न्ह्यलुवा लक्ष्मीदासयात हेमराज सिरपाः लःल्हात

येँ  / निदँय् छकः बियावयाच्वंगु नेपालभाषाया प्रतिष्ठामूलक सिरपाः ‘हेमराज सिरपाः’ बहुआयामिक व्यक्तित्वया धनी नेवा: न्ह्यलुवा समाजसेवी लक्ष्मीदास मानन्धरयात लःल्हाःगु दु ।
वय्कःयाहे छेँय् शनिवाः लोकसाहित्य परिषदं थौं सिरपा ल:ल्हागु ख: ।
भाषा, साहित्य संस्कृति, लिपि  सम्बन्धी अनुसन्धानमूलक ७२ गू कृतिया धनी पं. हेमराज शाक्यं नीस्वनातःगु   ख: ।  लोक साहित्य परिषदया संस्थापक शताब्दी पुरुष सत्यमोहन जोशीं दोसल्लां न्ययेका: प्रा. प्रेमशान्ति तुलाधर व दाता सुरेन्द्र शाक्यं छगू लख तका दां नापं हनापौ लःल्हाःगु खः ।
परिषद्या नायः प्रा. तुलाधरं मानन्धरया योगदान व सिरपाःया बारे ध्वाथुइक खँनं कनादीगु खः ।
अथेहे मदुम्ह हेमराज शाक्यं थौं स्वयां झिदँ न्ह्यं झिद्वः व न्याद्वः तकां न्ह्याकूगु उगु सिरपाःयात वंगु प्यदँन्ह्यःनिसें वय्कःया काय् सुरेन्द्र शाक्यं छगू लख थ्यंकूगु खः ।
नेपालय् स्कूलया तथ्यांक कथं शिक्षक दरबन्दी दु तर नेपालभाषा शिक्षकया दरबन्दी शुन्य जूगुलिइ मानन्धरं च्यूताः प्वंकादिल ।
परिषद्या छ्याञ्जे राजित बहादुर श्रेष्ठं न्ह्याकादीगु ज्याझ्वलय् नेपालभाषाया माध्यमं ब्वंकेगु जगतसुन्दर ब्वनेकुथि, नेपालभाषा एकेडेमी, नेपालभाषा एफ एम थें जाःगु थीथी संस्था चाःगु हे लक्ष्मीदासया कुतलं जूगु खँ शताब्दीपुरुष जोशीं न्ह्यथनादिल ।
मानन्धरं थः फुगु ईलय् अझनं नेपालभाषाया थीथी संस्थायात फुगुचाःगु ग्वाहालि यायेत थः तयार दुगु खँ कँसे संस्थात माःकथंया न्ह्यज्यां वनेत इनाप यानादिल ।
बुखँ नेवाः सूचना केन्द्र, अमिर मैया रञ्जित