सु ख: भैरव , आजु अजिमा ?

प्रा.डा. बज्रराज शाक्य
यल यें ख्वप थिमी क्येपु व गांगामय् च्वपिं मनुत व सभ्यतायात रक्षा यायेत तांत्रिक देवदेबि भैरव अस्तमातृकापिनिगु तधंगु भुमिका दुगु इतिहास व परम्परां खने दयाच्वंगु दु ।

भैरब (आजु), अजिमा धैपिं सु ख: धैगु सिइके मा:गु दु । थुपिं देवदेवीपिनिगु व्याख्या हिंदु व बौद्ध धर्म कथं अलग अलग याना: त:गु खनेदु ।

भैरब धैम्ह शिव महाद्योयाहे मेगु रुप ख: । थ्व देवदेवीपिनी शान्त व क्रोध रुप दुगु जुया च्वन । भैरब क्रोध रुप याम्ह द्यो ख: । भैरब शिवया हे क्रोद्ध रुप ख: । खने दुपिं खने मदुपिं असुर राक्षस दैत्यतयसं मनुतेत अनेक तालं दुख कस्त बियाच्वनि । थयोपिं दुस्ततयत भैरबं क्रोद्ध रुप पिकया ख्याना छ्वया: मनू व सम्पदा संस्कृति रक्षा यानावया च्वंगु जुया च्वन । अथेहे अजिमादेबिपिं गुम्हसित लिपावया: अस्तमातृका धायेगु याना हल थुपिं देबिपिसं नं मानं मस्तयत रक्षा याइथें शहरय् गामय् च्वंपिं मनुतयत शहर गांया पिने छचा खेरं च्वना: रक्षायाना च्वंगु जुया च्वन ।

बुद्ध धर्म कथं भैरबयात बज्रभैरब धाइगु जुया च्वन । भैरबयात मन्जुश्रीया क्रोद्ध रुप यमन्तकथं कयात:गु दु । मन्जुश्री बुद्धत्वया ज्ञान रुप ख प्रज्ञा ख। बुद्ध धर्म अनुसार प्रज्ञा हे शक्तिया श्रोत ख । उकिं बुद्धबिहारय् रक्षक जुया: भैल: द्यो खापाय् दु धाइगु जुया च्वन ।

मन्जुश्रीया ज्ञान धायेबलय् छुकिया ज्ञान धैगु खँ वइ । छुकिया ज्ञान धायबलय् संसार धैगु प्रतित्यसमुद्पाद कथं दया च्वंगु स्वतन्त्र अस्तित्व मदुगु शुन्यता सत्यया ज्ञान ख । शुन्यया प्रतिक धैगु माता अर्थात अजिमा ख: । ज्ञान जक दयां मगा शुन्यताया ज्ञान मा: । शून्य जक जुयां मगा: । स्युसां मस्युसां शुन्यला खहेख: । शुन्ययात खंके मा:गु दु सीके मा:गु दु। ज्ञान शून्य धाइगु सीके मा:गु दु ।

हिन्दु धर्म कथं माता धासां भगवती धासां अष्टमातृका धा:सां कुमारि धा:सां शक्तिया श्रोत ख: । रक्षा याइपिं ख: । अथेहे भैरब शिवया प्रतीक रक्षक ख: । तर रक्षक जुपिं शक्तिसाली देवदेबि मातापिसं निरीह पशुपंक्षी तयगु हिनू चफुना: म्वा:म्वा: हि त्वनीगु छगु बिदम्बनाया खँ जुयाच्वंगु दु । मनुतयसं खं मथुया च्वंगु दु । थ्व अतिहे गोप्य जुया चोंगु दु । मथूसां अन्धभक्त जुया: यानाच्वंगु दु। थ्व छगू तधंगु अनुसन्धानया बिषय ख: धैथें ताया ।

बुद्ध धर्म अनुसार भैरब मन्जुश्रीया ज्ञान जुल । अजिमा बज्रदेबी शुन्यता जुल । ज्ञान व शून्य समन्वय जुया: यथार्थ जूगु जुल । थ्व हे शक्ति सर्ब सत्वयागु रक्षा याना च्वंगु जुल ।

बुद्ध धर्म व हिन्दु धर्मया मुख्य फरक हिंसा जुगु खनेदत। लिपा वया बज्रयान धर्मय् हिंदु जुजुपिनिगु कारणं याना: हिंसायागु प्रभाव ला:गु खनेदु । बास्तबय् बुद्ध धर्मय् गनं नं हिंसा या:गु महत्व मदु । बुद्ध धर्माय् खालि प्रज्ञा व करुणाया जक महत्व दुगु स्पष्ट खनेदु ।