आत्म-ज्ञान !!

मथुरा सायमि

मनू ह्याउॅमचाया रुपय् जन्म जुइ । बुइत हे वया म्हय् आत्मा दुबी धुंकी । व छम्ह प्राणी जुइ । बुलुहुॅ बुलुहुॅ तःधी जुयावइ । ल्यायम्ह ल्यासे जुइ , बुढाबुढि जुइ। वया म्हय् प्राण दयाच्वंतले आत्मा नं वयाके हे घानाच्वनी । जब प्राण वया म्हं स्वब्याना वनी , आत्मा नं अले खने मदयक दुसुना वनी ।

सी धुनेव वया आत्मा गन वनी ? गन च्वनी ?

थ्व सुनानं धाये मफुनि। खःगु व भिंगु ज्या याःसा व स्वर्ग वनी , मखुगु व मभिंगु ज्या याःसा नरक वनी धयागु पुलांगु मानसिकता यक्व मनूया नुगलय् ब्वलनाच्वंगु आःतक्कं द हे दनि ।
स्वर्ग गन दु ले सा ? नरक गन दु ले सा ? न्ह्यसः लुयावइ । धाइ , स्वर्ग च्वय् दु अले नरक / पाःताः क्वय् दु । बिज्ञानं ला अथे मधाः । पृथ्बीया च्वय् छुं मदु केवल शून्यता जक दु । अले थनं क्वय् नं नरक धयागु छुं मदु । चा दु , लः दु ,फि दु ,त्याफि दु ।अनं क्वय् मेगु छुं मदु । उकिं जिगु पर-ब्रम्हं जितः न्ह्याबलें थथे धयाच्वनी — थ्व स्वर्ग व नर्क धैगु मनूया काल्पनिक संसार खः, गुगु गनं हे छुं मदु ।अले सीधुंकाः छिकीगु व बैतरणी नदि/ खुसिचा नं मनूया कल्पनां स्वनातःगु खुसिचा जक खः गन गबलें लः धयागु हे मुंगु मदु ।

म्वानाच्वॅतले मनूयात सकतां माः । सकलें माः । जःपरिवार माः । त्वाःबाः माः। उमिलिसे भ्यलय् पुनाः न्ह्याःवने माः । मखुसा व समाजय् च्वने छुइमखु । समाजया नियम हाचांगायाः वनेत वं संघर्ष याये मानि । उकिं बाध्य जुयाः बेक्वःगु सीक सीक नं तप्यं धकाः उमि लिसेलिसे जुइगु करं क्यनी । जि म्वानाच्वना उकथं हे । लः वंवंथाय् न्ह्यानाच्वना थः नं ।

ब्वा मदुगु बि.सं. २०५० सालपाखे । नीति नियमय् च्वनाः बिधि-ब्यबहार हना । परम्परागत धर्म-कर्म पाचिनाः माःगु इलय् माःकथं दान-दक्षिणा लःल्हाना । स्वर्ग मदु धयाच्वनासां स्वर्गीय चितासू लुइमा धकाः फ्वनाच्वना । दकिला मफूतले लयलयपतिं छकः छकः यायेमाःगु सराध्द नं गुरूबाज्याया हे दिशा-निर्देशकथं अनं धाःधाःथे याना वयाच्वना ।
सराध्द गबलें खुसी याःवना सा, गबलें छेय् हे। नीति-नियमयात हाचां मगाया । गुरूजुं थया बिज्याइ ” लयलयपतिं छता छता अलग्ग दान यायेमाः पित्रृयात । गबलें कुसा छपाः। गबलें निगू मिटर कापः, गबलें आंखोरा छगः सा गबलें छु । थुकथं ज्या-खॅ न्ह्यानांच्वन ।

छकःया पालय् गुरूबाज्यां धयाबिज्यात, ” मथरा, मेगु तिथिइ छं लाकां छजु दान यायेगु , सिलला ? ”
” गुरूबाज्यां धया बिज्यात । सिल । जिउ जिं न्याना हये। कापःलाकां मखुला ? कि चप्पल-चिप्पल? ” नागःतुगः याये थे जूवन जिगु न्ह्यसः ।
” ई , गन चप्पल-चिप्पल।लाकां धया लाकां ।भचा बल्लाःगु कै हिॅ ” गुरूजुं ध्वाथुइका बिज्यात ।
” हस् गुरूबाज्या , जिं लुमंक न्याना हयातये ”
” पाॅच नम्बरया न्याना हिॅ खंला । ”
गुरूजुया थ्व खॅ न्यनाः जिगु नुगलं मधाल । सुंक च्वने मफुत । धया ” मखु गुरूबाः लाकां ब्वायात दान यायेगु खः । वया न्ह्यायेत । वया तुति तप्पा । ८ नम्बरया माः ब्वायात लाकां । ५ नम्बरया ला ज्या हे मदु ।” जिगु म्हुतुं मचायक हे थथे खिजय् याये थे जूवन ।
जुरुजुं जितः त्वलेहे जक कनाः स्वत। ननिमवात ।मनय् तं ।

लच्छि लिपा । श्राध्द छेय् हे याना । फुक्क न्हापा लिपा थे हे न्ह्यात । दक्षिणा नं बीधुन ।
” ग्व, लाकां ग्व ” गुरूजुं न्यन ।
” म्हिगः शनिवाः । पसः फुकं मचाः । चाःथाय् छथाय् निथाय् स्वया । पाॅच नम्बरया गनं हे मदु । जिं ला ८ नम्बरया हे कैहया गुरूबाज्या । ब्वायात माःगु नं तजुगु हे । चिप्पागु बियां नं मजिल ।मखुला गुरूबाज्या? ” धाधां जिं प्वःचिनातैगु लाकामय् दां छगः तयाः लःल्हाना ।
गुरुजुं पाउॅख्वाः ज्यानाः दान फयाकाल । पाठ ब्वन । छुं हे ननि मवात । लाकां ध्याक्व लिकल । पलखं मजावं प्वः छकः फ्यनाः स्वत । लाकां ला तजुगु मखु खनी । थिक्क पाॅच नम्बरया थःत न्ह्यायेत पायछिगु लाकां हे जुयाच्वन ।
” लाकां थिक जुइला गुरूबाज्या? ” जिं न्यना ।
मुसुकाः ख्वालं गुरूजुया म्हुतुप्वाः सन , ” म्वाःसां हायेकाच्वंगु का , थ्व मथरां । ख्याः यायेमाःम्ह मनू । का जिल का, जय जुइमा सकलसियां । ”
व दंग जुल । जिमि नं मन च्वन !!!