ग्व:फय् दुने -चिबाखं

सुरेन्द्रलाल भुजु
रीता श्रेष्ठले येंदेया यथे पुगेजूम्ह श्रेष्ठ परिवारया छम्ह म्ह्याय् मचा ।पढाइखय् तेज, बांनंला: । बिए पास नं जुल ।ब्याहा यायेत धा:व:पिं ग्वा:ग्वा: दु।मांबौया खथाय् जुथाय ज्या यानछ्वये दुसा ज्यू धायगु मनसुवा: ।तर रीता माने मजु ।एम ए ब्वने मानी धाल।रीताया समाज सेवाखय् विशेष रुची,सोसल सर्बिस बिषय कया:,युनिबर्सिटी भर्ना जुल।
एम ए ब्वंब्वं छगु एनजिओखय् ज्यायात। ज्या पिडित मिस्तयगु पक्ष अध्ययन यायेत जिल्ला जिल्लाय् बरोबर वने मालिगु। ज्यायायां आख: ब्वनेनं सिधल ।आ: मां बौयात त्वह तयेगु थाय् नं मन्त खानदानी धनी परिवारेनं खँ वथाय् ब्याहा: क्वजित: ।धुमधाम नक्सां ब्या: जुल।
जिबन सरलरूपं न्ह्याना च्वन।निखें ब्यबहारत नं बांलाक जुयाच्वन।रीताया ज्या धा:सा बरोबर जिल्लाय् गामय् गामय् थ्यंक प्याहां वनेमालिगु। गुबलँय् ला घन्टनं न्यासी वने मा:गु थाय् नं लाइगु । तर समाज सेवा रीताया पाय्सन ख: ,इनज्वय् यानच्वन। उखे रीताया छें धा:सा लछिया झिन्हु हे छें मथाइम्ह भम्चा धायथें छें पिलि व माजुया मन खुस्रुक्क जुया वल।गबलँय् ला वया निन्हु च्वने मलाबलय् हानं प्याहां वने मालिगु ।
छन्हु तराईया बिकट गामय् क्वस:गाक्क मह:गु त्वहलय् भौमचायात मचिकं लुना: छ्वयेकुगु घटना न अध्ययन यायेत रीता उखे वने माल।शहरं यक्व तापाना गोरू गाडाय् सुथ ब:छि च्वना:नं निघौ न्यसी वनेमाथाय् गामय् ।त्यानु नं तस्कं जुल नयेगु नं तालय् मलात अले हानं गामय् यापिं केश दुसुका छ्वयेगु पक्ष जुया गाउँल्यातयसं ग्वाहालि मयागुलिं नं तस्कं थाकुल । ज्या सिधयेका: ल्याहांवबलय् रीता बिरामी हे जुइथें जुल।सदरमुकाम थ्यंक वल नये नं मास्तीमव: निग:चा चिपं जक थिया: छें ल्याहां वल । छें लिबाक्क जक थ्यन ।
“जि छुं नये मखुत” धया: सने हे मफयेक व:म्ह व सरासर कोठाय् द्वहां वना: सिटामोल छचा नया: द्यन। छें ज:पिनि सरासर कोठाय् द्वहां वंबले मन पाउँकल।
भातम्हनं ज्याया झ्वलय् बिदेश वना छन्हु न्ह्य: जक ल्याहां व:गु जुया च्वन। कलाभा:त नाप मला:गु च्यान्हु झिन्हु दये धुंकुगु जुयाच्वन।भा:तम्हसिया उत्सुकता व मूड दयेका: क्वथाय् द्वहां वन।कला:म्ह स्याक्क न्ह्य: वयेका च्वन:।भात:म्हसिनं बुल्हुं ल्हा छ्वया घयेपुल ।
“थौं तस्क्कं त्यानुया च्वंगु दु प्लिज थौं मखु प्लिज” स्याक्क न्ह्यवयेकाच्वंम्ह रितां न्ह्यलय् थें धाल ।
भा:तम्ह खुरुक्क फस्वया: द्यन। थन्यागु घट्ना इमि न्हापा नं निक: प्यक:जुइधुंकुगु जुया च्वन।
* * *
छन्हु रीताया मिलय् जूम्ह छम्ह पासां मेसेन्जरय् “छिमि भा:तयाला पिने कला: दु धाथें च्वं”धका: च्वया हल।
“मखु सुनां धा:गु ” धका: पासायात ब्वबिया छ्वल वं ।
“जिंला बांलाक स्युगु मखु भैंसेपाटी कोलोनी तयात:गु दु हँ । जित: नं छम्ह पासां धा:गु न्यनागु । तर मिजंतयगु भर मदु होसया न्हिं !”धया च्वया हल
* * * *
छुँ दिन लिपा रीता छें दुबलय् रीताया भा:त छम्ह मेम्ह मिजंनापं वल।क्वथाय् निम्ह नापं दुहांवल।न्हुम्ह मनुयात फ्यतुका
” छि दिसं जि पलख तले छक वनावये धया: वन । मेम्ह मिजं फेतुल।
“छितला न्हापां गुबलें मखना श्रीमानया व आंकन छगु हे ज्या ख:ला?धका रीतां न्यन
“मखु ” धया व मिजं नं रीतायात मति मदुगु खं धाल –
“जि छि श्रीमानया कानून ब्याबसायी ख: ।छिम्ह श्रीमानं छिनापं दाइभोर्स चाहेजु छिगु खं छु दु ?छिगु माग छु छु दु?धयादिसं ताहाक्क सना मद्युसें सल्लाहयाना किनारा लगेयाना द्युसा अ:पुइ।”