हलिं नेवा: न्ह्यस: लिस: कासा जुइगु

यें / हलिं नेवा: दबू पलिस्था जूगु १० दँ क्यंगु लसताय् हलिं नेवा: न्ह्यस: लिस: का:सा जुइत्यंगु दु । थ्व हे झ्वलय् न्ह्यस: लिस: कासा ज्याझ्व:या प्रचार प्रसार कव:या नाय: रश्मिला प्रजापति व न्वकू उदेन न्हूसायमि पाखें ज्याझ्व:या बारे जानकारी बिसें छगू पौ पित बियादीगु दु ।
उगु पतिइ नेपाःया छगू सभ्य, सुसंस्कृत व बिस्कं म्हसीका दुगु जाति खः नेवाः । नेपाः देय्या हे म्हसीका तकं कुबियाच्वंगु नेवा जाति थौं हलिंन्यंकंया कुंकुलामय् थ्यनाच्वंगु दु । थःगु लजगाः, नोकरी, व्यापार, व्यवसाय व अध्ययनया झ्वलय् हलिंया हरेक देशय् च्वनाः नं थःगु जातीय म्हसीका, भाषा, कला, संस्कृति, साहित्य, रीतिथिति, नखःचखः आदिया उत्थान यायेगु, उकियात च्वन्ह्याकेगु, हलिंया मेमेगु समुदाय दुने नं परिचित यायेगु ज्या याना वयाच्वंगु दु धासें
हलिंन्यंकंया कुंकुलामय् न्यना वनाच्वंपिं नेवाःतय्त छधीछप्पँ यायेगु तातुनाः थनिं झिदँ न्ह्यः हलिं नेवाः दबू – वल्र्ड नेवाः अर्गनाइजेसन (Worl Newah Organization) गठन जूगु थनिं झिदँ न्ह्यः पलिस्था जूगु थ्व संगठन वइगु ने.सं. ११४१ गुंलाथ्व चतुर्दशि, ईश्वी संवत् २०२१ अगस्त २१ तारिख शनिवाः कुन्हु छगू दशक क्यनेत्यंगु व हलिं नेवाः दबू छगू दशक क्यंगु लसताय् न्हापांखुसी ‘हलिं नेवाः न्ह्यसः लिसः कासा ११४१’ ग्वसाः ग्वयेत्यनागु जानकारी बियादीगु दु ।
न्ह्यसः लिसः कासा थ्व हे ने.सं. ११४१ गुंलाथ्व षष्ठि, ईश्वी संवत् १४ अगस्ट, २०२१ (०७८ साउन ३०) शनिवाःनिसें शुरु जुइ । थौंया आधुनिक युगय् प्रविधिया माध्यमं जुइगु थ्व कासाय् नेपाःलिसें विश्वया मेमेगु देशय् च्वंपिं झिंनिगू तगिंतकया ब्वँमिपिं (१८ दँ तक दुपिं) ब्वति काये फइगु खँ दु ।
“कासाय् ब्वति कायेत स्वम्हेसिया छगू पुचः जुइमाः । उकी छम्ह मिसा अनिवार्य दयेमाः । कासाय् ब्वति काये योग्यपिंसं हलिं नेवाः दबूया वेबसाइट https://www.worldnewah.org य् वनाः वइगु दिल्लागा सप्तमि, ने.सं. ११४१ जुलाई ३१ तारिख तकया दुने क्वःछिनातःगु शुल्क पुलाः फाराम जायेकादीफइ । कासाय् ब्वति कायेत नेपाः दुनेया छगू पुचःया निंतिं १,०००– (द्वःछि तका) व नेपालं पिनेच्वंगु छगू पुचःया निंतिं २५ डलर शुल्क पुलेमाः ।
कासाय् मुक्कं स्वीनिगू पुचःयात जक दुथ्याकेगु जुइ । ब्वति काइगु पुचःयात समूह विभाजन यानाः छगू समूहय् प्यंगू पुचः दुथ्याकाः कासा यायेगु जुइ । न्हापांगु चरणय् उत्कृष्ट निगू पुचः (न्हाप व लिउ) निगूगु चरणय् वनी । निगूगु चरणय् उत्कृष्ट छगू पुचः स्वंगूगु चरणय् दुहां वनी । उकी नं उत्कृष्ट जुइत ताःलाःगु पुचः बिजं कासा (फाइनल)य् दुहां वनीइ । बिजं कासाय् न्हापयात ६०० अमेरिकी डलर, लिउयात ४०० अमेरिकी डलर, लियांलिउयात ३०० अमेरिकी डलर व हःपाःयात १५० अमेरिकी डलर सिरपाः बीगु जुइ । लिसें प्रत्येक समूह चरणय् नं उत्कृष्टयात सिरपाःया व्यवस्था दुगु” जानकारी बियात:गु दु ।
थुगु हलिं नेवाः न्ह्यसः लिसः कासा ताःलाकेत भाजु विमलमान श्रेष्ठ (क्यानाडा)या संयोजकत्वय् झिंन्याम्हेसिया छगू ग्वसाः पुचः नं नीस्वंगु दु । उगु पुचलय् संयुक्त श्रेष्ठ (बेलायत) व दीपेशमान शाक्य (आयरल्याण्ड) लिउ कजिकथं च्वनादीगु दु । थुकथं हे दुजलय् केशरमान ताम्राकार (अमेरिका), कृष्ण चखुं (बेलायत), उत्तम माकजु (क्यानाडा), भुषणलाल श्रेष्ठ (अमेरिका), नरेश ताम्राकार (क्यानाडा), रश्मिला प्रजापति (नेपाल), शाक्य सुरेन (नेपाल) शोभित शाक्य (इस्टोनिया), मय्जु रजनी श्रेष्ठ (बेल्जियम), समन्त वज्राचार्य (अमेरिका), कमल श्रेष्ठ (न्युजिल्याण्ड), उदेन न्हूसाय्मि (नेपाः) दुजःकथं च्वनादीगु दु ।
अथे हे दया शाक्य (अमेरिका)या संयोजकत्वय् योग्यता व निर्णायक कमिटी, केशरमान ताम्राकार (अमेरिका)या संयोजकत्वय् न्ह्यसः लिसः निर्माण कमिटी, संयुक्त श्रेष्ठ (बेलायत)या संयोजकत्वय् प्रविधि कमिटी, भूषणलाल श्रेष्ठ (अमेरिका)या संयोजकत्वय् अर्थ व्यवस्थापन समिति, रश्मिला प्रजापति संयोजक व उदेन न्हूसाय्मि (नेपाः) सह संयोजक जुयादीगु प्रचारप्रसार कमिटी गठन यानातःगु दु । सामाजिक संजाल संयोजककथं मय्जु लालिमा श्रेष्ठ, आशुतोष बाराही व पुजल वज्राचार्ययात ल्यःगु दु ।
न्ह्यसः लिसः कासा मू ग्वसाः पुचलय् अमेरिका, क्यानाडा, बेलायत, आयरल्याण्ड, बेल्जियम, इस्टोनिया व न्यूजिल्याण्डपाखें नं प्रतिनिधित्व जुयाच्वंगु नं उगु पतिइ उल्लेख यानात:गु दु ।