निम्ह निम्ह लक्ष्मी !!

मथुरा सायमि

थौं लक्ष्मीपुजा । सकसिनं देबी लक्ष्मीयात पुज्याइ ।
नखःचखःया रूपरङ्ग जक पाइ , हलिमय् फुक्कभनं फुक्कसिनं थःथःगु संस्कृतिकथं थःथःगु चलनकथं नखःचखः हनी । नेपालय् नं सकलें सकलें धयाथें मनूत आध्यात्मिक। थःथःगु धर्म व परम्पराय् आस्था दुपिं । यक्व मध्ये छगू स्वन्ति हे खः सकसिनं मानय् याना वयाच्वंगु नखः । न्ह्याना वयाच्वंगु पर्व ।
ई बलबान । इलं पाका यनीबले सुयां छुं लगय् मजू । कोरोना भाइरसया प्रकोपं हलिं हे वाराक्वारा संका बिल । ल्वचं कःगु जक मखु , मनू हे लखौंलख स्याना बिल । सीपिं सित , म्वानाच्वंपिं गुकथं बचय् जुइफइ धका मनुखं लॅपु मालाच्वन । उकिं हे थ्वपाले गुलिं मनूतसें तीजक जक नखः हन सा , गुलिसिनं छुं हे मयासे थपक्क च्वन ।
छम्ह छम्ह मनू मेपिंलिसे बिस्कं बिस्कं पाः। वया जन-जीवन पाः । जिगु जीवन नं अथेहे । जिगु जीवनय् दुत वयाः जिलिसे ह्वनावंपिं जि निम्ह निम्ह जहान दु । दु खः, आः निम्हं मदु । सुं पत्याः मजुइ फु । तर ल्यनाच्वंगु सत्य थ्व हे खः । थ्व नखः उपिं निम्हसितं नं उलि हे यः। उलि हे मानय् याः । मानय् याना । न्हि झझ्झः धाः ,चा झझ्झः धाः ।
मेगु स्वयाः उप्वः तिरि कौसल्या थ्व स्वन्ति नखः धालकि हुरूक्क हे । दक्कय् तःजिगु नखः हे थ्व थें। पञ्चकया न्यान्हु वया लाः धयागु गबसं मदु । म्ह पुजा नं तःधं, किजा पुजा नं तःधं । तर व स्वयाः तःधंगु दिन धयागु वया लागी थ्व लक्ष्मी पुजा हे खः ।
थ्व नखः हनेत वया साप लिमलाः । बाःछि बाःछि न्ह्यवंनिसें वया ध्यान थुकी हे ध्यचुलाच्वनी । पुज्यायेत माःगु ज्वलंया छगू धलः हे दयेकी । गुलि न्ह्यवंनिसें हलंज्वलं मुनाच्वनी । छेय् दयेके ज्यूज्यूगु इताः जजंका फुक्क थम्हं हे लाःलाःबले कयाच्वनी । मदु मदुगु पिहाॅ वनाकथं धकाः बजारय् लूलूगु न्याना हयाच्वनी । दु मदुया ल्याः स्वया च्वनी । न्हूगु हासा छपाः , न्हूगु तुफि फछि, न्हूगु हे धकि छपाः अले न्हूगु हे दालाचा लिसें पालचा नं पुलांगु दनिसां न्हूगु हे मालाच्वनी । छु दत, छु मदुनि छताछता यानाः लुमंकाच्वनी । त्वःफ्यूगु छताबता जितः धाइ । जिं न्याना हया बी । अले व धुक्क च्वनी ।
लक्ष्मी पुजाया दिन । वया दॅसांनिसें लिलाइ मखुत । बॅ थिलेगुनिसें पिखालखु पुज्यानाः फुक्क च्वख याइ । धूधाः गनं छफुति खने दयेके मजिया च्वनी । थः मफु । मफुसां मफु मधासे व सनाजुइ । स्वामाः नं चिम्माः तम्माः हनाच्वनी । अले जि छम्ह बहनी च्याकेत झिलिमिलि मत मिलय् यानाच्वने ।
द्यः ख्युंख्युं धालकि पिखालखुंनिसें लक्ष्मीद्यःयाथाय् थ्यंक छस्वा जुइक मां-म्ह्याय् निम्हं बॅ थिलाः लक्ष्मीद्यः दुकायेगु ताः स्वयाच्वनी । पिखालखुइ मन्दः च्वयाः पाल्चा मत च्याकु च्याकुं थाहाॅ वइ सकलें । छेय् छखां प्यख्यरं मत तयाः पालचा च्याके । छेय् छखां झलमल जुयावइ । पिने न्यनांन्यने मजीक पतका मुइकाच्वंगु सः थ्वया वयाच्वनी । स्वःस्वःथाय् जःखः रंगिचंगि मत प्लालापिलि प्वालापिलि च्यानाच्वनी । लक्ष्मीद्यः बिज्याका च्वनी । जिमि नं लक्ष्मीद्यः पुज्याय् धुनीबले बाचा जाः थें जायाच्वनी ।
व मदुगु बि.सं. 2070 सालय् । जिमिगु जीवनय् मलखं कल । उबसांनिसें छेय् सनीपिं सुं मन्त । धाःपिं नं मन्त , हाःपिं नं मन्त । व मदयकाः छुं नखः नं जितः नखः थें मच्वन । अले नखः हे खःथें मखुथें जक हन । व नं करंबरं ।
थपाले नं मंमदु । कोरोनाया नं भय । सनाच्वने मखुत धयागु मतिइ । म्ह्याय् कामनाया लक्ष्मी पुजाया मत च्याकेगु खॅ पितहल । ज्यू याना । मस्तय् निंतिं मनं मखंसां संसार स्वयाच्वना । कामनाया फुलबत्ती दयकल । ल्वयक अले स्वां-सिन्हःया जोरजाम जिं याना । लक्ष्मीद्यः पुज्यायेत थिकथाक याना । नुगः ख्वखमख्व धाःसां ख्वालय् न्हिलासू हयाच्वना ।
सकसिनं सेफयच्वंम्ह लक्ष्मीयात पुज्याइ । जिगु ध्यान मेथाय् हे । जिं जिगु जीवनय् जितः थनाः धस्वाकावंपिं निम्ह निम्ह तिरि मयजुपिं रमा व कौसल्यापिं लुमंका । देवी लक्ष्मीं प्रभु नारायणयात याःगु सेवा स्वयाः नं उमिगु सामीप्यता जिके तच्वः । जिं उमित हे पुज्याना । स्वां छाया । सिन्हः तिका । मत बिया । जिम्ह निम्ह निम्ह लक्ष्मी !
थौं लक्ष्मी पुजा !!                                                               •••••