परीक्षणया मिखा !!

मथुरा सायमि

ने.सं.१०८०दंँय् भाजु हितकर वीर सिंह अले सुरेन्द्र सिंहपिनिगु ग्वसालय् न्हापांगु अन्तर कलेज नेपाल भासा साहित्य सम्मेलन न्यात । थ्व सम्मेलन त्रिचन्द्र कलेजय् निन्हुयंकं न्यायेकाः क्वचाल । सम्मेलन भब्य रुपं न्ह्यात । नेपाल भासाया यक्व च्वमिपिं अन मुनेगु ज्या जुल । थःथवय् म्हस्यूतास्यू ब्यात । भाषा साहित्यया गतिबिधिया चर्चा नं जुल । आः वयाः व इतिहासया छपाना जूवन ।

उइलय् जि दरवार कलेज ताहाचःया छम्ह बिध्यार्थी । दॅयदसं छगू छगू कलेजं पाः फयाहयाः सम्मेलन न्यायेकेमाःगु । १०८१ या सम्मेलनया पाः जिमिसं कया हयागु । ज्यासना पुचः छगू स्वना । सम्मेलन न्यायेकेत भाषा व साहित्यय् रूचिदुपिं न्याम्हखुम्ह बिद्यार्थीत लगय् जुया । न्हूगु जोश व जाॅगर । जिमिसं थाकु मचाया ।

सम्मेलनया ई न्ह्यथ्यन । ज्याखॅ न्ह्याकां वना । बाखं , च्वखॅ व चिनाखॅया प्रतिस्पर्धा यानाः स्वम्हस्वम्हसित सिरपाः नं लःल्हाये माःगु । लेख मुना । कबिता परीक्षणया लागी ल्ययापिं नांजाःपिं निम्ह कबिबर भाजुपिं खः सिध्दिचरण श्रेष्ठ व केदारमान ” ब्यथित “।

पासा छम्ह ब्वनाः जि न्हापां ” ब्यथित ” जुया छेय् स्वयम्भु क्वय् वना । जिमिसं थःथःगु म्हसिका बिया । सम्मेलनया लागी दुथ्यंगु कबिताया परीक्षण यानाः स्वम्ह ल्ययाबीत इनाप याना । वयकलं फररर छकः कबिता फुक्क पुइकाः स्वयादिल । प्यन्हुत्वालं वा धकाः सःतल । कबिजुया च्या त्वनाच्वंगु ई । जिमित नं छगू छगू कप च्या हयाबिल । न्ह्यैपुल ।

धात्थें प्यन्हुत्वालं निम्हं जिपिं अन थ्यंकः वना । फ्यतुना । कबिताया फाइल न्ह्योने हयाः बस्वाय् थें यानाः कबिजु झ्वकय् जुल ,” छु कबिता धैगु का थ्व । ताल नि बाल । कलेज ब्वंपिं बिद्यार्थी हॅ । भचा ला स्तरियता दयेमाः। छपु हे ज्या लगय् मजू थ्व । कबिता हे मखु । अयनं , भाइपिं, थ्व स्वम्हसित ल्ययागु दु थन । छिकपिनि स्वयाः यानादिसॅ । ”
कबिजु हाःगु खनाः जिमि नुगः हे ख्वाउॅल । ननिमवासे फाइल कया । ” हवससा दाइ जिपिं वना हे छ्वये ” धाधां फहिला ।
छु छु न धाइ धकाः च्वनागु । जिमित ला तं जकं दिकाहल । ख्यूं ख्वालं निम्हं ल्याहाॅ वया । च्या छकः त्वंकी ला धयागु लोभ नं सुकू हे गन ।
मेम्ह परीक्षक खः भाजु सिध्दिचरण श्रेष्ठ । वयकःयाथाय् वने हे लःलः मधाल । वने हे माःगु । वना । न्हूसाः त्वालय् अनया छेय् । मातनय् वयकःया क्वथा । थःगु परिचय कना । परीक्षणया लागी कबिता ज्वना वयागु खॅ ब्याका । म्हाः मलाः धयामदी । निन्हुत्वालं सःतल ।
निम्हं पासापिं निन्हुत्वालं हे धाःबले वना । स्वाहाने गयाः थाहाॅ वना च्वनापिनि जिपिं निम्हसियां नुगः भाराभारा सं। आः थुम्ह कबिं नं छु छु जक धया हैगु खः धकाः मनय् ग्याःचिकु । न्हापायाम्ह थें हे मखा जागय् जुइगु जुइ । न्ह्यागु धाःसां सुंक ननिमवासे न्यनाः ल्याहाॅ वये माली का छु धकाः क्वःछिनाः वनागु ।
कबिजु क्वछुनाः छुं च्वयाच्वंगु । जिमित खनेवं क्वथाय् दुहाॅ वयेत सःतल । वनाः लिक्कसं चकतिचाय् प्यं दिकः वना ।

” भाइपिं कबिता काःझाःपिं हला ” कबिजुं खॅ पितहल ।
” हजू । स्वयादी धुन , दाइ ? ” जिं सः पिकया ।
फाइल अनसं हे दु खनी । पिकाल । कबिता छकः पुत्तुपुइकाः स्वयाः म्हुतु न्यायेकाहल ” गजब । कबिता गजब । गुलि बांलाःगु अय् । कलेजया मस्तसें च्वःगु हे धाये मल्वः। गुलि गहिराइ …. । गजागु कल्पना …। गजागु अभिब्यक्ति …। छपु छपु थे बांलाः कबिता । का , थ्व च्याम्हति दु थन । फुक्क फुक्कसित हे पुरस्कार ब्यूसां जिउ । ”
जिपिं निम्हं त्वलेहे कनाः कबिजुया स्याकुनःगु ख्वाः स्वयाच्वना । पक्क ।

जिमिसं मसिल — वास्तबय् कबिता बांलाःगु खः कि बांमलाःगु !!!