सुभाय् पोस्ट चिबाखं प्रकाशन ११४०/४१ या झिन्हु 10 Days

सुभाय् पोस्ट नेपाल भाषा चिबाखं प्रकाशन यायेगु झ्वलय् थौं तक झिम्ह न्हू-पुलांपिं चिबाखं च्वमिपिनिगु चिबाखं प्रकाशन यायेगु ज्या जुल ।
चिबाखं प्रकाशनय् न:लिपिं च्वमिनिसें नेपाल भाषा साहित्य ख्यलय् अतिकं च्वय् या स्तर तक थाय् दयेकेत ता:लाये धुंकूपिं च्वमिपिसं नं ब्वति कयादिया: प्रकाशनया ज्याझ्व: तालाकेत ग्वाहलि यानादीगुलिं चिबाखं प्रकाशन ज:यात त:धंगु ह:पा जूवंगु दु । वयकपिं सकलें सुभाय् या पात्रपिं ख: ।
थुपालय् न:लिम्ह चिबाखंमि रिता महर्जनया समसामयिक चिबाखं “भ्वाथलय् स्वथनात:गु लुं या असर्फी” न्हापांगु न्हि (Day 1 )स प्रकाशित यानागु ख: धा:सा थौं झिन्हु           (Day 10)खुन्हु दिव्या ताम्राकारया “मर्नीङवाक ” प्रकाशित जूगु जुल ।
अथे हे निन्हु (day 2) खुन्हु नांजा:म्ह च्वमि सौरव शाक्यया ” आज्जु मखंगु लँ” स्वन्हु (day 3 )स चिबाखं ख्य:या स्यला:म्ह च्वमि ध्रुव मधिकर्मीया ” लुंया संसार” ,प्यन्हु (day 4 )खुन्हु चिबाखं च्वमि माणिक उराय् या “भुखाय्” व न्यान्हु (day 5)खुन्हु पुलांम्ह चिबाखंमि नरेश अमात्यया चिबाखं “लाकांया संवाद” पिहांव:गु ख: ।
थुकथं न्हियान्हिथं चिबाखं प्रकाशित जुयाच्वबलय् च्वमि अले ब्वमि निखलसित नं थुगु सुभाय् पोस्ट चिबाखं प्रकाशन ११५०/४१ सं म्ह्वचा इलय् छगू सकारात्मक सन्देश बीत ता:लागु नं खनेदत ।
अनंलि खुन्हु (day 6 )स लोकंह्वाम्ह चिबाखंमि
रासाया चिबाखं “ल्वय्” पिहांवल । थ्व दिनय् प्रकाशन यायेगु झ्वलय् नामय् भचा गल्ती जूवन । थुकिइ जिमिसं क्षमा फ्वंसें द्वंगु खँ भिंकेज्या यायेगु ज्या जुल ।
थ्वधुंका: न्हयन्हु (day 7 )स नेपाल भाषा साहित्य ख्य:या हनेबहम्ह साहित्यकार मथुरा सायमिया चिबाखं:” न्हिले ला ख्वयेला” पिथनेगु ह्वता चूलात । थुकियात प्रकाशन पुचलं गौरव तायेकुगु दु । अथे हे च्यान्हु (day 8 )खुन्हु नेदरल्यान्ड च्वना: नं नेवा:तय् नितिं सक्रिय जुयाच्वनादीम्ह पुलांम्ह बाखं च्वमि श्रीलक्ष्मी श्रेष्ठया चिबाखं “मुल्याहा बाज्याया फुर्ति” पिथनेगु ज्या जुल ।
खुन्हुया दिनय् नां द्वंगुया खँय् गुन्हु (day 9 )स नेपाल भाषाया न्हापांम्ह जासुसी उपन्यास च्वमि राज सायमीया इलंहा:गु
चिबाखं: “थ:छेँय् या सिन्ह:” प्रकाशित जुल धा:सा थौं प्रकाशनया झिन्हु (day 10)स दिव्या ताम्राकारया “मर्निङ वाक” चिबाखं पिथने खन ।
थुकथं सुभाय् पोस्ट चिबाखं प्रकाशनया थौं झिन्हु थ्यन । झिन्हु दुने नकतिनि ताय्तिइ यायेत स्वयाच्वंम्ह चिबाखंमिलिसें वरिष्ठ साहित्यकारपिनि चिबाखं तक प्रकाशित याये खन । थ्व लसताया खँ जु हे जुल ।
यक्व च्वमिपिनिगु थीथी सवा:या चिबाखं दुहां वयेगु ज्या जुयाच्वंगु दु । थ्व क्रम निरन्तर न्ह्याना हे च्वनी धैगु भलसा काये अले क्रमवद्ध रुपं चिबाखं प्रकाशन नं याना यंकेगु व लिपा उकियात सम्मान यायेगु ज्याझ्व: नं यायेगु जुइ ।
सदां सकल ब्वंमि-च्वमि भाजु मयजुपिनि ग्वाहालि दयाच्वनी धैगु भलसा काये !