कोरोना पोजेटिभ र अन्य विरामी बोक्न छुट्टाछुट्टै निःशुल्क एम्बुलेन्स व्यवस्था गर्दै काठमाडौं महानगर

कोविड न्युनीकरण रोकथाम र नियन्त्रणका विषयमा छलफल गर्न विशेष कार्यपालिका बैठक सम्पन्न               
काठमाडौँ / उपत्यकाका तीनै जिल्लामा कोरोना महामारीको दोश्रो चरणको डरका कारण लकडाउन बैशाख १६ गते बिहीवारबाट हुने तयारीमा रहेको बेला बसेको काठमाडौं महानगरको बैठकले समयमा अस्पताल जान आउन काठमाडौँ महानगरले कोविड १९ का पोजेटिभ विरामी र अन्य विरामीलाई अस्पताल लान ल्याउन छुट्टाछुट्टै निःशुल्क एम्बुलेन्सको व्यवस्था गर्ने भएको छ । कोविड १९ को न्युनीकरण, रोकथाम र नियन्त्रणका लागि छलफल गर्न आज बोलाइएको विशेष कार्यपालिका बैठकका निर्णयका बारेमा जानकारी दिँदै बैठकका अध्यक्ष एवं महानगरका मेयर विद्यासुन्दर शाक्यले यस्तो बताएका हुन्।
मेयर शाक्यका अनुसार महानगरले सहकार्य गरेको नेपाल एम्बुलेन्स सेवा १०२ ले कोविड पोजेटिभ भएका विरामीलाई निःशुल्क अस्पताल पुर्‍याउने छन् । यसबाहेक अन्य समस्या भएका विरामीलाई अस्पताल लैजान महानगरका विभिन्न क्षेत्रमा अहिलेलाई १० वटा निःशुल्क एम्बुलेन्सको व्यवस्था गर्नेछ। एम्बुलेन्सबाट सेवा लिन महानगरको हटलाइन र सिधै चालकसँग सम्पर्क गर्ने व्यवस्था हुनेछ । यसबाट डाइलोसिसलगायत दीर्घ रोग र आकस्मिक सेवा लिन अस्पताल जानु पर्ने व्यक्तिको अस्पताल पुग्न र आउन सवारीको समस्या समाधान हुने बताए ।
यसका लागि महानगरले एम्बुलेन्स सञ्चालनसँग सम्बन्धित पदाधिकारीसँग सम्झौता गर्नेछ । एम्बुलेन्स सञ्चालन गर्दा लाग्ने खर्च महानगरले व्यहार्नेछ ।
राहत वितरण गर्ने र खाना खुवाउने काम तत्काल आवश्यक नरहेको बैठकले निष्कर्ष निकालेको छ । बैठकले संक्रमणको अवस्था हेरेर आवश्यक परे पछि छलफल गर्ने निर्णय गरेको छ ।
महानगरले नागरिकका समस्या सुनुवाई र समाधान गर्न टोल फ्रि नं. ११८० लाई २४ सै घण्टा सञ्चालन गर्ने निर्णय पनि गरेको छ । यसैगरी समुदाय स्तरमा सचेतनाका बढाउन शिक्षकहरु परिचालन गर्ने, जोखिमयुक्त स्थानहरुमा निसंक्रमण गर्ने, अक्सिजन थेरापीसहितको आइसोलेसन केन्द्र (लेवल १) स्थापनाका लागि सहयोग गर्ने निर्णय भएको छ ।