घा: – चिबाखँ

महर्जन रत्न

मेसेन्जरय् म्हिग: छगू न्ह्यैपुगु खँ वल , वरिष्ठ साहित्यकार मथुरा सरया ” घा:” बाखँया ब्वनापौ ।
जिं तुरुन्त लिस: च्वया जिके नं घा: दु ।
–छिगु घाः छकः बाखनय् ब्वयादिसॅ । सुभाय् दु ।
मथुरा सरं लिस: च्वया हयादिल ।
– सरया थ्व ब्वना हे नं जिगु नितिं बाखँ जुल ब्वति कायेगु पक्का जुल । जिं लिस: च्वयाछ्वया ।
खैंखँय् जि मेसेन्जरया फुक्क मेसेज चायेका वना ।
झसंग वन जि
थौं वं जित: फेसबुक व मेसेन्जरं ब्लक याये धुंकल खनिं ।
फोन कल नं इन्गेज टोन । थ्व नं ला प्राविधिक ब्लक हे जुल ।
घा: ख: जि वया ।
ध्वल उकिं स्या:चाया लिच्व: जुइमा: थ्व ।
मतिना यायेगु नं घा: लहीगु थें हे ख: । बारम्बार ध्वयाच्वनीगु । निग्ति खँ नं ध्वैगु । मुलुं सुइथें सुइगु हिइसे अहह ।
मतिना सवा: नं उतिकं हे वइ गुब्लँय्ं गुब्लँय्ं , स्या:गु घा: लनेवंया आभास थें ।
थथे बारम्बार जुयाच्वनी । ब्लक यायेगु । चायेकेगु ।
माकलं घा: क्वाताक्वाता यायेथें ।
व घा: जिके नं दु । जिं नं घा: लहिना तये ।
येंया चिकुला । क:सि निभालय् निभालय् लुम्मुसे च्वं ।
मिखा हाकनं फेसबुक अप्डेटय् वन ।
सुस्मिता महर्जन छम्ह क्यान्सर ल्वचं कयाच्वंम्ह नच्चाम्ह ल्यासे मयजुं थगु status अप्डेट यानाहल
– थौं २० क्व:गु केमो कया ।
गुलि सह याये थाकुक्क प्वा: स्या:गु म्हिग: । घा: हे छु स्याइ।
तर जिगु म्वायेगु इच्छा थ्व घालं अझं उप्वयेका ब्यूगु दु । जीवन स्वयां थ्व घा: त:धं मजू ।
जि थुकिइ छु एक्स्प्रेसन याये वा छु कमेन्ट याये धाये मफुल । जित: नं थुकिं मचायेक स्यात , दुघा:थें ।
नेवा: भाजु नामं छगू भिडियो अप्लोड यानाहल । चायेका स्वया स्वये ग्यानापु छथ्व: पुलिसतय्‌सं छम्ह ल्याय्‌म्हयात कथिं हि भभ: वयेक दायाच्वन ।                                                         -” जिमि काययात दायेमते ।” छम्ह बुरि हालाच्वन । उगु हे इलय् बुलडोजरं घट्ना जुयाच्वंथाय् न्ह्य:ने च्वंगु छें घ्वार्र थुनाबिल ।
– जिगु छें थुनेमते । जिपिं गन च्वंवनेगु आ: । हे भगवान ग्वाहालि ! ग्वाहालि ! ”
बुरिम्ह ख्वयाच्वन । कायम्हसित पुलिसं भाय‌्नय् तया: यंकल ।झिम्हति  मनूत नारा थ्वयेका च्वन “जनताया छें थुनेमते-  थुनेेेमते”!   थ्व घा: , म्हया घा: , झीगु छेंबुंया घा: । पहिचान अले अस्तित्वय् ला:गु घा: !
फेसबुक चायेका वना । स्व: स्व:थाय् जिगु घा:या घा: जक हे थें । जिं घा: लहिना तया । लहिना तये छगू  क्लाइमेक्स तक ।          ( स: छगू फरक अभिव्यक्ति)