खिखांमुग:  

रासा

 व जापानय् वन । निदँ लिपा व लिहांवल । थन वयेधुंकालि वं जापानीतथें मेहनत यायेगु बिचा: यात । इपिंथें नयेगु / त्वनेगु / च्वनेगु / ज्या यायेगु / म्वायेगु स्वल , कुत: यात ।

वैगु जीवन झन् बांलात । सुथांलात । तर , वैगु छेँ / छेँज: / त्वा: / जलाखला / समाज / देय् दक्व गथे ख: अथे हे , छुं हिउपा: मदु । छन्हु व सुथ: न्हापां द्य:चाह्युवन । न्यासिववं व लँ दथुइ खिइ चुलुया दल । म्हछम्हं खि हे खि लात । वैत छु याये छु याये जुल । सतिक च्वंगु खुसिइ वना फोहर चाल । पलख फ्यतुल । तंम्वल ।

फ्यतुतुं वं बिचा: यात – माय्नच्वसा , थ्व व्यवस्थायात बँय् छ्वावायेतिनि जिं ! वया तं अझं क्वमलानि ।

न्ह्योनेसं माक:त तिंतिंन्हुया म्हिताच्वंगु लु स्वया व सुम्क फ्यतुनाच्वन । फ्यतुना हे च्वन ।