मल्ल के. सुन्दरको १७ सेप्टेम्बर सोहि दिन विमोचन

काठमाडौं / मानवअधिकारवादी नेता एवं नेवा: नेता, साहित्यकार मल्ल के. सुन्दरले लेख्नुभएको उपन्यास “सेप्टेम्बर १७” शुक्रबार एक कार्यक्रमबीच विमाेचन भएकाे छ ।

प्रमुख अतिथि जनकवि दुर्गालाल श्रेष्ठले साे उपन्यासकाे विमाेचन गर्नुभएको हाे ।

नेपालभाषा एकेडेमी प्रकाशक रहेकाे उक्त पुस्तक विमाेचन कार्यक्रम एकेडेमीका भाइस चान्सलर यज्ञरत्न धाख्वाःकाे सभापतित्वमा भएकाे थियाे । कार्यक्रममा एकेडेमीका कार्यकारी सदस्य प्राज्ञ रजनीमिला महर्जनले स्वागत मन्तव्य राख्नुभएको थियाे । साहित्यका विविध विधामा सिद्धहस्त साहित्यकार मल्ल के. सुन्दरकाे यसअघि समसामयिक राजनैतिक विषयकाे “पोस्टर” अनि नेपाल संवत्‌का प्रवर्तक शंखधर साख्वाःकाे कथामा “शंखधर” उपन्यास लगायत धेरै कृति प्रकाशित भइसकेका छन् ।

उपन्यास ” सेप्टेम्बर १७” काे विमाेचन कार्यक्रममा लोकसाहित्यविद् प्रा मदनसेन बज्राचार्यले समालोचनात्मक टिप्पणी गर्नुहुँदै विमाेचित उपन्यास अन्तर्राष्ट्रिय परिवेश समाविष्ट एक उत्कृष्ट कृति रहेकाे बताउनुहुँदै उपन्यासलाई अंग्रेजी भाषामा अनुदित हुनुपर्ने बताउनुभयो ।

प्रमुख अतिथि जनकवि श्रेष्ठले साहित्यकार मल्ल हात हालेजतिकाे विधामा सफल हुन सकेका साहित्यकार भएकाे बताउनुहुँदै यस उपन्यासका मुख्यपात्र विभिन्न देश घुम्दै अन्तमा काठमाडौं उपत्यका आइपुग्ने र यसकाे प्रस्तुति शैलीले आफ्नाे मन छाेएकाे बताउनुभयो ।

उपन्यासकार मल्लले जन्म र मृत्यु दुवै शाश्वत सत्य भएकाे तर जन्मदिन सबैले खुशीले मनाउने अनि जन्मदिन कहिले आउँछ भनी पर्खिरहने तर मृत्युकाे दिन आउला भनी डराउने हुँदा यही सत्यतालाई उपन्यास “सेप्टेम्बर १७”काे विषय बनाएकाे बताउनुभयाे ।

कार्यक्रमका सभापति एकेडेमीया भाइस चान्सलर धाख्वाःले साहित्यकार मल्लले नेपालभाषा एकेडेमीलाई एउटा उत्कृष्ट कृति प्रकाशनकाे जिम्मा दिएकाेमा धन्यवाद व्यक्त गर्नुभयाे ।