फुङ्लिङया पेट्रोल -चिबाखं

महर्जन रत्न

ताप्लेजुङया फुङ्लिङ बजारं लिहां वये त्यनागु । बाइकय् चिकं कम जुइधुंकल । पेट्रोल पम्प थ्यंकेत क्वय् थ्यंक वनेमानि ।
बजारय् थलय् तया: नं पेट्रोल मीगु या:खनिं थन । जि छगू त:धंगु पसलय् वना ।
साहु ग्राहकपिन्त खँ सयकुसयकुं सामान बियाच्वन ।
साहुनि थपायमछी ग्व:गु मोबाइलय् फेसबूक चले यायां
क्यालकुलेटर नं त्युत्युं हिसाब याना: धेबा बुझे याना: कया नं च्वन ।
जिं साहुनियात न्यना
– पेट्रोल दुलाथें ?
– दु ।
चिहाक: लिस: बिया: मोबाइलया मेसेन्जरय् बिजी जुल ।
जिं खनाच्वना साहुजी मेखे ब्यस्त । जिगु मोबाइलय् भाइब्रेशन जुल । डाटा अन जुयाच्वन खनिं ।
जिं पाइंतया म्हिचां मोबाइल लिकाया: स्वया । मेसेन्जरय् मेसेज वयाच्वंगु खनिं ।
– हाइ
– हेलो
जिं मेसेन्जरय् लिस: छ्वया । अले साहुनिपाखे स्वया: धया ,
– ५ गू लिटर तयाबियादिसंले !
साहुनि नं जित: मिखा ज्वय् पिया: थपाय्सकं स्वलकि मानौं जिं वैत तस्कं डिस्टब यानाच्वनागु दु ।
– ५ लिटर पेट्रोल तैब्यु ।
ज्या  ज्यायाइम्हेसित थुलि धया: वं मेसेन्जरय् फताफता टाइप यायेगु ज्या न्ह्याकल ।
–  अले छु दु छिगु न्हू प्रोजेक्ट ? जिमित नं फिल्मय् म्हितकेगु मखुला ?
जिं तीजक वं मखंक क्वथिइक स्वया , वंला जिगु अकाउन्टय् हे टाइप यानाच्वंगु खनिं ।
उब्लय् हे ज्या याइम्हसिनं ५ ग: एक / एक लिटरया पेट्रोलया बोटल ज्वना: वल । वं काचाकाचां क्यालकुलेटर तिल अले धाल,
– ५२५ तका ।
वया जित: अनं याकनं बिस्के छ्वये मास्ते व: ।
जिं धेबा बिया अले छक: वैत स्वया । व तम्वेका हाल,
– कयादिसं झासं गाडी जाम जुइधुंकल !
खनंख: फुङ्लिङ बजारया चिब्यागु लँय् तत:ग्व:गु मतरत हैच्वंगु दु । जाम मजुइगु नं गनं ।
जिगु मोबाइलय् भाइब्रेशन थितुंथिइक वयाच्वन ,
– झ्वांय् झ्वांय्
प्लास्टिकया ल: बोटलय् तयात:गु पेट्रोल पुसा चायेकु चायेकुं ट्यांकी प्वंका च्वना ।
जिं साउनियात छक: हाकनं हायकेथें स्वया । वया झन तं वल ।
मानौं जिं याना: वैगु मेसेजया लिस: वैच्वंगु मदुथें । मुसुक्क न्हिला: वैत स्वया: बाइक स्टार्ट याना । अले अनं वना ।
फुङ्लिङ बजारं क्वय् ताप्लेजुङ गेटय् क्वसं दुगु भिंतुना नेवारी खाजा घर धका: च्वयात:गु थासय् पिने बाइक दिका: दुहां वना ।अले बजी सेट अर्डर याना: मोबाइल चायका: स्वया: ।
– छि गन थें ?
– शुटिङय् ला ?
– जि नं अफिसय् बिजी धयां !
-छि तस्कं हे लुमना वइच्वन धयां !
– बिजी सा बिजी धयादीसा जि हे ज्यू नि ।
– गज्याम्ह धैगु नि छि ला !!
ओहो ,थुलि याकनं गुलि च्वये ला:गु वया ।
जि छु लिस:बिइ धका: बिचा यानाच्वना ।
थ्व इलय् मेगु भाइब्रेशन जुल । अर्थात न्हू मेसेज वल ।
– छि सिंगापुरय् गबलँय् झाइगु नं मखु । झायादिइसा चाहिकाबिइ धैगु ।
मेसेज स्वस्वं जि छु धाये छु धाये जुल । छु लिस: बिइगु बिचा: हे यायेमफुत धायेमफुत । न्हिला (smile) या छगू स्टिकर छ्वयाबिया ।
बजि सेट वल सवा: झीथाय् थें । बजि नया: पिहां वया ।
अले मेची राजमार्गया चलखं भुनाच्वंगु लँय् बाइक न्ह्याका ।
13 november 2015-Taplejung