व्यक्तिगत विवरण कसैलाई नदिन आग्रह – सामाजिक सञ्जालको दुरुपयोग गरेर ठगी गरेको व्यापक गुनासो

पछिल्ला दिनमा त्यही सामाजिक सञ्जालको दुरुपयोग गरेर अनेकन प्रकारका ठगी धन्दासमेत भइरहेको छ। विशेषगरी सामाजिक तथा आर्थिक अपराधसमेत मौलाएको छ।

जान अन्जानमा हुने त्यस्ता अपराधले मानिसको दिनचर्यासमेत समस्यामा परेको छ।

कोरोना कहरका कारण नागरिक आर्थिक रूपमा संकटमा परिरहेका बेला सामाजिक सञ्जालको दुरुपयोग गरेर ठगी गरेको भन्ने व्यापक गुनासो आएपछि नेपाल बैंकर्स संघले कुनै पनि व्यक्तिगत विवरण तथा बैंक खाताको सुरक्षा गर्न सबैमा आग्रह गरेको छ।

संघले पछिल्ला दिनमा विभिन्न सामाजिक सञ्जालमार्फत अनधिकृत व्यक्तिले सहयोग गर्ने बहानामा खाताको गोप्य विवरण माग गर्ने गरेको पाइएको भन्दै नागरिकलाई सचेत गराएको छ।

संघले बुधबार विज्ञप्ति जारी गर्दै बैंक तथा वित्तीय संस्थाका ग्राहकलाई रकम पठाउनका लागि भन्दै खाता, व्यक्तिगत विवरण माग गर्ने गरेको घटनाप्रति ध्यानाकर्षण भएको जनाएको छ।

संघले आफ्नो गोप्य विवरण कोही–कसैलाई पनि नदिन अनुरोध गरेको हो।

आपराधिक मनोवृत्तिका व्यक्तिले सहयोग गर्ने बहानामा खाताको गोप्य विवरण माग्ने गरेको संघको बुझाइ छ।

त्यस्ता व्यक्तिले खाता नम्बर, मोबाइल नम्बर, विद्युतीय कारोबारमा प्रयोग हुने ओटिपी प्राप्त गरी रकमान्तर गर्ने वा गर्न लगाउनेजस्ता क्रियाकलाप गरिरहेका छन्।

व्यापक रूपमा त्यस्ता गतिविधि भइरहेको जानकारी आएकाले सजग रहन संघले सबैलाई आग्रह गरेको उल्लेख गरेको छ। सहयोगका नाममा आउने त्यस्ता फोन कल वा कारोबारको शंका लागेमा नजिकैको बैंक शाखामा तुरुन्त सम्पर्क गर्न पनि संघले अनुरोध गरेको छ।

सजगतासाथ डिजिटल बैंकिङमार्फत सुरक्षित कारोबार गर्न ग्राहकलाई अनुरोध गरिएको विज्ञप्तिमा उल्लेख छ।