उखें स्वीट थुखें स्वीट – समसामयिक च्वसू

रिता महर्जन

थौंकन्हय्‌या ई सामाजिक सञ्जालया ई। थ्व सञ्जालं याना: यक्व छेँय् भताभुंग व लथालिङ्ग जुयाच्वंगु थ्व हे फेस्बुक व यू ट्युब सञ्जालपाखें खनाच्वंगु नं दु । हत्याहिंसा, आत्महत्या व टर्चरया बुखँत स्वयेबलय् नुग: हे पिपि च्या: । गजा:गु समाज द वल, गथे ग्यानापुगु समाजया निर्माण जुल ? थ्व लुमंके मा:गु खँ ख: ।
धात्थें थथे हे जुया वनी ला लिपा थ्यंक नं ? थजा:गु इलं छन्हु विश्राम काइ ला ?। गन मिजंया मतिनाय् तक्यनाः नकतिनि बूपिं मस्त तक नं त्वःताः, मस्तय्‌गु भविष्य स्यंकाः नं व मांम्ह बिस्युं वनी, गन ब्याहाः जूपिं मिजंतय्‌त मतिना याना: मिजनं ब्याहाः याये मखु धासेंलि मिसां आत्महत्या याइ, मखुसा हत्या याइ। थजा:गु घटना तसकं ग्यान्पुसे च्वंक फेस्बुक व यूट्युबपाखें भिडियोत भाइरल जुयाच्वंगु दु ।
न्ह्यागुं चीज बांलाक छ्यले फःसा जक सुथां लाइ । गन misuse जुइ अन बांमलाःगु घटना जु हे जुइ । थजा:गु घटना जुइत छु मिसा जक दोषी जुइगु खः ला ? मिजं दोषी जुइ मखुला ? छुं घटना जु हे जुल धाःसां अन मिजं वाग्मति लखं हाऽ यानात:म्ह थें शुद्ध जुइ । मिसां मिसायात कुख्यनी।
मिजंत पासा दयेके हे मज्यू धैगु व नं जुइ हे मखु अय्‌नं छम्ह हे मिजनं छेँय् च्वंम्ह कलाःयात my sweet wife धका: ह्ययेका च्वनी व हे मिजनं पिने मिसा नं चाःहिका च्वनी । थन निथाय् नं मिसा हे कानाच्वन । मिसातय्‌त म्हितेगु न्ह्यव:सा तायेका च्वंगु हुनिं याना: मिसात स्यनाच्वन । मिसा धाइपिं मतिनाया द्य: ख: । गन गन ल: वनी अन अन न्या वं थें ख: । उकें छें निसें छम्ह मिसायात सम्मान बिइ सयेके । मिजंया न्ह्याब्लें थ्व हे नारा जुइमा: my sweet wife. थथे धका: ब्यबहारिक नं जुयाब्यूगु खःसा यक्व धै थें मिसातय्‌सं आत्महत्या यायेगु म्ह्व जुयावनी । मिसात ला सचेत जुइ हे मा:, मिजंतय्‌सं नं न्ह्यलं चायेकेगु खःसा संसार हे भिनावनी थें ताः ।