रिता महर्जनया उपन्यास व चिबाखं सफू विमोचन

यें/ छ्म्ह च्वमिया नेपाल भाषाया निगू सफू छ्क्वलं विमोचन जूगु दु ।
च्वमि रिता महर्जनया उपन्यास हामा व चिबाखं सफू ऋतुया विमोचन वरिष्ठ साहित्यकार मथुरा सायमिया मूपाहांसुइ सातोआकि भवन कोपुंद्वलय् जूगु ख: ।
ज्याझ्वलय् विशेष पाहांकथं झायादीपिं लुम्बिनी बौद्ध विश्वविद्यालयया डीन प्रा. डा. माणिकरत्न शाक्य , प्राज्ञ साहित्यकार सुलोचना मानन्धर लिसें मूपाहां वरिष्ठ साहित्यकार मथुरा सायमिं निगुलिं सफूया विमोचन यानादीगु ख: ।
लुमंकेबह:जू हामा उपन्यास सुभाय् मिडियां प्रकाशन या:गु ख: धा:सा ऋतु नागार्जुन पब्लिकेसन्स पाखें पिदंगु ख: ।
सफूयात कया प्रा. डा. माणिकरत्न शाक्यं अनुसन्धानात्मक तरीकां न्हूपहलं समीक्षा यानादीगु ख: ।
अथे हे ज्याझ्वलय् मूपाहां मथुरा सायमियात सुभाय् मिडियां दोसलाइं गां न्ययेका: सम्मान या:गु ख: । ज्याझ्वलय् न्हूकथं सभा नाय: ल्य:गु ख: । थुकथं च्वमि लिसें संचारक:मि पूर्णिमा शाक्य सभा नाय: जुयादीगु ख: । ज्याझ्वलय् ब्वति कायेत न्हापां थ्यंम्हसित सभा नाय: ल्यया: ज्याझ्व: न्ह्याकुगु ख: ।ज्याझ्वलय् लसकुस न्वचू च्वमि रिता महर्जनं बिसें सकसितं लसकुस या:गु ख: धा:सा सुभाय मिडियाया कजि महर्जन रत्नं सुभाय् देछासें नेपाल भाषा साहित्य ख्यलय् सुभाय् मिडियां नं पला: न्ह्याकागु खँ तसें सुभाय् न्वचू बियादीगु ख: ।    ज्याझ्वलय् यक्व साहित्यप्रेमीपिनि नं ब्वति दुगु ख: । (ज्याझ्व:या पूवंक भिडियो स्वयादिसं!