ग्याफरात ! – चिबाखं

रिता महर्जन

निम्हेसियां थौ नाप लायेगु ग्वसाः। निम्ह तसंक उत्सुक, नाप लाइबलय् छु खँ ल्हायेगु, गथे खँ ल्हायेगु?                          न्हय्ला दत इपिं नाप मला:गु । कोरोना वये न्ह्य: नाप लाःपिं कोरोनां याना: थौं तक बायाच्वन मन्जु व सुमन। उकिं थौं नाप लायेदयाः निम्ह तसकं लय्‌ताः। सुमनं धा:गु इलय् कफी क्याफे थ्यंकः वन मन्जु। मेबलय् नापं च्वनीपिं थौं म्हमस्यूपिं थें छगू छगू टेबुलय् च्वन।
कफी अर्डर यात। निम्हं न खँ ल्हात न म्हुतुइ च्वंगु मास्क हे लिकात। प्यंगः मिखा जक प्वाल्ल थिनाच्वंगु दु । कफी थ्यंकः वल । निम्हेसियां लातां केरा स्वये थें वंं वैत वं वैत जक स्वयाः च्वन ।  न मास्क  लिकात न कफी हे त्वन ।                        कफिं हिस्याना च्वन ।                                                  कफि गिलासतय् खँ जुयाच्वन  “न्हापालिपा कफि सछिक: चिप याना: त्वनीपिनि थौं म्हुतुइ च्वंगु मास्क तक लिकाये ग्यानाच्वन थुपिं । थुपिं थें मतिनामि ज्व: सु दइ ?”                                  ” अय् नं‌ का….स्व गुलि ग्याःगु थ्व एक कोषिय जीव खनाः ? कोरोनां ला तस्कं ख्यात खनिं थ्व मनूतय्‌त हा हा हा…..” निगू कफी कपया खँ जुयाच्वन ।
-“म्हाःल नु वनाछ्वये। थ:जागु कोरोनाया ग्याःचिकु दुबलय् ताउत पिने च्वने मज्यू ” मन्जुंं धाल ।
मन्जुया खँय् सुमन नं समर्थन बिल। यक्व ई लिपा नाप लानाः नं निम्हेसियां ल्हा ज्वना खँ ल्हाये मंदुसा ग्यानापुगु ल्वचं याना: छुं खँ मल्हासे न्ह्य:ने दुगु कफी तकं मत्वंसे अथें त्व:ताः थ:थ:गु लँ लिनावन ।                                                                          कफि गिलासतय् न्हिला पिहे मफुत !