जीन्दगीया सास: !

रिता महर्जन

सुथय् मिखा चालेवं
छंगु सामिप्यतां घय्‌पुइ जितः
प्यखेरं मिखा ब्वयाः स्वये
छ जि नाप मदु
हाकनं मिखा तिसिनाः स्वये
नुगलय् दुने छ जक खनी
जलय् नापं मदयां छु स्यन
छ नापं दु जि
छंगु नुगलय् दु जि,
मात्र जित: आभास या छं
थथेभनं स्यनीम्ह छ
ख: छ जिगु सास: ख:
क्वा:गु सास मदयेवं
ख्वाउँगु लास जुइ थें
ल: मदयेवं
न्या वाथावाथा कं थें
ज: मदयेकं
ख्युं चिला मवं थें
छ मदयेवं जक
गनं जिगु जीवन पूवनी
ख: छ जिगु जीवन ख:
मात्र जिके ल्यं दनि
छंगु व लुमन्ति
छंगु तःजिगु व मतिना
झ्वाः जुइके मखु जिं
जिगु नुगलय् सदां
ह्वै च्वनी मतिनाया व स्वां
नाप लायेवं व स्वां
छ वइगु लँपुइ ह्व:लाबिइ जिं
नुगलय् दुने ह्व:गु जिगु
व मतिनाया स्वां
व मतिनाया स्वां