मचाबलय्‌या रोमाञ्चक यात्रा !

रिता महर्जन

जि अथे हे न्हय्‌दँति दुबलय्‌या खँ ख: थ्व । छन्हु मांया तसकं मिले जूम्ह पासा ज्ञानीमां छेँय् वल । मां व ज्ञानीमांया न्ह्याइपुक्क खँ ल्हाल्हां कन्हय्‌खुन्हु सक्वया नादि खुसी माधवनारायण दर्शनया लागि वनेत खँ जुल । तर ज्ञानीमामं मोटरं वनेगु मखु न्यासि वनेगु धका: प्रस्ताव तल । “गन यलंनिसें सक्व थ्यंक न्यासि वनेफइ ? थुपिं मस्त निम्ह नं यंकेगु उकें मोटरं वनेगु का” जिमि मामं धाल । “कन्हय् छकः ला न्यासि हे वनेगु का लच्छी ! मस्तय् नं न्ह्याइपुसे च्वनी । निघौ नं थ्यनी सक्वय्” ज्ञानीमामं धाल । “निघौ नं थ्यंनी ला?का अय्‌सा न्यासि हे वने का” मामं नं धाल
कन्हय् सुथय् न्हापां च्या व पाउरोटी नयाः मां, जि, ज्ञानीमां व वय्‌कःया म्ह्याय् नापं जिपिं प्यम्हं सुथसिया न्हय्‌ताः इलय् छेँय् थासं पिहां वना । जिपिं मचा तिनि, मांपिं ल्यू ल्यू ब्वाँय् ब्वाँय् वना ।
ववं एयरपोर्ट थ्यंन। अन ततःग्वःगु हवाईजहाज दिकात:गु थासय् खन । जिं जीवनय् न्हापां न्ह्यःने थासं हवाईजहाज खना लय्तावल । अनथासं खुसि जुकाः खुसि सिथं सिथं ज्ञानीमामं ब्वना यंकल । न्यासि व वं गन थ्यन थ्यन, मांपिन्सं नं मस्यू जुइमाः । छकः छकः मामं ज्ञानीमांयात ब्वःबीगु खना जिमिसं । सायद जिपिं यक्व हे तापाक थ्यनेधुंकल जुइमाः ।
जिपिं न्यासि वना च्वंथाय् छेँत खने मदया वयेधुंकल । पूर्वपट्टी गुँ दु, गुँया क्वसं फि हे खनेदुगु खुसि न्ह्यानाच्वन, खुसि भतिचा च्वय् यबुलँचा अले लँचा उखे आलु पिनात:गु बुँया फाँट । आ: व थाय् लुमना वइबलय् रोमान्चित जुइ जितः ।
जिमिके नयेगु त्वनेगु छुं मदु । व वं छथाय् निथाय् खय्‌त‌य्‌गु छेँ ध्वदुइ, ज्ञानीमामं अन मनूतय्‌त सःता: “टाढाबाट आएको मोहि खाउँ नं है” धका: धायेवं उमिसं मोहि त्वंके हल । खय्‌त जूसां गुलि भलादमी उब्लय्‌या मनूत । जीवनय् न्हापां मोहि धा:गु नं उबलय् हे त्वना । प्यथाय् न्याथाय् जिमिसं मोही त्वना । छथाय् छेँय् जिमि मामं “कति बज्यो” धका: न्यन । तीन बज्यो धका: लिस: वल । मां नं लँ दापा जुल धका: सायद ग्यात जुइमा:, “अय् ज्ञानी तसकं लिबाये धुंकल । आ: तःपु लँ मालाः मोटरं छेँ लिहां वनेमाल, न्हि चीहाकः” मामं धाल । ज्ञानीमामं ज्यू धैगु थें यानाः छ्यं जक संकल ।
लँय् थाय् थासय् मोही त्वनागुलिं ला जिपिं मस्तय्‌त नं नये पित्याः मजू धायेमाल । जिला झन मचाबलय् निसें प्रकृति यःम्ह जुयाः ला मस्यु त्यानुसे नं मच्वं। न्यासि ववं तापाक तःपु लँय् मोटर हयाच्वंगु खनेदत । मां भाराभारां न्यासि वन । मांया ल्यूने ल्यूने जिपिं स्वम्हं ब्वाँय् ब्वाँय् वना ।
लँय् थ्यनेवं छग: गाडी थ्यंकः वल । ज्ञानीमामं ल्हाः भाय् यानाः मोटर दिकल । गन वनीगु थ्व गाडी धका: न्यन । खलासी “सालीनदी सालीनदी” धाल । थपाय् हाक: लँ न्यासि वयेधुन, नादिखुसी वनाः द्य: दर्शन यानावने का धका: मां व ज्ञानीमांया खँ ब्याकल । जिपिं प्यम्ह मोटरय् थाहां वना । गाडी न्ह्याकल, दुई मिनेट ति गाडी न्ह्याकूबलय् हाकनं गाडी दिकल । खलासी हाल “सालीनदी सालीनदी”
मनूत धमाधम कुहां वन । मां व ज्ञानीमां न्ह्यूगु जिं खना । सायद न्यासि वयाः हे झीपिं नादिखुसी थ्यन धका: हर्षित जूगु जुइमा: । जिपिं प्यम्ह मोटरं कुहां वया । निभा: बिइन, लिहां वनेत मोटर मन्त धाःसा फसाद जुइ धाधां मां व ज्ञानीमां नं जिपिं मस्तय्‌गु ल्हा: ज्वनाः द्य: दुथाय् स्वयावन । मनूत उलि मदु उकें द्य: दर्शन व भागि यानाः याकनं याकनं अनं लिहां वयाच्वँतलें मामं मस्तय् नये मास्तेवल जुइ धका: जेरी व स्वारी न्यानाः प्वःचित । हाकनं गाडी मदै धका: हाहां मामं जिगु ल्हा: ज्वनाः गाडी दिकेगु थासय् ब्वाँय् ब्वाँय् वयाः थ्यंकः वया । अन खलासी “लास्त गाडी, लास्त गाडी” हालाच्वन । जिपिं प्यम्ह गाडीया ल्यूने च्वंगु सीतय् वनाः फ्यतुना ।
अनंलि मामं निपा ल्हातं प्यपुंकाः द्य:या नां का:गु जिं खना । जेरी व स्वारी लिकनाः जिपिं मस्तय्‌त नकल, मांपिनि नं नल । जिं सायद न हे मनल जुइ, छु जुल नं जिं मचाः । तसकं ख्युंसे च्वने धुंकल, गाडी थासं कुहां वयाबलय् !
मचाबलय्‌या तसकं न्ह्याइपुगु व amazing trip ख: थ्व जिगु जीवनय् । न्हापा मखुसां आ: जूसां ज्ञानीमांयात सुभाय् बियाच्वना , थजाःगु adventure trip या लागि…