बने-ज्या ( ब्यापार)

मथुरा सायमि

असं दुवाः।प्यख्यरं मनूत मुनी । अले न्ह्याबलें अलमल । पसल्यातसें नं गुलि फु उलि सामान लॅय् लॅय् थ्यंक पिकयाः थाय् कयाच्वनी। घ्वात्तु घ्वायमायक म्वःम्वः जुयाच्वनी । अलमल ।

छगू पसलय् तॅचिनातःगु बरांया पाकेत छम्ह गाहकिं कयाः स्वत , ” छगू किलो ला थ्व ? गुलि थे ? भचा तग्वःका बरां। चिचीग्वःगु मदुला ? ”

पसल्यां कन, ” मखु छिउ । थ्व चिचीग्वःगु हे खः । थ्व स्वयाः चिग्वःगु धैगु बरां हे दैमखु । हाकु मुस्या छता दैका ।”

गाहकिं छगू पाकेत बरां न्यानायन ।

भचालं मेम्ह छम्ह गाहकि नं वयाः बरां हे स्वत । अले न्यन,” साहुजी बरां भचा चिचीग्वः थ्व । तग्वः छाॅतया बरां मदुला मेगु ?”

साहुजीं ध्वाथुइकल ,” मखु छिउ , थ्व ततःग्वःगु हे खः । उध्धुमं साः । थ्व स्वयाः तग्वःगु ला बकुलाः जकं दैका छिउ । ”

गाहकिं छ्यनं क्वात्तुक्वात । छगू पाकेत न्यानायन !!!