मतीमलूगु !

कृष्णदास जोशी

उखे माःद्यः चुक। थुखे तःननि । दथुइ च्वंगु व ताहाः गल्ली। नां हे ख्युं गल्ली। ताहाकःगुलिं, न्हिनय् हे ख्युंख्युं धाः। जि वयेवने यायेगु लँपु हे व गल्ली । अथे हे व नं वहे गल्लिं वयेवने यायेमाम्ह। इलय् ब्यलय् वयातः ध्वदुक नापलाइ व हे गल्ली। जिं वयातः केहें थें भापियाः न्वतुइगु । खनं व जुलं ब्याः मजूनिम्ह,ल्यासेम्ह तिनि। जि जुलं कलाः मचाखाचा दुम्ह बाज्यः वंम्ह। दृष्टिकोण हे केहें जुइगु स्वभाविक खः।उकिं जिके म्वामदुगु मती छुं मलू। जिं न्वँतुइ,मैञा गन वनावया,म्हंफुला धकाः। वं नं वास्याक्क न्हिली, म्हंफु दाई, पसः वनावया धाइ। थथे हे कथं जक खः व व जिगु सम्बाद।
छन्हु सन्ध्या ई। द्यः ख्युं ख्युं धायेधुंकल। उखे व थुखेया मत च्याःगु जःलं लँ खनेदनि। जि व गल्ली या लँपुइ थ्यंमथ्यं दथुइ थ्यनेधुंकल। अथे हे व नं बिपरित दिसां व हे गल्ली या लँपुं वइच्वंगु ध्वदुक नापलात।जिं सदां थें मैञा गन वनां वया धकाः न्वतुइ मलाःनि बलय् मत फ्वाक्क स्यानाहल। गल्ली अन्धकार। वं ला छत्थुं चिल्लाय् दना: जिगु म्हय् कस्सिक्क घय्पुनाबिल।जि ला किंकर्तब्यबिमुढ। म्हछम्हं हसंमसं धायावल। मतीमलूथे हे जुल ।वयाये थ्वयाये मन्त। जिं थःतः संयम जुइगु कुतः याना ।छखे चिलेतः स्वया।वं ला कस्सिक हे घय्पुनां तलतिनि।जि नुगः भाराभारा मिन।छखें मनय् पाप नं लुयावल। जिं नं ज्वनेला ज्वनेला धैथें जुल।हानं मेखें जिगू नुगःद्यः नं धाल।मखु थ्व ज्या जिं यायेमज्यू। थुकीया लिच्वः जिं जिगू परिवार जक मखु, वया जिन्दगी नं स्यनी।जिं समाजय् ख्वाः गथे क्यने थें जुइ।भचा ख्युंगु मौकाया फाइदां यानां जिन्दगी हे ख्युंई।थथे हे स्वचय् यायां मत च्यात।
वं काचाक्क जितः त्वतल ।
वया ख्वाः ह्याउँसे च्वं, छुं धायेमफु !
जिं नं छुं न्वंवायेमफु !
निम्हं निखे स्वयाःवना ।