नेपालमण्डल टेलिभिजनमा पुन: रमेश महर्जन

काठमाडाैं। नेपालको पहिलो मातृभाषाको टेलिभिजन नेपालमण्डल टेलिभिजनको अध्यक्षमा रमेश महर्जन पुन: सर्वसम्मत निर्वाचित भएका छन्।
ललितपुरको भोलधोखास्थित ज्यापूसमाजको भवनमा शनिबार सम्पन्न भएको नेपालमण्डल टेलिभिजनको ९ औं साधारणसभाले महर्जनलाई चार वर्षको कार्यकालका लागि पुनः अध्यक्षमा सर्वसम्मतले चयन गरेको हो।
यो उनको टेलिभिजन अध्यक्षमा दोश्रो कार्यकाल हो । साधारण सभाले सञ्चालक समितिका सदस्यहरूमा उद्योगपतिहरू पद्म ज्योति, दिपक श्रेष्ठ, ध्रुवकुमार श्रेष्ठ, मंगल महर्जन, कुमारराजा महर्जन, सिल्भिया राजोपाध्याय, नातिभाइ महर्जन र शर्मिला महर्जन पनि सर्वसम्मतले चयन गरेको छ।
नवनिर्वाचित अध्यक्ष महर्जनले आगामी कार्यकालमा नेपालमण्डल टेलिभिजनले देश भित्रको मात्र नभएर विदेशमा रहेका संघसस्थाहरूसँग मिलेर गुणस्तरीय कार्यक्रम, समाचारहरूको उत्पादन एवमं प्रसारण गर्ने बताए।
कार्यक्रम ज्यापू समाजका अध्यक्ष चन्द्र महर्जनको प्रमुख आतिथ्यमा भएको थियो । सम्पन्न साधारणसभामा नेपालमण्डल टेलिभिजनको आर्थिक वर्ष ०७६/७७ को वार्षिक प्रगति प्रतिवेदन र लेखापरीक्षक प्रतिवेदन प्रस्तुत गरिएको थियो भने २ वर्ष अघि नेपालमण्डलले टेलिभिजनले आयोजना गरेको कलाकार मनराजा साँगितिक कार्यक्रमबाट उठेको रकमबाट  नेपाल मण्डल टेलिभिजन श्रस्ता सम्मान कोष पनि स्थापना गरेको छ। उक्त कोषको लागि संस्थापक सदस्य एवमं प्रबन्ध निर्देशक प्रकाशकाजी महर्जन, सञ्चालक समितिका सदस्यहरू मंगल महर्जन, शर्मिला महर्जन, उद्योगपति बाबुराजा महर्जनले रकम प्रदान गरेका थिए। त्यस्तै कार्यक्रममा नेपालमण्डल टेलिभिजनको प्रगतिको लागि ज्यापू समाजका अध्यक्ष चन्द्र महर्जन, सल्लाहकारहरू रामकाजी अवाले, बाबुराजा महर्जन लगायतले शुभकामना दिएका थिए।
स्मरणीय छ बिसं २०६८ सालको योमरी पून्हि ,मंसिर पूर्णिमाको दिन यस टेलिभिजनको स्थापना भएको थियो । नेपाल भाषा कला, संस्कृति, सम्पदा नेवा: राजनीति बिषय समेटेर यस टेलिभिजनले उल्लेखनीय कार्यक्रमहरु प्रसारण गर्दै आएको छ ।