छझा: – चिबाखं

रासा

सनिलय् । सिक्क तांन्व: । च्वना च्वने हे मफु । व क्वथां पिहांवल । क:सिइ वन । मेचय् फ्यतुल । पत्रिका ल्हातय् काल । ब्वनेत स्वल । मब्वं । खालि पुत्तुपुइकल । सुम्क च्वन ।
वया तिरिमय्जु न्ह्योने वल । वैत च्या हयाबिला धका: न्यन । व ननिमवासे फ्यतुनाच्वन । उघ्रिमय् वया ल्हातिइ पति च्वंवल । वं पतित दाया स्यानाबिल ।
व हानं क्वथाय् दुहांवल । पंखा चाहिकल । लासाय् थस:पाल । मिखा तिसिल । वया तुतिइ पतिं न्यात । वं प्यात्त दाल । पति सीत । व न्ह्यलंब्वात । द्यन ।
बाघौ लिपा , वया तिरिं वैत बेलि यायेत सत:वल । व मदंनि । वया म्हय् थिया थन । व थारान्हुल ।
दन । वं तंचाया कला:यात मिखां झ्वयेपिक स्वल । अले धाल – गज्यागु न्ह्यइपुस्सेच्वंक म्हगस खनाच्वनाबलय् ! छाये थनागु द: ? वया तिरिमय्जुं नवात – बेलि यायेम्वाला ? वं न्हिला-न्हिला धाल – छन्त चुप्पा नयेगु त्वता: नं जा नइला ! का वा , म्हगसय् नयेमखंगु चुप्पा ज्वलय् नये !
इपिं निम्ह क्वथाय् हे तिनि । आ:तक नं । बहनिया झिता: थाइन ।
**