सी धुंकूम्ह हिरो …!!

मथुरा साय्‌मि

मचाबले जि प्याखंगुलु । उबले सिनेमा हल नं मदुनि, फिलिम स्वयेगु नं मदुनि । चान्हय् चान्हय् दबूप्याखं (नाटक) क्यनीबले चच्छि चच्छि बिकाः त्वाःत्वालय् स्वः जुइगु । थुलि यः उलि यः धयागु हे मदु ।
लिपा बिसं 2006 सालय् न्हू-सतकय् दक्कय् न्हापां सिनेमा हल छगू चायेकल — जन सेवा सिनेमा घर। बुलुहुॅ बुलुहुॅ फिलिम स्वयेगु बानि जुयावल । येय् , यलय् ,ख्वपय् नं लिपा सिनेमा हल दत । न्ह्याःन्ह्याःगु इलय् न्ह्याःन्ह्याथाय् वनाः प्याखं स्वःजुइ सल ।
हिन्दी भाय् मथू । मथूसां मतलब मदु । यःपिं हिरोत, हिरोइनतयगु नां कन्थ वः । आक्सन-सीन वलकि न्ह्यैपु । फाइट-सीन ला धिबां काये मदु । थः यःम्ह हिरोयात करपिसं दाइबले थःत हे स्याः चाइगु । अले थःम्ह हिरोनं मेपिन्त मुइकीबले थम्हं नं ल्हाः म्हूचिनाः जुरूजुरूं दनेगु । क्या न्ह्याइपु ।
हिन्दी फिल्मय् दः यःपिं हिरोत ग्वाल्ल दु । अशोक कुमार , दिलिप कुमार, राज कुमार , देवानन्द , राज कपुर आदि आदि …। दक्कय् यःम्ह धयाम्ह दिलिप कुमार । करपिसं वयात हि वयक दाइबले जितः स्यानाच्वनीगु । व न्हिलीबले मनःसां प्वाः जाया च्वनीगु ।
वया फिल्म वलकि मस्वसे च्वने हे फइमखु । गबलें सल ब्वाकीगु , गबलें म्ये हालाः प्याखं हुलीगु , गबलें तलवार ल्वाकीगु , न्ह्यागु नं याये सः । गजब । थ्व हे स्वयेत अले अबुया म्हिचायच्वंगु धिबा स्वहायेकाः सां टिकटया लाइनय् च्वंवने धुनी जि ।
छकः ” शहिद” नांगु फिलिम वल । स्वः वना । का , दिलिप कुमारयात ला स्याना हे बिल । व सित । सिथं यन । सलंसः मनू सनाःवन । वखुन्हु दः नय नं मयल, त्वने नं मयल। मन ख्वःगु ख्वयांच्वन । जि यःम्ह हिरोयात झ्वकमनीपिसं स्याना हे बिल ।
वयां लिपा नं मेगु छगू दिलिप कुमार हे दुगु फिलिम वल। अजूचायाः स्वः वना । खः, दिलिप कुमार ला हानं तगडा हे जुयावल । जि तीन छक्क जुल । सी धुंकूम्ह मनू हानं गय् जुयाः म्वानावल ।
प्याखं धयागु प्याखं हे खनी । धात्थें मखु खनी धकाः जिं यक्व लिपातिनि सिल !!!
…………
( थौ वयकः जि यःम्ह कलाकार दिलिप कुमार थात्थें हे मन्त । हार्दिक श्रद्धाञ्जली । खः थ्व खायुगु सत्य । थ्व नं ख्यालंख्यालं जक सीगु ला …. ।दः पत्याः याये थाकुगुच्वन । … थः यःपिं धयापिं सिना हे वंसां उपिं ल्वःमनी मखु )
( फोटो साभार: बिजयरत्न असंबरे )