कल्पना

माणिकरत्न शाक्यभिक्षु

कल्पना, जिगु त्वाया म्ह्याय मचा । इहिपा जूगु झिन्यादँ ति दत जुइ । तर भातपिन्थाय्च्वनेगु उचित वातावरण मदुगुलिं थः छेँ च्वनाच्वंगु हे प्यदँ ति दयेधुंकल । जीवनय्इहिपा यानाः न्ह्याइपुक त्यपू जीवन हने धैगु ईच्छा न्ह्याम्हसिया नं दइ । तर इच्छा याना थें पूमवनीबले अथेहे भातपिन्थाय्माया मतिना प्राप्त मजुइबले न्ह्याम्हं निराश जुइगु ला स्वभाविक हे जुल । थथे हे निराश जुजुं भात पिन्थाये मच्वंसे थःगु स्वाभिमान यात बःकया थःगु स्वतन्त्रता कथं जीवन न्ह्याकाच्वंम्ह छम्ह मिसा कल्पना खः । कल्पनाया थःछेँय्माँ छम्ह बाहेक सुँ हे मदु । गबले गबलें थःयागु दुःख, थःभातपिन्थाय्थःत याःगु ब्यवहार मांम्हसित कनीगु । खँ न्यनाः थःगु नुगः तःज्याइ थें च्वसां नं म्ह्याय्यात लिधँसा बियाच्वनीगुछाय्धाःसा थःनं ख्वलकि म्ह्याय्यात झन दुःख जुइ धका । धात्थें थम्हं बुइकाम्ह म्ह्याय्या दुःख जूगु खँ न्यनीबले सु जक मांया मिखाय्ख्वबि मवइ जुइ थ्व संसारय्? । तर हायेकां छुयाये? म्ह्याय्या समस्या थःगु ख्वविं सिले फइमखुगु जूगुलि ख्वबि महायेकूसे सहयाना च्वनीगु । थथे हे दुःख सुखया खँ ब्याकुं ब्याकुं जीवन न्ह्याकाच्वंम्ह कल्पनाया मा नं छन्हु आकाझाकां मन्त । आ धाःसा कल्पना धात्थे हे याकःचा हे जुल । वया थः धाइपि सुं हे मन्त थ्व संसारय्। कल्पना याकःचा जुसां निसें गनं नं मवं, मेपिं नापं नं यक्व खँ मल्हाः । वयागुखँय्विरक्तता व उच्छेदताया आभास खनेदु । वं छु यात गथे यात सुना नं मस्यु । लिपा वयागु छेँय्धाःसा छम्ह मिजं वईगु जुयावल । व मनू अन छेँ वरोवर वइगु, अले ताहाकः तक्क खँ ल्हाना च्वनीगु जःला खःला पिन्सं खन । त्वाःयापिन्सं खन । व सु ख? धका सुना नं मस्यु । छम्ह याकचा छेँ च्वनीम्ह मिसाया छेँ वया खँ ल्हानाच्वंगु खना जःलाखःला तय्यक्व हे खुल्दुली जुल । त्वालय् च्वपिन्सं धाल न्हापा मांम्ह दुबले पिहाँवने मछाम्ह मनू आः याकःचा जूवले मिजंपिं नाप न्हिच्छि खँ ल्हानाच्वनी का । झीगु समाज नं दुःख जूम्हेसित छु जुल धका न्यनेमसः तर वयागु कुँखिने धाःसा तसकं सः । छन्हु व मनुखं म्हासु म्हासु धाःगु लँ फिना वल त्वालय्च्वंपिन्सं खन । कनेखुन्हु कल्पना नं उज्वगु हे लँ फिना तःगु मनूतय्सं झ्यालं खन । अलेला झन हे त्वालय्हुइनाभुइना जुल । मनूतय्सं धाल । आः ला तसकं हे मजिल न्हि । थ्व कल्पना चा मेपि मिजंपिन्सं फिइगु लँ फिइम्ह जुइधुंकल । लँ हे हिलाबुला याना फिइम्ह जुइधंकल थ्व या चाल बांमला आदि इत्यादि । व मिजंम्ह मनू व कल्पनाया बारे म्वामदूगु खँ यक्व हे ब्याप्त जुल । कन्हेखुन्हुनं व मिजं वल । कल्पनाया छेँया झ्या खापा दक्वं तिना तल । पिनें छु नं खने मदु, व मनूं थाहा वंगु धण्टौ जाय्धुंकल, व मनू तले हे दु वा लिहाँ वने धुंकल , सुना नं मखं ।

त्वायल्च्वंपिन्सं धाल । थौं छकः स्वःहे वने माल, कल्पना चां झीगु नां वंकीन, स्यने न्हयःहे भिंकेगु स्वयेमाः । थथे धया निम्ह स्वम्ह मनूत कल्पनाया छेँय्थहाँ वनेगु कुतः यात । कुने सःतल सुनां नं हँ धयामहः । स्वाने थाहाँवंपिने मने लाःसा थुपिं छु यानाच्वन जुइ धका मति तं तं थहाँ वन, मानौं सुं छम्ह खुँयात ज्वंवने त्यःपिंथें । कल्पनाया क्वथा न्ह्यःने थ्यन । दक्वं झसंग वन । कल्पनाया क्वथा पिने वं फिइगु लँ दक्वं त्वतातःगु खन, दक्वं अजू चाल, छम्हसिनं धाल का स्व जिं उखुन्हु निसें धैगु मखुला? थ्व कल्पनाचिया ताल बांमला धका । मेम्ह सिनं धाल क्वथाय्दुने नं खिउँसे च्वं, न्हाचः पिने स्वयाबले झ्या तिनातःगु। हाकनं मेम्ह सिनं धाल म्वाल स्वयाच्वने म्वाल, लँ पिने त्वता तःगु दु , छाय् Disturb यायेगु, क्वथाय्मत नं चीप्वा जुइक च्याका तःगुलिं हे सिइके फु । दक्वसिया छुयाये छुयो जुलनं । उबले हे हाकनं मेम्ह सिनं धाल मखु स्वये हे माः झीगु त्वाःया बेइजत जुइ न , थ्व यात थौं हे न्वखंक धायेमाः । का स्वहे स्वहेका धकाः वं ध्वाराक्क खापा चायेकल, क्वथाय्सुनसान । मात्र छप्वा देवाः च्यानाच्वन, वया न्ह्यःने च्वनाः मत स्वया कल्पना समथ ध्यान यानाच्वंगुखन, कल्पना आ न्हापायाम्ह मखयेधुंकल, वं सन्यासी वस्त्र धारण यायेधुंकुगु खन । कुदृष्टि तया स्वःवंपि दक्वं अजु चाल । कल्पनायात Comment  यायेगु शब्द सुयाकें हे मदु, सुयाकें नं आँट मन्त कल्पनायात छुँ धायेगु । कल्पनायागु स्वच्छ मनोवल व स्वाध्याय अध्यात्मिक चिन्तन खनां दक्वं छ्यँ क्वछुइका लिहाँवल ।