इन्फेरियर कम्प्लेक्सिटी !! (inferior complexity)

मथुरा सायमि

..इन्फेरियर कम्प्लेक्सिटी !!
(inferior complexity)
” बाखं दबू “या ज्याझ्वःकथं छन्हु स्वीम्हति साहित्यह्यमिपिं छपुचः बस जायक च्वनाः येय् नं पाल्पा तानसेनपाखे स्वयावना ।
थ्व ने.सं. 1132या खॅ ।
“बाखं दबू ” नेपाल भासाया छगू साहित्यिक संस्था खः । खासकथं बाखं साहित्यया प्रचार प्रसार लिसेलिसें नेवाः भायया उत्थान स्वनिगलय् जक मयासे जिल्ला जिल्ला गांगामय् नं वनाः फुफुकथं जागरण हयेगु भाषा थकायेगु हे थ्व दबूया मू तातुना खः ।
न्ह्यःनेच्वनाः थुगु रथ न्ह्याकादीपिं न्याम्ह महारथीत खः भाजु लक्ष्मण राजबंशी , राजा शाक्य , नरमदेश्वर प्रधान अले मयजुपिं निम्ह झी रीना बानिया व लोचनतारा तुलाधर ।
नयेत्वने यायां न्हिच्छि बसया सफर न्ह्यात । सन्याःइलय् पाल्पा तानसेन थ्यन । शाक्य सुरेन भाजुया ब्यवस्थापनय् थ्व ज्याझ्वः याउॅक न्यायेफुगु खः । पाल्पा मथ्यंनिपिं यक्व दु । छम्ह जि हे नं ।
अन थ्यनेवं पासा खलःया नायः भाजु छत्रराज शाक्यजुं लसकुस यानाः जिमित अनया महाचैत्य बिहारय् दुत यना बिज्यात । बहनीसिया नज्या धुनेव वयकःलिसे हे कन्हेकुन्हु जुइगु साहित्य मुॅज्या व हनाबना ज्याझ्वः गुकथं न्ह्याकेगुया बिषयस् सहलह ब्यात । द्यनेगु ब्यवस्था बिहारय् हे जुल । त्यानुगुलिं सकलें याकन हे लासाप्वालय् दुहाॅ वन ।
कन्हेकुन्हु फुकसिया ई न्ह्याःन्ह्याःपिं पासापिं पाल्पाया न्ह्याइपुगु गुॅ-पाहाः गयाः थतक्वत जुयाः चाःह्यूवना । नया त्वना । फोटो-फाटो कया । साहित्य सम्मेलनय् वना च्वना ला , पिकनिकय् चाहिला च्वना ला धयाथे जू । लसता व लुदंपहः सकसियां ख्वालय् भयभय ब्यू ।
नज्या धुनेव साहित्य गोष्ठि 12 बजेनिसें अन हे बिहारया बैठक क्वथाय् न्ह्यात । नेवाः वसतय् अतिकं हिसिदुम्ह मयजु छम्हसिनं ज्याझ्वः न्ह्याकादिल । वयकलं दुरूष्ट नेवाः भासं नवागु न्यनाः येय् नं वनापिं सकलें जिपिं पक्क हे जुल । मनू बांलाःगु नं उतिकं हे । नवायेसःगु नं उतिकं हे । वयकः मयजु जुयाच्वन , अर्चना शाक्य ।
न्ययेम्हति दी गोष्ठिइ । बच्छि पाल्पामित । न्हापां हनाबना ज्याझ्वः न्ह्यात । अनया हे नांजाःम्ह उपन्यासकार भाजु चिनियालाल बज्राचार्ययात हनेज्या याना थे थनं झाःपिनि प्रतिनिधि नायः भाजु लक्ष्मण राजबंशीजुयात नं उमिसं ससम्मानं हन । वातावरण च्वय् च्वय् कन । अले साहित्य सम्मेलनं बुलुहुॅ न्ह्यात ।
अनया भाजु मयजुपिसं थःथःगु लेख रचना बाचन यानादिल । थनं झाःपिसं नं ब्वनादिल । साहित्यया कालबिल जुयाच्वन । सम्मेलन उत्सुकतां जायाच्वन ।सभानायः छत्रराजजु । मू-पाहाॅ लक्ष्मण राजबंशीजु । जिनं छम्ह पाहां दबुली हे ।
सकलें सकलें नेवाःत खयाः नं अन सरकारी कर्मचारीपिं गैर नेवाःत निम्ह नं झायाच्वना दी । वयकःपिसं धयादी , “…नेपाल भाषा भनेको बुझ्छु तर बोल्न आउदैन ।” मुॅज्या नेवाः भाषं हे न्ह्यात लेख रचना नं फुक्क नेवाः भाययागु हे । वातावरण नेवाःपहलं हे न्ह्यानांच्वन।
सभानायः छत्रराजजुं ” पासाखलः ” पाल्पाय् नीस्वनागु व उकिं भाषा , साहित्य , संस्कृति कलात्यादी नेवाः परम्परा व सभ्यताकथं अन जिल्लाय् हना वया च्वनागु खॅ कनादिल । नेवाः नखःचखः हना, नेवाः संस्कृतिया नं जगेर्ना याना वयाच्वनागु खॅया जानकारी बियादिल । थनं वनापिं जिमिसं ततःसकं तारररर लापाथाना । वातावनण झन च्वय् च्वय् कन ।
अन च्वनाया उखेथुखे भचा चाःहिलाया , अन च्वंपिनिलिसे नतुसुतु ब्याकाया जितः नं साप हे प्रभाबित यात । सकलें मनूतसें नेवाःभाय् हे ल्हाःगु खना। नेवाः भाषाय् हे ध्यान तःगु खना । गुलि नं जिल्ला जिल्लाय् जि चाःहिला , मेथाय् उलि ख्वाः चमकं छायकि ” म नेवार हुॅ ” धायेत नं अन च्वंपिसं नेवाः भासं धाये मसः । नां जक नेवाः तर थ्व तानसेनय् वयाः थुल — थनच्वंपिं नेवाःतसें धाथें हे नेवाः नुगः घानाः म्वानाच्वंगु खत ।
सम्मेलन न्ह्यानांच्वन । गुलिसिनं नवात फुक्क नेवाः भाषं हे नवात । लेख नं फुक्क नेपाल भासाया हे । अन्त्यय् मूपाहाॅ दाजु लक्ष्मण राजबंशीया नुगः खॅ ब्वयेगु पाः वल । थःगु थासं दनालि वयकलं सभापतिया न्हायपं लिक्क वनाः न्यन, ” जिं छु भाषं नवाये ? ”
सभानायः भाजुं वयकःया न्ह्यसःया आशय थुल । अन खॅयत निम्ह नं दुगुलिं खॅय् भाषं नवाये ला कि धकाः न्यंगु खः व । नायः भाजुं याउॅक धैदिल , ” नेवाः भाषं हे नवाना दिसॅ दाइ , नेवाः भाषं हे ।”
मूपाहाॅ भाजुं अले नेवाः भाषं हे नवानादिल । निम्ह पाहाॅतसें नं छ्यों ल्हुकुल्हुकु संकाः न्यन ।लापा नं थात !!