सवाः

मथुरा सायमि

नखःचखः धालकि, भ्वय् गुथि धालकि, जात्रा पर्व धालकि, पुजा-पाठ धालकि मयः धाइपिं नेवाःत उस्त मदु । पुस्ता पुस्तांनिसें घाना वयाच्वंगु , न्ह्याना वयाच्वंगु थ्व संस्कार मनूया हिनूहिनुली न्ह्यानाच्वंगु दु। दयमा मदयमा , फयमा मफयमा मनुखं न्ह्याका वयाच्वंगु दु । पंगः न्ह्यागु वःसां ल्वात्तुल्वानाः हात्तुहालाः सां न्ह्याः वयांच्वंगु दु , वनांच्वंगु दु ।

जि नं अबुया काय् । दः नं यः । दक्वदाक्वं यः । गुथि भ्वय् वलकि म्येय् क्वःथलाः भ्वय् न्यायकी, लाखुनां यः न्याखुनां यः । जात्रा पर्व वलकि बालाचःर्हेया थॅहिती झ्वःलिं द्यःखः ब्वये हइ । म्वःम्वः मनूत द्यःयाके वइ । जात्रा न्याइ । दाबा थाय् मसःसां सरलय् म्ये हाले ।
लुती नाग दुयाः होम याइथाय् नं चिकु मधासे द्यः ख्यूलं थुरथुर खाक्क स्वःवने । मरः नकी । मरः जा नं नये । ईण्द्रायणी द्यःखःलिसे देय् चाःहिलाः तुमपाकुं छ्याॅय् याः जुइ नं उलि हे यः। सकतां सकताः यः।

फुक्क स्वयाः दकलय् यःगु धयागु नखःचखः हे खः । नखःजःछि भ्वय् । गबलें लङ्गुर बुर्जाय् धिबा पाये। गबलें कौ ह्वाःथाय् च्यासि पाये । च्याम्पति ल्वाके, बस्पति ह्वागरा म्हितेंनिसें कयाः घःचाः हीके व साखसला त्वाःथले सकतां यः ।

दकलय् यःगु नखः मोहनी नखः हे खः। खा स्याय् , हॅय् स्याये । नवः दुगुया ला झन ह्वालाह्वालां बास वः । भचाभचा सुकू नं पाये । नःला स्वां छ्यने थाःसां मथाःसां ह्याउॅक टीका लगय् याये । भुतमाली ब्वयेकाः करपिंत चाये फतकि जस्ता हे ध्याङ्गां ध्याङ्ग्रां संक तिंतिंन्हुये । नखः सिधःसां ल्याः मदु । नखत्या वनेगु ज्या झ्वःलिं स्वानावइ । नखत्या नः ववं च्यान्हु झिन्हु ला छेय् जा हे थुइ म्वाःला च्वनी । क्या मज्जा ।
मचाबले उस्त जि न्ह्यवःसालिसे म्हिते मलं । थम्हं फ्वने मसः । ” म्हिति का ” धकाः मांअबुं न्याना मब्यू । मगाः मचाः धयागु छुं मस्यू । लिपा पिने म्हितः वने सल । छम्ह निम्ह मचातयत स्वचाः पाङ्ग्रागु साइकलचाय् फ्यतुकाः मांअबुपिसं घ्वाना हइगु स्वयाच्वने लं । थः नं छकः अजागु साइकलचाय् फ्यतुइगु मन वं । म्हगसय् हे जक गयाच्वनेगु भायपो धात्थें साइकलचा जिं थी तक नं मलं ।

दच्छिया छकः मोहनी नखः वइ । नखः धुनेव थाय् थासय् नखत्या ब्वं । किलागलय् ब्वाया पाजुपिन्थाय् , न्हू सतकय् बाज्यापिंथाय् , प्याफले नं सकलें नखत्या वने लं । मांया थःछेपाखें नं लायकुसालय् पाजु बाज्यापिंथाय् , छत्रपातिया ज्योतिनारान् बाज्यापिंथाय् , चसानय् कृष्णबहादुर पाजुपिंथाय् अले कुनाः त्वालय् तीर्थ पाजु व पुरूषोतम पाजुपिंथाय् नं दॅय् छकः धयाथे नखत्या नः वनेगु । उलि न्ह्याः थुलि न्ह्याः धयागु हे मदु ।

थ्व फुक्क थासय् स्वयाः कुनाः त्वालय् अष्टनारान् बाज्यापिंथाय् धालकि जि हुरूक्क हे । मांयात भचा न्हापां वने नु धकाः हाला च्वनेगु । नयेत मखु , स्वयेत मखु । अन स्वचाः पाङ्ग्रागु साइकलचा छगू छेली पसलय् हे वांछ्वया तःगु दु । अन बाज्यापिनि साइकल पसः हे । साइकल झ्वःलिं झ्वःलिं दिकातइ । मचातयगु चिचीधंगु साइकलचा छगू निगू जक दु ; व नं ल्हाःतिं न्ह्याये मदयक च्वय् खानाःतःगु । मीत ब्वयातःगु ।
नखत्या वंक्वपतिं जिं व साइकलचाय् फ्यतुनाः अन हे पसलय् चाःचाः हिलाच्वनेगु । उखेथुखे । तले नःवा धकाः सतः वइगु दः मयः । नये धुनकि लिहाॅ वयेत्यइ । गाक्क छकः साइकल गये दः मौका हे मदु । लिपा गबले वने दइगु जुइ धकाः मनय् खॅ वायेका च्वनेगु । थुकथं प्यदॅन्यादॅ तक्क जिं व साइकलचा अन गया हे च्वना ।

दॅ दॅ बितय् जुयावन । इलं थौ जितः ज्याथ यानाबिल । सॅ नं भुइल । ला नं स्यय् स्यय् कुन , हय् हय् कुन । जंक्व हे सिधल आः ला । द्यः जुल धाल । खःला मखुला ।

थौ नं जि व कुनाःत्वालं इलय् ब्यलय् जुया । बाज्यापिनिगु व छेय् आःतलें धस्वानाच्वंगु हे दनि ।तर व पाजु मल्जुपिं अन सुं मन्त , न उमि मचाखाचा हे च्वंच्वंगु दनि । नखः न्ह्याबलें वः तर आः नखत्या ब्वं मन्त । छेय् भ्वाथःजुल । पसः नं सुनां सुनां चलय् यानाच्वन । न्हापा दन्नच्वंगु छगू हे साइकल पसः । आः बाकू बाकू यानातल । प्यंगू साइकलचा ब्वयाःतःगु दनि । तर आः मुक्कं लाकां पसः जुयाच्वने धुंकल ।

झ्वाताहाॅ दनाः स्वैच्वना । जिगु मिखा बुल्लुसे बुल्लुसे प्यानावल ।

थौ मोटरसाइकल गया जुया गुलिगुलि । गाडिइ हे च्वनाजुया उखेथुखे । तर उबलेया व साइकलचा गयागुया ति सवाः थौ जिं मोटरसाइकल गयाः नं काये मफुत ; न लखौलख तूगु थःगु गाडिइ च्वनाः हे दत । व साइकलचा गयागु सवाः हे दक्कय् सक्कय् माकुगु सवाः जुयाः ल्यनांच्वन ।
मनू बुरा जूसां लुमन्ति हुयाछ्वये मफयाच्वन !!!!