१७ सेप्तेम्बरय् मल्ल के सुन्दरया न्हूगु उपन्यास ‘सेप्टेम्बर १७’या विमोचन

येँ / नेवाः न्ह्यलुवाः, मानवाधिकारकर्मी, वरिष्ठ साहित्यकार मल्ल के सुन्दरया न्हूगु उपन्यास ‘सेप्टेम्बर १७’या विमोचन जूगु दु । नेपालभाषा एकेदेमि पाखें पिथँगु थुगु उपन्यास शुक्रवाः छगू ज्याझ्वःया दथुइ जनकवि दुर्गालाल श्रेष्ठं विमोचन यानादीगु खः ।
ज्याझ्वलय् न्ववानादिसें उपन्यासकार मल्लं थःम्हं गुलि नं सफू च्वयाः थःगु नां च्वनेमाः धकाः च्वयागु मखु धासें धयादिल, ‘जिं गुलि नं च्वया जिगु मांभाय्या निंतिं च्वया । जिगु मांभाय् नेपालभाषाय् नं थुलि ग्यंगु सफू दु धयागु लिपाया पुस्तां गर्व याये फयेमा धयागु ल्याखं जिं सफू च्वयाच्वनागु खः ।’
विमोचित उपन्यासया बारे टिप्पणी यानादिसें लोकसाहित्यविद् मदनसेन वज्राचार्यं नेपालभाषां पिहां वःगु थ्व छगू अन्तर्राष्ट्रियस्तरया उपन्यास जूगु खँ धयादिल । ‘थ्व उपन्यासया देछाय् थःगु देय् त्वःताः समुद्रपारी च्वनाः नं थःगु मांभाय् ल्यंकेगु निंतिं मदिक्क ज्या यानाच्वं गैरआवासिय नेवाःतय्त देछा धकाः धयातःगु दु, तर जितः ताः थ्व गैरआवासिय नेवाःतय् बाखं जक मखु, थःगु पहिचान त्वःफिके माःपिं सकलें विश्वया सकलें नेवाःतय् बाखं खः । थःगु म्हसीका त्वःफिके माःपिं मनूतय् बाखंयात थुकी तसकं बांलाक न्ह्यब्वयातःगु दु ।’
वय्कलं अन्तर्राष्ट्रिय परिवेशय् च्वनाः थःगु म्हसीका मालाच्वंपिनि ब्यथा न्ह्यब्वयातःगु थ्व उपन्यास याकनं अंग्रेजी भासं अनुवाद जुयाः पिहां वयेमाःगु खँ नं धयादीगु दु ।
उपन्यासकार मल्लया नेवाः भासं पिहांवःगु थ्व न्यागूगु उपन्यास खः । थ्वयां न्ह्यव वय्कःया नसना, व लँपु थ्व पलाः, द पोस्टर, शंखधर साख्वाः उपन्यास पिदनेधुंकूगु दु ।