हारिरहेको देश

     वसन्त चौधरी

आधुनिक महाभारतको
नयाँ अध्याय
फेरि सिर्जना भयो
लोकतन्त्रको चीरहरण
एकपटक फेरि हुँदैछ
मौन छ कृष्ण
र मनमानी गरिरहेछ दूतसभा
देशको अस्मितासँग
खेल्दै पासा,
ठटाउँदै तिघ्रा !

आज
दिग्भ्रमित छन् देशवासी
भ्रमले रूमल्याइएको
कुरुक्षेत्रभरि
सकुनिका जालहरू
तत्रतत्र छन् बिछ्याइएका
अन्योल समयमा
खोज्ने कहाँ गाण्डीवधारी !

देशको नाउँमा
देशलाई नै बन्दकी राखेर
देशको इज्जत ढाक्न
व्यस्त छन् चारैतिर
अर्जुनको भेषधारी ।

अर्जुन नि:शस्त्र लाचार छ
गाण्डीव खोलिएको छ
र पटकपटक,
छलिएका छन् देशवासी
नक्कली पाण्डुपुत्रहरूसँग !

यो स्वार्थको महाभारत
गरिरहेछ मनोमानी ।
लोकतन्त्रको नाम टाँसेर
गरिरहेछ
तानाशाहातन्त्रको
खेती !
उमारिरहेछ
लोकलाज र बेइज्जति
र, लोकतन्त्रमा हारिरहेछ देश !                                               -असार १९, २०७७