नेपाल पराम्परागत बौद्ध धर्म संघपाखें कोषयात धेबा लःल्हात

यें / अखिल नेपाल भिक्षु महासंघ पाखें स्थापना जूगु स्वास्थ्य अक्षय कोषयात नेपाल पराम्परागत बौद्ध धर्म संघपाखें ग्वहालि कथं दां लःल्हायेगु ज्याझ्व: जूगु दु ।
गुणाकर महविहार छुस्याबहाः ज्याठाय् शनिवाः जूगु उगु ज्याझ्वलय् प्रा.डा. नरेशमान बज्राचार्यं भिक्षु कोडण्य महास्थवीरयात छगू लख चाचू तका लःल्हाना बिज्यागु खः ।
थुगु ज्याझ्वलय् प्रा.डा. नरेशमान बज्राचार्यजुं बज्रयान विधिकथं त्रिशरण गमन याका बिज्यागु खः।
ज्याझ्वलय् प्रा.डा. नरेशमान बज्राचार्य, अखिल नेपाल भिक्षु महासंघया मूछ्यान्जे भिक्षु कोडण्य महास्थवीर, नेपाल परम्परागत बौद्ध धर्म संघ केन्द्रया महासचिव दिनेश शाक्य, अच्यूत बज्राचार्यपिन्सं थःथःगु नुगः खँ तया बिज्यागु खः ।
ज्याझ्व: प्रा.डा. नरेशमान बज्राचार्यजुया सभापतित्वय् जूगु ख: ।ज्याझ्वलय् नेपाल परम्परागत बौद्ध धर्म संघया कान्तिपुर शाखाया राजगुरुजु मञ्जु श्रीरत्न बज्राचार्यजुं लसकुस न्वचु बियाबिज्यागु खः ।
ज्याझ्वलय् नेपाल परम्परागत बौद्ध धर्म संघ कान्तिपुर शाखाया पूर्व नाय: एवं नेपाल बज्रयान महाविहार संचालन समितिया न्वकु दिवंगत रेम रत्न बज्राचाार्यया गुणानुस्मृति ज्याझ्वः नं जूगु खः ।
ज्याझ्वलय् दिवंगत रेमरत्न बज्राचार्यया परिवारपाखें नेपाल बज्रयान महाविहारया श्रद्धेय संघपिन्त संघदान नं या:गु खः ।