बांझम्ह मिसा -चिबाखं

ज्ञानीराजा मानन्धर

काय् बिनेसया इहिपा जूगु न्यादँ तक नं छय् या ख्वा: स्वये मखंगुलिं भौ तरलायात सह: हे याइमखु माजु सुमनां । त्वालय्  चुकय् जलाखलात नापलातकि ला सकसित धा: जुइगु कि
” व हेरामाइचां गुजा:म्ह मिसा छम्ह लाका ब्यूगु जिम्ह काय् यात । न्यादं दतं नं मचा छम्ह हे बुइका: नये मफुम्ह , बांझ । गुजा:गु साइतय् दुकाये लात व अलक्षिना मिसायात । ”
माजुया पहलं भौ तरला सदां दुखि । मिखां ख्वबि मखु , हि हायेका म्वानाच्वन ।
सुमनाया म्ह्याय् बियाछ्व:गु नं न्यादं हे दत । वया छेँय् नं वया माजुं वयात सह: हे मया: । माजुं जक मखसें भा:तं तक हे ब्व:बिगु , दाइगु ।
छन्हु सुथ न्हापनं थ:छेँ व:म्ह शितलायात खंबलय् सुमना अजू चाल । मनय् धौ बजि वायेका: न्यन
” छु जुल मैयां , छाय् सुथंनिसें ? भाजु नं झायादीगु दु कि ?” धया: उखेथुखे मिखा ब्वल ।
म्ह्याय् शितलां ख्वख्वं धाल
” जि याक:चा वयागु । जि ला वो छेँय् पला: हे त:वने मखुत मां ।” धया: ह्वाँय् ह्वाँय् ख्व:गु खना: मांम्ह ”
छाय् अथे धैगु पुता । ”
शितलां मांम्हेसित थ:गु दु:ख प्वंकल
” जिं उमित मचा छम्ह हे बी मफत ……..।
मेगु छुं न्यनेगु शक्ति हे मन्त सुमनाया । याग्ला प्याग्ला हे वन । वं फुक्कं खं थुइकल, अलय् निर्दोषम्ह थ: भौ तरलाया ख्वा: छक: स्वल । म्ह्याय् शितलाया ख्वा: छक: स्वल । निम्हेस्या ख्वा: ज्व: ला:गु थें तायेकल ।                                                              •••