नाटक !!

मथुरा सायमि

खुगू दशकं मयात जिं कबि दुर्गालाल श्रेष्ठ म्हस्यूगु । दबुली दबुली भाजु भृगुरामलिसे खने दैच्वनी । म्ये हालाजुइ , प्याखं हुलाजुइ । स्वयाच्वॅक्व स्वक्वमितयत सालाच्वने फुगु उमिगु क्षमता । स्वयाच्वंपिं सुं इकिधिकि सनीमखु । स्वःलिसे स्वये मगानाच्वनी उमिगु प्रस्तुति ।
भचा म्हस्यूतास्यू जुइव छन्हु वं जितः थःथाय् ब्वनायन । न्हायकं त्वालय् , दुने चुकय् । खॅ सः । खॅ ल्हानाः भुलय् याना तयेफु । तःधं छुइम्वाः । सरलय् न्ह्यागु खॅय् नं भ्यलय् पुनेफु । उकिं वलिसे स्वापूतैपिं मनूत तम्वयाः वलिसे बायावन धयागु न्यने मलं ।
वया क्वथा स्वम्ह मनू च्वनेवं जाः । झ्याःक्वसं साःगाः दुसां वया क्वथाय् मनूत च्वंच्वने न्ह्याः। वया खॅ न्यन्यं ई वं मचाः । वं थःगु कबिता न्यंकी। थूसां मथूसां न्यने । जिं थःगु बाखं न्यंके । वं ध्यान तयाः न्यनी । सरसल्लाह ब्याकी । गबलें बाखं कनागु क्वचाय् धुंकी । वया ध्यान ला गन वं गन वं जुयाच्वनी । कबितय् हू वयाच्वनी धाइ । खःला धयाथे च्वनी ।
उप्वः थासय् निम्ह नापनापं जुया । साहित्य सम्मेलनय् जक मखु , नयेथाय् त्वनेथाय् नं । छन्हु निम्हं छथाय् नयेथाय् । तेबिलय् बजि घासा जक मखु , गिलास नं निगः दु । उकी क्वाःगु मखु , ख्वाउॅगु भचाभचा नं दु । नयांच्वना त्वनांच्वना । व पुतुपुतुं हालाहल, ” मथरादाइ , छिं नाटक छगू च्वयादिसॅ । छधाः प्याखं । फसात हे जुयाच्वन । ”
खॅ मथुयाः जिं वया ख्वालय् स्वयाच्वना ।
वं धयाहल , ” अमृत साइन्स कलेजया बिद्यार्थीतसें म्हिते धकाः च्वंच्वंगु । नाटक छपु मदयाः उपिं भःभःन्हुयाच्वन । पायछिगु छपु गनं हे मलुयाच्वन । ”
खॅ थुल । अले जिं धया , ” अयसा दुर्लाल दाइनं हे च्वया ब्यु रे छपु । स्यनीम्ह नं छि हे खः । ”
” खः। खयां छु याये । च्वयानैम्ह मखुत जि । च्वयेत छिं हे च्वया बियादिसॅ मथरादाइ । मजुइ मखु, जुइ । ”
” गन च्वइ जिं । बाखं च्वइम्ह मनुखं प्याखं । सःसा धकाः ….। ” जिं वया म्हुतुप्वाः तिकेथें धया ।
निम्हं नयाच्वना । भचाभचा म्हुतु नं प्याका हे च्वना । निम्हं आः धाःसा छगू हे खॅय् क्वसीक दुना । गय् यानाः छपु नाटक च्वयेगु ? छपु नाटक …।
शान्तगु वाताबरनय् बम तज्याये थे वया म्हुतु अनायास चालावन , ” …..पर्दा सरररर चाली । क्वथा । क्वथा नं घलःमलः । लुखा तिना तइ । क्वथाय् सुं दइमखु । सुनसान । छत्थुं कुनें कालललल कुललल सः वइ । घारररर घुरररर सनी । हरररर हरररर न्हिलाहइ । स्वाहाने हे तज्याइ थे च्वंक सुं धिसिमिसिं पलाः बबस्वां थाहाॅ वै । खापा घाराङ्ग चायेकी । सॅ फंफं तयाः ल्हाःतिं हिभ्याःगु छुरा छपु ज्वनाः छम्ह मिसा क्वथाय् स्वाराःक दुहाॅ वइ । वया म्हय् वसः नं थातं दैमखु । व व हे हिभ्याःगु छुरा स्वस्वं न्हिली , वाक्कु वाक्कुछ्युं न्हिली । न्हिन्ह्यूं हे न न्याये थें हालाहै , ” धुन , स्याये धुन जिं । वयात स्याना हे बिया जिं ….जिं… । ”
थुलि नवानाः दुर्गालाल दाइ पक्क च्वन । वया ख्वाः स्वस्वं जि वाताहाॅ । गबायत जिं वयात स्वैच्वना । व नं चुपचाप । निम्हं सालिक थें । अले जिं हे नवाना , ” अले , अले छु जुइ ? सु व ? सुयात स्यानावःगु वं ?”
जिगु न्ह्यसः न्ह्यसः हे जुयाच्वन । वं लिसः मब्यू । होशय् वःम्ह थें पलख जायव अले वं धयाहल ,” शुरू थुकथं यानादिसॅ मथरादाइ । छपु स्यल्लाःगु प्याखं जुइ । अले लिपा गय् जुइ ? अनं लिपा छिं हे बिचाः यानादिसॅ। थुकथं हे न्ह्याकादिसॅ । च्वये फु छिं । ”
वया खॅ न्यनाः म्हाः धाये मफुत जिं । भचा घुरय् जुयाः थया , ” का जिउ । जिं च्वये । जिं च्वयेगु जुल । कन्हे , दुर्लाल दाइ , जि छिथाय् नाटक ज्वनाः हे जक वयेगु जुल । छपु पूवंगु छधाः प्याखं ।
बहनी जि च्वयेत फ्यतुना । च्वयावना । स्वम्ह पात्रत खात । छम्ह मिसा , निम्ह मिजं । बाचाजाबले व नाटक पूवन । कचि मिखां सुथसिया द्यः तुइतुइ धायवं जि ख्वाः छपाः सिलाः वयाथाय् हुत्तय् जुयाः वना ।वयात ब्वनाः न्यंका । वं ” जिल जिल । पायछि जुल ” धाल । नाटक पूवन । जिमिसं उकियात नां छुना …. मिलापू !!