सत्ता भर्ना – चिबाखं

किशोर धुस:

राजमान न्हिथंथें थौं नं झोला छपाःज्वना मर्निङ वाक वन । लिहाँवयेखतं बजारय् थ्यंका थतः ययःगु तरकारी ल्यया पुतुपुइका स्वयाच्वन । अबले ल्यायम्हचाम्ह छम्हेसिनं  नमस्कार साहुजी ! जितः म्हँसिउनिला ? न्हापा थें छ्येँ ज्यायाइम्ह मनू मानिसा जितः ज्याय् तयादिसँ  जि वहे गोविन्द का ! राजमान पलख बिचाः याना ए…अं अं अचानक छ थन गथे ? थन छुयाना च्वनागु ? विदेशय् वनां गुलिं लुँ सयके फैथें ताल काउलि छगः नं सयकेमफु । उकिं ल्याहाँवया थनहे तरकारी खेती याना  म्यू वया च्वना का साहुजी थिके धया न्याःहे मदु का…। जि न्हापाया ज्या सकतां लुमंनि, आःतक नं खेती ज्या सःनि । जितः छिथाय् हे ज्याय् तया बियादीसा ज्यु का साहुजी ! जि वलकि साहुजी या थथे पसः झाये न मालीमखु , छिगु थःगु हे क्यबचाय् तरकारी ज्वाँय् ज्वाँय् सै । छितः यक्व हे अःप्वीका ।
पलख आतां च्वनां राजमान साहु नं लिसः बी = जितः ज्यायाइपिं मनू म्वाःगुला मखु , आः छँहे अपायस्कं च्वने धासेंलि छक बिचाःयाये का । उघ्रिमय् गोविन्दं धाइ = बिचाः मखु साहुजी पक्का यानादिसँले , जि मेगु छुंहे ज्या मदु जि दुख जुयाच्वन धयां । हाकन राजमान धाइ = जि निम्ह कायपिं नं अष्ट्रेलियाय् दु  जिनं याकःचा जूगुलिं कायपिसं बाः उखे हे वा धया सताःहयेफु उकिं जक बिचा याये धयुका । अले जितः उखे सताःहलकि छँ जिथाय् त्वताःवनेमाली खँला जिं आहे धयातये ।  याकःचा धायवं गोविन्द उखे फस्वया छकः मुसुं न्हिलाः हाकन धाई- साहुजीं तयेमखु धाःगुजूसा जि ज्याहे दैमखु  साहुजी धन्य खः जय जुइमा धया कृतज्ञ भाव प्वंकी ! राजमानं धाइ = का का हानिचा ४ बजे थ्व ठेगानाय् वा धया कार्ड छकू बियाथकी ।  गोविन्दं = हस् साहुजी हस्  जि छिगु थाय् सिइकाः वये नि साहुजी । गोविन्द तस्कं लयलयताया नापं फ्येतुनाच्वंम्ह पासाम्हेसित धाइ = पासा थौं कन्हे याकःबाक च्वनांच्वंपिं नेवाःतयसं
झी थेंज्याःपिं पिनेयापिन्त बालं तयेगु त्वताः हःगुलिं ज्याय् च्वने तसकँ थाकुइ धुंकल । अएनं  जितः वयक साहूथाय ज्या चूलाःगुलिं धन्ना मन्त का । न्हापलाक वयकयाथाय् वनी वने , अले जिं साहुजीयात थथे यायेका धया स्युका ||