स्वया आपालं बौद्ध आचरण सिर्जना यानावने फइगु तकं खनेदु । नापं थः बौद्ध खः धकाः धायकेत बौद्ध आचरणया ज्याखँत तच्वतं आवश्यक जुया वयाच्वंगु दु । थुगु ज्या याय्त अध्ययनया नं भूमिका मानव जीवनय् दयाच्वनीगुलिं भाजु शान्त श्रीरत्न बज्राचार्यजु उकथंया वातावरण सिर्जना याना वनेत नं थःगु कुतः याःगु खनेदु । उकिं थुगु सफू मात्र सफूया रुपय् जक स्थापित जुयाच्वंगु मदु । थ्व छगू बौद्धतय्गु जीवनशैलीयात  क्वातुका यंकेत तकं तिवः विइगु कुतःया न्हायकं खः धकाः नं धाय् फइगु अवस्था नं दु ।
– सुगत रत्न सिन्दुराकार