भूमाफियापाखें पलेस्वाँ पुखु बचे यायेत नगरप्रमुखया नेतृत्वय् अदालत न्ह्यने धर्ना

यें/ मध्यपुरथिमि नगरपालिका–८ बोडेया ऐतिहासिक पलेस्वाँ पुखू, कमलपोखरीयात भूमाफियाया ल्हातिं बचे यायेत मध्यपुरथिमिया बासिन्दात धर्नाय् च्वंगु दु।

ख्वप जिल्ला अदालतया फैसला सदर यायेमाःगु माग तया मंगलबाः थाैं यलया हरिहर भवनय् च्वंगु पुनरावेदन अदालतय् मध्यपुरथिमिया बासिन्दा, जनप्रतिनिधि लिसें कमलपोखरी संरक्षण समितिया पदाधिकारीतयसं धर्ना ब्यूगु दु।
मध्यपुरथिमि बोडे, नगदेशलगायत बासिन्दा, मध्यपुरथिमि नगरपालिकाया प्रमुख मदनसुन्दर श्रेष्ठया नेतृत्वय् जनप्रतिनिधि व संरक्षण समितिया कजि गणेशमान चक्रधरया नेतृत्वय् स्थानीय बासिन्दातयसं अदालत न्ह्यने पलेस्वाँपुखु बचे यायेत माग तया प्ले कार्ड ज्वना प्रदर्शन याःगु खः ।
स्थानीय मनूतयसं परापूर्वकालनिसें सार्वजनिकरुपय् दुगु ऐतिहासिक व धार्मिक महत्वं जाःगु उगु पुखुया अवैध दर्ता लिसें न्यायेगु मिइगु जुसेलिइ उकियात सार्वजनिकरुपय् हे कायम यायेत नगरवासीत कुहाँवगु समितिया कजि चक्रधरं धयादिल। मध्यपुरथिमि नगरपालिकाया नगरप्रमुख मदनसुन्दर श्रेष्ठं थ्व पुखु बाःबाज्यापिनिगु पालंनिसें हे सार्वजनिक जुगु थःम्ह स्यूगु धयादिल।
ख्वप जिल्ला अदालतं सार्वजनिक पुखु हे जुइगु फैसला यासेलिइ मध्यपुरथिमि नगरपालिकां पुखुया संरक्षण याना डुङ्गा चले याना आन्तरिक पर्यटकया गन्तव्य स्थलया रुपय् विकास यायेगु लक्ष्यनापं ७५ लख तका बजेट विनियोजन याना पुखुया संरक्षण शुरु यायेधुक्कुगु नगरप्रमुख श्रेष्ठं धयादिल। फैसला जुगु कन्हय् खुन्हू हे मध्यपुरथिमि नगरपालिकां पुखु सफा यायेगु ज्या याःगु वयकलं धयादिल।
तत्कालीन बोडे गाउँ पञ्चायत–६ कित्ता नं १ या पुखुलिइ केच्यानाच्वंगु १५ रोपनी ९ आना सार्वजनिक जग्गा २०४२ साल असार ३१ गते उगु पुखु कान्छी पोडेनीया नामय् दर्ता जुया २०५१ साल माघ २२ गते अधिकृत वारिसनामा बकसपत्र याना मनाङ छेँय् जुया येँया ठमेल च्वनिम्ह ग्ल्याल्पो गुरुङया नामय् पास जुगु खः। गुकिइ मध्ये १३ रोपनी ९ आना ग्ल्याल्पोया नामय्, १ रोपनी तेन्जी शेर्पेनीया नामय्, १ रोपनी कर्सी जद्योना गुरुङया नामय् पास याना आःवया ग्ल्याल्पों मेपिं थीथी मनूतयगु नामय् जग्गा पास याना मिउगु लुगु दु। सार्वजनिक पुखुयात व्यक्तिया नामय् दर्ता याना थीथी मनूतयत मिसेलिइ स्थानीय बासिन्दां विरोध यानाच्वंगु खः ।
अनंलिपा बोडे, नगदेशया बासिन्दां सङ्घर्ष समिति गठन याना उगु पुखु सार्वजनिकरुपय् लितहयेत माग यासें दायर याःगु रिटया ख्वप जिल्ला अदालतं २०७५ साल असार १९ गते मङ्गलबाः न्यायाधीश मातृकाप्रसाद मरासिनीया इजलासं बोडे क्षेत्रया उगु कमलपोखरी ‘पलेस्वाँ पुखु’ सार्वजनिक सम्पत्ति जुगु फैसला न्यकुगु खः ।
बोडेया उगु पुखुलिइ व्हइगु पलेस्वाँ स्थानीय लायकूलिइ दुगु तलेजुयात छाइगु, पलेहँलय् तलेजुया पुजारीइ भ्वय् नयेमाःगु व साउनय् जुइगु नीलबाराही प्याखनय् वहे पुखुलिइ व्हगुपलेस्वाँ छाना जात्रा न्ह्याकेमाःगु सलंसःदँ निसें परम्परा दुगु स्थानीय बासिन्दालिसें वडा ल्याः ९ या अध्यक्ष रामकाजी चक्रधरं धयादिल।
पुखु मिइधुक्का छुं छुं मनूतयसं पुखु ल्हाना भवन दयेकेत चाः हसेलिइ स्थानीयवासी इमित लिनाछ्वगु धासें वयकलं ऐतिहासिक पुखुयात पुखु हे कायम यायेमाः धयादिल। संरक्षण समितिया कजि चक्रधरं जिल्ला अदालतं याःगु फैसलायात पुनरावेदन अदालतं सदर यायेमागु स्थानीयवासीया माग जुगु धयादिल। सार्वजनिक पुखुयात व्यक्तिया नामय् दर्ता याना ऐतिहासिक पुखुलिइ छुं नं संरचना दयेकेगु म्हगसः मखंकेत पुखु न्यापिन्त इनाप यासें स्थानीयवासी वीरेन्द्र जयनां थुगु पुखुयात गू गू नं हालतय् स्थानीयवासीइ पुखुया हे रुपय् कायम यायेगु धयादिल।
(नेपालमण्डल टिभिया ग्वाहालि)