संकिपा ख्यलय् ज्यापु कलाकार

न्ह्यलुवाः

नेवाः संकिपाया इतिहास स्वयेगु खःसा न्हापांगु संकिपा “सिलु”या हिरो जय श्रेष्ठ खः । वयक भाजुं “सिलु” संकिपा म्हितेगु झ्वलय् थःगु नां जय श्रेष्ठ धकाः छुउसां वयकःया सक्कली नां धाःसा जुजुभाई महर्जन खः । थुकथं न्हापांगु नेवाः संकिपाया हिरो ज्यापु वर्गयाःम्ह खः धइगु खनेदत । अथेहेतुं नेपाःया न्हापांगु संकिपा “आमा” संकिपाय् आमा यानिकि मां या भूमिका यानादीम्ह कलाकार चैत्यदेवी सिं नं ज्यापु समुदाय याम्ह हे खः । अथेहेतुं न्हिला न्हिला हुँ व निपाः ख्वाःपा संकिपाय् छम्ह हिरो जुया तुलसीनारायण नं ज्यापु वर्गया जक मखसे नेवाः गर्व खः धकाः धायेमाः ।

हिरोईनत :

नेवाःतये नितिं गर्व कथं न्हाय् धस्वाकेत ताःलाम्ह छम्ह हिराशोभा महर्जन यानिकि हिसिला महर्जन नं खः । “राजमति” संकिपाय् मेन रोल म्हितूम्ह हिसिला महर्जनं अनं लिपा बुद्धकालीन बाखनय् दयेकूगु “चाण्डालिका” थेंज्याःगु छगू ज्वःमदूगु नेवाः संकिपा नं म्हितलसा ताःई तक्क थ्व ख्यलं तापाना च्वंम्ह हिसिला मय्जु हाकनं थ्व ख्यलय् खनेदयेक वःगु दु । वय्क मय्जुया “त्याग”व “तुयुमति” नांयागु संकिपा पिदने धुंकूगु दु अले ऐतिहासिक नेवाः नगरी किपूलिस स्वापू दूगु ऐतिहासिक बाखं ज्वनाः पिलू वःगु “किर्तिपुर : द लिजेण्ड अफ कीर्तिलक्ष्मी” नं खनेदयेक वय्धुंकूगु दु ।

नेवाः संकिपा ख्यलय् भ्यलेपुना च्वंपिं ज्यापु समुदायया हिरोइनत मेमेपिं नं दु । उकी मध्ये छम्ह रेश्मी महर्जन नं खः । वय्क मय्जु “भिन्तुना” संकिपाया हिरोइन् खः । “भिन्तुना” संकिपाया हे मेम्ह छम्ह हिरोइन रेमा महर्जनं लिपा वनाः “तिरीमिरी झ्याँय््” लगायतया संकिपाय् म्हितूगु दुसाः थौंकन्हे वयक मय्जु विदेशय् च्वनाच्वंगु दु । निर्देशक आर्यम नकःमिं दयेकूगु छगू ज्वमदूगु संकिपा कथं बय्बय् जूगु “भिन्तुना”या हिरोइन रेश्मी महर्जनं लिपा “इहिपा” थेंज्याःगु धिसिलाःगु संकिपा नं म्हितलसा वय्क मय्जुया यात्रा “तिनतिकः महाबिकः” संकिपातक थ्यंगु दु । “तिनतिकः महाबिकः” संकिपाया चर्चा यायेबले त्वफिके मजिउगु नां धइगु निक्की महर्जनया नां खः । वयक मय्जुं निर्माता निर्देशक पूर्णकाजी ज्यापुया “हिसिमति” म्हितादीगु दुसाः नेपाःया हे छगू बीग बजेट संकिपा “च्वापुफय्” नं म्हिताच्वंगु दु । “तिनतिकः महाबिकः” संकिपाय् छम्ह हिरोइन् रेना महर्जन खःसा थुके निगेटिभ रोल म्हिताच्वंम्ह राजन महर्जन खः ।

“मतिनाया स्वां”या सबिना महर्जनं लिपा “थः कतः कतः थः” नांयागु संकिपा नं म्हितूगु खनेदतसा सनी अवाले नांयाम्ह हिरोइन “मिजं” धुंका तनसा “व मिसा” संकिपाया विनीता महर्जन नं लिपा मेगु संकिपाय् खनेमदुनि । विनीता मय्जुं “स्वयेगु मखुला” नांयागु नेवाः सिरीयल नं म्हितल । नेवाः संकिपा ख्यलय् सकृय रुपं थःगु पलाः न्ह्याकाच्वंम्ह रोजिना सुवालया पलाः नं तारीफ यायेबहःजु । चन्द्रमान, थ्वला ग्यानापु स्टायल थेंज्याःगु संकिपा म्हितूम्ह रोजिना सुवाल थेंहेतुं “थ्वला ग्यानापु स्टायल”या मेम्ह संकिपामि सिर्जना महर्जन खः । नेवाः संकिपा ख्यलय् खनेदयेक वःपिं मेपिं हिरोइन मध्ये “थःम्ह म्हूगु गाः”या रुबिना महर्जन, “जि यःम्ह पासा”या निम्ह हिरोइनत रुना महर्जन व ललिता महर्जनया नां नं च्वछायेबहःजु ।

हिरोत :

थ्वः ख्यलय् भ्यलेपुना च्वंपिं गुलिखे हिरोत ज्यापु समुदायाःपिं हे लानाच्वंगु दु । उकी मध्ये “जिपिं बदमाश मखु, मिजं, याक म्ह्याय् थेंज्याःगु संकिपा म्हितूम्ह राजु महर्जन छम्ह नं खःसा मेम्ह छम्ह “भिन्तुना”य् म्हितुम्ह राजु महर्जन जुजु नं खः ।

टेक्निकलि तारीफ यायेबहःगु संकिपा धकाः धयातःगु “सर्ग मिलाः”या हिरो राजेश महर्जनया न्हूगु संकिपा “अंश” वयेधुंकूगु दु । अथेहेतुं “मिजं”या छम्ह मेम्ह हिरो सुरेन्द्र महर्जनं लिपा वना “माया”, “मिजं” व “थः कतः कतः थः” लगायतया नेवाः संकिपा म्हितूगु दु ।

“मू मदूगु जिन्दगी” संकिपाया लुखां थ्वः ख्यलय् ख्वाः क्यं वःम्ह आर.एल. महर्जनं लिपा “लिबाय् धुंका” म्हितल । “मू मदूगु जिन्दगी” संकिपाय् आर एल महर्जनया व अबु जुया म्हितूम्ह रामकृष्ण धिनां नं ज्यापु समुदाययाम्ह हे खः । “मुद्दा” नांयागु छगू बहू चर्चित व सार्थक संकिपाया निर्देशक रत्नकाजी महर्जन लूनिभाः नं अभिनयपाखे नुगः क्वसाःम्ह संकिपामि खः ।

थौंकन्हे याम्ह चर्चित कलाकार सुरज व्यन्जनकार नं ज्यापु समुदयया प्रतिनिधि यानादीम्ह कलाकार खः ।

अभिनय व निर्देशन :

“तीतो सत्य” नांयागु सिरीयलय् बेमानया रुपय् लोकंह्वाःम्ह संकिपामि रवि डंगोलभाजुया “यांमिखा” धइगु नेवाः संकिपा ख्यलय् छगू बिस्कं हे थाय् दूगु नेवाः संकिपा खः । थुके रविभाजुं छम्ह नेगेटिभ कलाकारया भुमिका नं म्हितातःगु दुसा वयकः भाजु थ्व संकिपाया निर्देशक नं खः ।

रवि डंगोलं लिपा कुलांगार, व मिसा, वल वल फसिक्वाः व टेम्पो चालक नांयागु संकिपाया निर्देशन याःगु दुसाः, “पानबती” संकिपा गेस्ट रोल व “थ्वला ग्यानापु स्टायल”य् मेन रोल नं म्हितूगु दु । “तापलय्” संकिपाया निर्देशक व कलाकार बालकृष्ण प्रजापति खः ।

“थम्हं म्हूगु गाः” संकिपा लगायतया संकिपाय् अभिनय याम्ह रवि महर्जन थौंकन्हे नेवाः संकिपा ख्यःयाम्ह छम्ह व्यस्तम्ह सह – निर्देशक खः । रश्मी , जामन गुभाजु , लाखे भाजु वयकलं सह निर्देशक कथं ज्या यानाच्वंगु छुंछुं संकिपा खः । “स्यंगु छें” संकिपाया निर्देशक हरिकृष्ण महर्जन खः ।

रुपिन डंगोल छम्ह निर्देशक व हिरो कथं नेवाः संकिपा ख्यलय् भ्यलेपूंम्ह संकिपामि खः । वयकभाजुं निर्देशन याःगु मतिनाया स्वां व जि यःम्ह पासा निगुलिं संकिपाय् वयकभाजु थःहे हिरो जुया म्हिताच्वंगु दु । अभिनय नं याइपिं निर्देशन नं याइपिं संकिपामिपिनिगु धलखय् लाःम्ह छम्ह स्वतन्त्र संसार महर्जन नं खः । निफ्वः स्वां, जिपिं वदमाश मखु, इहिपा लगायतया संकिपा म्हिते धुंकूम्ह स्वतन्त्र भाजुं हसना, पियाच्वना, ए जि यःम्ह थेंज्याःगु संकिपाया निर्देशन नं याःगु दु ।

अमृतमान महर्जनं निफ्वः स्वां, मतिना , द्वपंमिसु लगायतया नेवाः संकिपा निर्देशन याःम्ह अमृतभाजु छम्ह स्यल्लाःम्ह कलाकार खः । वयक भाजुं “जिपिं बदमाश मखु” संकिपाय् याःगु नेगेटिभ रोल तारीफ यायेबहःजू । अमृतमान महर्जनं दयेकूगु न्हूगु संकिपा “स्वयनगु” खः ।

अभिनय :

ज्यापु संकिपामिबारे चर्चा यायेबले ललेन्द्र शाक्यं निर्देशन यानादीगु “भौमचा” नांयागु छगू संकिपाय् धाःसा यक्वः हे संख्याय् ज्यापु कलाकार दुथ्यानाच्वंगु संकिपाया रुपय् कायेमाः । थुके भीमसेनदास महर्जन, महेश्वरी महर्जन, विश्वराज महर्जन, चण्डेश्वर महर्जन, बेखाराम महर्जनलिसेलिसें आपालं ज्यापु समुदायया कलाकारपिं दुथ्यानाच्वंगु दु ।

अथेहे, नेवाः संकिपा ख्यलय् भ्यलेपू्ंम्ह सुरोज महर्जन छम्ह अभिनेता जक मखसे डान्स डाईरेक्टर नं खःसा वय्कया काय् श्रजल महर्जन छम्ह गायकया रुपय् पलाः न्ह्याकाच्वंगु दु । अभिनय पलाः न्ह्याकुम्ह अनुप सिं सुवालं “कथहं” नांयागु संकिपाय् मेन रोल याःगु खःसा थ्व संकिपाय् वय्कयात मनरा प्रजापतिं साथ ब्यूगु खः ।

“थ्वला ग्यानापु स्टायल”य् छगू रोल म्हितूम्ह गंगाराम डंगोलया कुतः नं तारीफ याये बहःजूसा, “सेरीव बञ्जा” संकिपाय् मेन रोल म्हितूम्ह लक्ष्मीकुमार महर्जन मेमेगु नं संकिपा व सिरीयल म्हितूगु दु । आपालं संकिपाय् अभिनय याःम्ह ज्ञानेन्द्र महर्जन ईशारा नं ज्यापु समुदायया कलाकार खः ।

नेपाःया संकिपा ख्यलय् तकं नांजाःम्ह पल्पसा डंगोल नं नेवाः संकिपा ख्यःया न्हाय् खः । “न्याल्लब्यां” संकिपानिसें दिपाः मदिक्क पलाः न्ह्याकाः वयाच्वंम्ह पल्पसा डंगोलं “सत्य धरोधर्म” नांयागु संकिपा निर्माण नं याःगु खःसा नेवाः संकिपाय् न्यू ईण्ट्रिया रुपय् कलाकार शोभा महर्जनया नां नं थन न्ह्यःथने बहजू । वयकः मय्जुं म्हितूगु नेवाः संकिपा “बसन्त ऋतु” नं मू भुमिकाय् म्हितादिइगु दु ।

शोभा महर्जनया जहान राजी महर्जन नं छम्ह कलाकार हे खःसा “बसन्त ऋतु” संकिपाय् नं म्हितुगु दु । खय्तला संकिपा ख्यलय् मेम्ह छम्ह नं शोभा महर्जन दु । वय्क मय्जुं “तिमिला” लगायतयया संकिपाय् अभिनय याःगु दु । कृष्णभक्त महर्जन नेवाः संकिपा ख्यलय् तसकं पलाः न्ह्याम्ह कलाकार खःसा वय्कलं लुकामारी, अध्याय, गाजलु , रेड मनसुन लगायत आपालं खस नेपाली संकिपाया नापनापं अक्षय कुमारया नेपालय् शुटिंग जूगु बलिउड संकिपा “बेबी” नं म्हितेधुंकल ।

थ्वहे झ्वलय् किपू नगांया गरिमा महर्जन नं छम्ह प्रतिभावान् मिसा कलाकार खः । गरिमां ख्यालिजुजु मदनकृष्ण श्रेष्ठया सलं थ्वयाच्वंगु छसलिं निसलिं धाधां जिं ला यक्व हे त्वनेलात बोलया म्यूजिक भिडियो म्येय् मू भूमिका म्हितादीगु दुसा कैलाश महर्जनया सलं थ्वयाच्वंगु अय् किपू मैंचा बोलया म्यूजिक भिडियोय् नं मू रोल म्हितादीगु दु ।

ल्यंपुल्यं :

“हिसिमदु”, “लिबाय् धुंकाः” लगायत संकिपाया निर्देशक राजेशमान सिंह अले तसकं नांजाःम्ह गणेशराम लाछीया नापनापं मैंया महर्जन, पुर्णिमा डंगोल, अष्टलक्ष्मी महर्जन, अकलमान महर्जन नं ज्यापु समुदायया न्हाय् हे खः धकाः धायेमाः ।

सुभाष राम लाछीं “तंबैंक”य् बाल कलाकार जुया म्हितूगु खःसा लिपा वना सुरेश किरणं च्वगु “मतिना थन हे दु” संकिपाया निर्देशन नं याःगु खः । “लिधंसा” संकिपा म्हितूम्ह कृष्ण प्रजापति खःसा “सेरीव बञ्जा”लगायत आपालं संकिपा म्हितुम्ह लक्ष्मीकुमार महर्जन खः ।

अले म्येहालामिपिं स्वय्गु खःसा आपालं दु । रीता महर्जन, सतीश महर्जन, रत्नशोभा महर्जन, सानुबाबु महर्जन, दीपा महर्जन, स्वस्ति महर्जन, राजेश महर्जन नेवाः, कैलाश महर्जन, मथुरा महर्जन, कृष्णमान डंगोल, भुवन महर्जन आदीपिन्सं नं नेवाः संकिपा ख्यलय् म्येहालामि कथं न्हाय् धस्वाकाः वयाच्वंगु दु । गीत संगीत ख्यलय् आपालं ज्यापु समुदायया कलाकारपिं दु । वयकःपिनिगुबारे लिपा च्वयेगु कुतः याये ।

दकले लिपा :

नेवाः संकिपा ख्यलय् भ्यलेपूंपिं संकिपामिबारे चर्चा यायेगु झ्वलय् थन न्ह्यथनागु नां बाहेक नं मेमेपिं नं मदई धइगु मखु । अवश्य दयेफु । आःयात थन छगू संकेत कथं जक थ्व च्वसा न्ह्याकूगु खः। लिपा हाकनं थुकियात सुधार यायेगु लँ धाःसा दनि धइगु खँ लुमंकादिइत इनाप यानाच्वना ।

नेवा: अनलाइन न्युज |