नेकपा (एकीकृत समाजवादी ) ले पायो दल दर्ता प्रमाण पत्र

काठमाडौं / अन्तत: नेकपा एमालेबाट टुक्रिएको माधवकुमार नेपाल नेतृत्वको प्रस्तावित दल नेपाल कम्युनिष्ट पार्टी (एकीकृत समाजवादी) पार्टीको सनाखत कार्य सकिएको छ । त्यसैगरी महन्थ ठाकुर नेतृत्वको लोकतान्त्रिक समाजवादी पार्टीको दल दर्ताको सनाखत पनि भएको छ ।
निर्वाचन आयोगका प्रवक्ता राजकुमार श्रेष्ठले दुवै पार्टीको दल दर्ताको सनाखत सकिएको जानकारी दिए । सनाखत सकिएपछि प्राप्त प्रमाणबारे आयोगका पदाधिकारीले छलफलपछि दल दर्ताको प्रमाणपत्र जारी गरिएको छ ।
आयोगले पार्टी सनाखतका लागि बुधबार बिहान साढे ११ बजेदेखि २ बजेसम्मको समय छुट्याएका थियो । प्रस्तावित नेकपा एकीकृत समाजवादीका सांसद विरोध खतिवडाले ३० जना सांसद र ५५ जना केन्द्रीय सदस्यहरु आयोग पुगेर सनाखत गरेको जानकारी दिए ।
त्यस्तै लोकतान्त्रिक समाजवादी पार्टीका कार्यकारिणी सदस्य केशव झाले १४ जना सांसद र १७ जना कार्यकारिणी सदस्यले आयोग पुगेर सनाखत गर्नुभएको जानकारी दिए ।
राजनीतिक दलसम्बन्धी अध्यादेश अनुसार नयाँ दल विभाजनका लागि सङ्घीय संसद र केन्द्रीय सदस्यको २० प्रतिशत अलग भएको हुनुपर्छ ।
यसरी नेपालको राजनीतिमा यस बिभाजनले कस्तो मोड लिने र अबको बाटो कस्तो हुने हो भनी धेरैको ध्यानाकर्षण भएको देखिन्छ ।