न्यव: !

मथुरा सायमि

मनन कःसी इरूथिरू जुयाच्वन । घडि स्वत । हथाय् चाल । भुतुली दुस्वयाः कलाःम्हसित झन कयकय च्याकःवन, ” मबूनिला अज्ज । वने लिबात धयां …।”
” का का दिसॅ । बु हे बुत । ताना हे हल का धकाः रमितां हथाय् पथासं जा तानाः मननयात न्ह्यचीके हल । ल्हातय् छप्यय् म्हुतुइ छप्यय् यायां क्वछुनाः स्वारास्वारां नल ।
बैगलय् म्हिताच्वंम्ह मचायात नं जा तानाः न्ह्यःने तयाबिल । मचां नयेत स्वत । मांम्ह हालाहल , ” ल ल हेर खान लागेको । हात धुनु पर्छ भन्या हैन पैला । ”
धासेंलि मचां ल्हाः सिलाः नयेगु नल ।
नयाच्वंथाय् लिक्क वनाः रमितां मचाया अबुम्हेसिके न्यन , ” ग्वःन्हु दत छि लिमलानाच्वंगु । जुयाच्वंगु छु खः जिं खॅ हे मथूनि ” रमितां खॅ सीकेगु उत्सुकता क्यन ।
ननं मननया म्हुतुं वयात जवाः नं बियाहल , ” गय् मथूगु छं ? उखुन्हु ज्वंपिं अभियन्तातयत त्वःतीगु हॅ थौं । आः सर्बोच्चं आदेश बिल । त्वःतीगु जुल । सुमन सायमि व मेपिं नं सकसितं वंघलं मैनबत्ति जुलुस पिकयाः देय् चाःहीकिगु का थौं । हः अन हे वनेत लिबात धैगु का। थुल्ला ?”
” छाय् ज्वंगु ले उम्त ? उमिसं छु याःगु ?”
” न्ह्याक्वधाःसां मथू छं । न्ह्याक्व टी. भी. स्वःसां मखं छं । सडक बिस्तार धैगु ला थू हला छं? बालाजुइ झ्वःझ्वः नेवाःतयगु बस्ति छेछे झ्वःलिं डोजर हयाः थुनाः सरकारी मनूतसें नेवाःतयत उठिबास याःगु ला स्यू हला छं ? हः व हे ल्वापुइ हालाजूपिं मनूतयत सरकारं ज्वनातःगु । थ्व सुमन धैम्ह मनू सडक बिस्तार संघर्ष समितिया अध्यक्ष । छेय् थुंथुंथाय् अन्याः अत्याचार जूजूथाय् वनाः थुकियात पनेत सनाच्वंम्ह नायः । हः थ्वहे मनू उमित नापलायत प्रहरी कार्यालय वंबले , थःथः नेवाःभासं खॅ ल्हाःबले प्रहरीतसें जिमिसं मथूगु भाय् ल्हाये मदु धाल हॅ । व हे नेवाः भासं मथुइक खॅ ल्हात धकाः उमित नं अन हे न्यवः न्हयाकाः कुनाबिल हॅ । थुल्ला खॅ ? ”
रमिता वाताहाॅ च्वन अले न्यन , ” थःगु भासं खॅ ल्हातका अले छु ? उमि छु स्यन ? ”
” हः व हे ला धैगु छन्त ।थ्व पर्बते सरकारं नेवाःत धाक्वसित उखें जिलला थुखें जिलला स्यालय् तियाच्वंगु दु । स्वःस्वःथाय् अन्याः अत्याचार यानाच्वंगु दु । आः वयाः खॅ तक्क हे थःगु भासं ल्हाये मदयका बीन । मनूया नैसर्गिक अधिकार हे हनन यानाः काइन । आःला सकलें छप्पं मजुसे मगात । आःला भासा आन्दोलनय् नारा जक मखु , ल्हाः हे म्हूचिनेमाःगु अबस्था वल ” खॅ ल्हाल्हां मननया नये सिधयकल । नु सिल । म्हुतु हुल ।
” डाडी , म नि आउछु । साइकिल किन्दिन्छु भन्याः हैन ” मचां पिहाॅ वनेत्यंम्ह अबुयात पन ।
मचाया खॅ न्यनाः अबुम्ह वाताहाॅ च्वन । मचाया सः वया न्हायपनय् न्हयबि सुललल् दुहाॅ वं थें च्वन । पलाः हे मन्ह्यात । मननया म्हुतुइ पाकां सू थे जुयाबिल । गबायत बैगः मौन । मां-बौ निम्हं दंपिं दनां जुल ।
बैगः छगुलिं छकलं उस्सुसे मसां-कुॅ नवल !!