इलं ह्यूगु लँपु

गुंला ज्वीवं न्हिथं विहारे वनेमाःम्ह दीर्घचा विहारे वनेतः छ्येँनं प्याहाँवल । ध्वदुक्क पासा महेन्द्र नापलात । महेन्द्रं न्यन – छाय् गन वने त्यनाउ छ ? दीर्घचां लिसः बिल – गन वनेधाये न्ह्याबलें वनेथाय् विहारे वनेत्यनाउ का । न्ह्यांसा छनं नु झी नापं वने वन्यु खःला ? महेन्द्रं धाल – छुया: वनेउ विहारे ? बुरा जूगु मदुनि , धर्म कर्म यायगु उमेर मजूनि ! अथेला विहारे वनकि अयला त्वनेमज्यु धया धाई , मखूगु खँ ल्हायेमज्यु धाई थःजुलं बहनी जुलकि पावर तयेमाःम्ह , छ्येँ वनां कलाःचा तँचालकि त्वनां मवया धया फत्ता खँ ल्हानां ह्येकेमाःम्ह नियमय् च्वने हे मफेक छुयावयेगु ? भचा बुरा नि जुइकेका मज्युला ! खँ मथूम्ह महेन्द्र यात दीर्घचां हाकनं खँ थुइकेगु कुतःयाई -थःगु श्वास्थ्यया निम्ति जूसा त्वने सयकेमाः ! छं पन्चशीलया लास्टय् च्वंगु झ्वः छकः ब्वनांस्वसाः (सुरामेरय मज्ज पम्मादट्ठाना) सुरां काययःगु मादक पदार्थ पमादट्ठाना अर्थात होस तनावंक मादक पदार्थ मत्वने हँ । अयला म्हुत्वी तयेवंस्तुं पाप दोष लाइगु मखु , बरु न्ह्याइपुके धाधां मचायक भचाभचा यायां अयलायात थःगु नियन्त्रणय् तकं तयेमफेक त्वनेमजिउका पासा सिउला ! अखबतं अयलाखं छन्त नियन्त्रणय् तयाबिलकि छुयायउ ? छंगु म्हुतुं मभिंगु , मन्यींगु नुगलय् चकुतिं कीगु थेंज्याःगु शब्द पिज्वै अबले पाप दोष लाईका , वथेस्तुं छंगु ल्हाःतुतिं दायेगु थ्वायगु अथवा ल्वाभः छ्यलाः हानिकारक कुकर्म याइ अबले पापदोष लाईका सिल ला पासा । आःतक अयला त्वनां अजाःगु मभिंगु ज्या यायेनंला छँ ? महेन्द्रया मनं भतिचा खँ थूथें थूथें जुया लिसः बी – आःतक ला गबलें अज्याःगु कर्म याये मनंनि स्यू । धाथें अथे छता ला जिं गबलें पाप याये म्वालेमा धया मनय् उत्साह दयेका ” वनेगु मन दयकल” अबले महेन्द्रं धाई- का नुसा नु छकः वया:हे स्वयेमालीका का नु ! निम्हेसिया नं विहार पाखे स्वया पलाः न्ह्याकी  ।