कवि पूर्ण वैद्यया लुमंति – विचाः हायेका ज्याझ्वः

सुगतरत्न सिन्दुराकार, यें/ विराट नेपालभााषा साहित्य सम्मेलन गुथि ख्वपया ग्वसालय् नेपालभाषा साहित्यया आधुनिक कवि पूर्ण बहादुर बैद्य मदुगुलिइ वयकःयात यलया मेयर चिरिबाबु महर्जन नापं थीथी साहित्यक संस्था व साहित्यकार पाखें बिचाः हायकेगु ज्या याःगु दु ।

पशुपतिया शवदाह गृहया पिनेसं जूगु उगु बिचाः हायका ज्याझ्वलय् विराटया पुलांम्ह नायो, सल्लाहकार, नेपालभाषा आधुनिक गद्य चिनाखँया न्ह्योलुवाःया योगदानयात कयाः थीथी व्यक्तित्वपिन्सं थःथःगु धारणा पित बियादीगु दु । थुकथं थःगु धारणा पित वइगु झ्वलय् विराट नेपाल भाषा साहित्य सम्मेलन गुथिया पुलांम्ह नायो एवं थौं सल्लाहकार त्रिरत्न शाक्यं मृत्यु शाश्वत खः । विज्ञानं मृत्युयात निशेष याय् मफु अवस्था मदुनि। मनूत गुलि गुलि तःधि जुया वइ उलि उलि थीथी ल्वचं कया नं वनाच्वनी । गुलिसिगु मृत्यु पहाड थें झ्यातुया च्वनीसा गुलिसिगु मृत्यु कपाय् थें हलुका नं जुया वनाच्वनी । झी कवि पूर्ण वैद्य अंग्रेजी भाषाया कवि जूगु जूसा सायद नोवेल पुरस्कारं तकं विभूषित जुइगु जुइ ।
थम्हं वयकः नाप आधुनिक साहित्यया बारे आपालं सहलह व्याकागु खँ कनादिसें वयकःया प्रगतिवादी साहित्यया आन्दोलनयात झीसं आः न्ह्याकेमाःगु दृु । भाजु शाक्यजुं मदुम्ह वयकःयात समवेदन व्यक्त यानादीगुया नापं हार्दिक श्रद्धाजली नं प्वंकादीगु दु ।

उगु वःचाहाकःगु श्रद्धाञ्जली ज्याझ्वलय् कवयित्री प्रतिशरा सायमिं अति हे भावुक जुया वय्कःया योगदानया बारे कनादीगु दुसा मदुम्ह कवि वैद्य नेपालभाषा कविताया ख्यलय् न्ह्योज्याइपिं युवातय्त पतिचा ज्वना हे न्ह्याज्याकादीगु खँ नं कनादीगु दु । थःगु बिचाः हायका च्वचुया झ्वलय् मयजु प्रतिशरां सायमिं झीसं मदुम्ह वैद्ययातन लुमंकेगु धैगु हे वयकःया कीर्तिया पाखें झीसं ज्ञान काय्गु खः धकाः धयादीगु दु ।

उगु ज्याझ्वलय् नेपालभाषा आकादेमिया पाखें शाक्य सुरेनं नं कवि वैद्यया नेपालभाषाा साहित्य ख्यलय् बियादीगु योगदानयात कःघाना थःगु धारणा प्वंकादीगु दु । वयकलं नेपालभाषा साहित्य ख्यःयात गुगु कथं भाजु वैद्यं योगदान यानादीगु खः थौं वयकः मदुगु अवस्थाय् गुगु कथं झीसं सम्मान याय् खनिगु खः थौंया अवस्थां उकथंया वातावरण सिर्जना मजूगु धारणा प्वंकादीगु दु ।