रिता महर्जनया नेपाल भाषाया उपन्यास “हामा” पिदन

यें / नेपाल भाषा साहित्य ख्यलय् न्हूपिं साहित्य च्वमिपिंमध्ये छम्ह लोकंह्वा:म्ह च्वमि ख: रिता महर्जन । वयक:या च्वसा चिबाखं च्वयेगु लिसें हाइकु च्वयेगु तक नं बांलाक न्ह्यानाच्वंगु दु । याकनं हे वयक:या चिबाखं सफू नागार्जुन पब्लिकेशन पाखें पिहां वयेत्यंगु दु ।
थ्व हे झ्वलय् वयक: मयजु छम्ह उपन्यासकार जुइत नं ता:ला:गु दु ।

च्वमि : रिता महर्जन

वयकलं च्वयादीगु उपन्यास “हामा” नांगु उपन्यास नेपाल भाषा साहित्य ख्यलय् अतिकं हनेबह:म्ह वरिष्ठ उपन्यासकार मथुरा सायमिं भर्चुअल माध्यमं विमोचन यानादीगु दु ।
थुलि जक मखु थुगु उपन्यासयात वयकलं नेपाल भाषा मिसा उपन्यासकारपिनि धेंधेंबल्लाखय् दुतिना नं दीगु दु ।
वयकलं नेवा: मिसा उपन्यास च्वमिपिन्त हपा: बिकथं मिसा उपन्यासकारपिनि दथुइ छगू प्रतियोगिता घोषणा यानादीगु ख: गुकि दुतिनेगु अन्तिम दिन थ्व हे चैत मसान्त तक ख: । थुगु प्रतिस्पर्धाय् न्हाप जूम्ह च्वमियात २५द्व: तका अले छम्ह च्वमियात १० द्व: तकाया ह:पा सिरपा नं तयात:गु दु ।

 सुभाय् मिडियाया सुभाय् प्रकाशनं थुगु उपन्यास प्रकाशन या:गु ख: ।

पारिवारिक पृष्ठभूमि च्वयात:गु थुगु उपन्यासं ब्वँमिपिन्त भावुक यायेफैगु खनेदु । उपन्यासया बाखंचु तस्कं बांला: नुगलय् थ्यंक थीफु ।
नेपाल भाषा मिसा उपन्यासकारपिनि धल: तस्कं चिहाक: शशिकला मानन्धर , अपर्णा प्रधान निम्ह जक दु आतक नेवा:उपन्यास च्वमिपिं ।  थुकथं धायेगु ख:सा रिता महर्जन स्वम्हम्ह नेवा: भासं उपन्यास च्वयादीम्ह मिसा उपन्यासकार जुइत ता:लागु दु ।
थुकथं हे नेपाल भाषा साहित्य ख्यलय् सुभाय् पोस्ट डट कम अन्लाईन पत्रिकामार्फत नेपालभाषाया न्हू- पुलांपिं चिबाखं च्वमिपिसं च्वयादीगु चिबाखं मुना नं प्रकाशनया नितिं तयार जुइधुंकुगु दु ।

“हामा” विमोचन भिडियो स्वयादिसं-