लुंया संसारय्

ध्रुव मधिकर्मी                                                                 

छेँय् बौनापं कचवं जुगुलिं राम कला: ज्वना: पिहांवया डेराय् च्वंव:गु खः । वया नकतिनि जक ब्याहा जूगु ।
राम कलानापं छन्हु चाहुलाच्वंगु । चाह्यु ह्युह्युं उपिं गुँया लिक्क थ्यन । उबले लाक्क रामसीता निम्हसिनं लुँयाम्ह चलां खन ।
ओहो ! गपाय्सकं बांलाम्ह चलां ।
लुँयाम्ह चलां ज्वनेफुसा वया भाग्य हे हिली । मेगु छुं हे यायेमाली मखु । डेराय् न च्वनेमाली मखु ।
उमिसं बिचा: यात । अले राम सीतायात डेराय् त्व:ता लुँयाम्ह चलां ज्वनेत पिहांवन ।
राम लुँयाम्ह चला ज्वनेत ल्युल्यु वन । चलां गुबलें उखे गबलें थुखे तितिंन्हुया ब्वाँय् जुल । राम चलांया ल्युल्यु ब्वाँय् ब्वाँय् जुल । गुलि कुतः यानानं ज्वनेमफुसेंलि रामं घाँय् छम्हु ज्वना चलांयात क्यना सतल ।
चलां रामया ल्हातय् च्वंगु घाँय्यात मस्व । व तिंतिंन्हुया बिस्युं बिस्युं जुल । राम धाःसा वया ल्युल्यु ज्वनेत मदिक्क जुयाच्वन ।
चलां बिस्यु बिस्युं जुया गुँइ दुहाँवन । वयात ज्वनेत राम नं ल्युल्यु वन । गुइँ दुने थ्यनेवं अन रामं तधिक चिधिक अनेतनेयापिं झंग व जन्तुत खन ।
उमित खना व झन अजु चाल । अन वं खंपि किसी, सल, खराचा, धुँ , भालु, धों, झंग दक्व दक्व हे लुँयापिं । आः राम चलां जक मखु न्ह्याम्हसित न ज्वनेत गबलें किसीया ल्युसा गबलें सलया ल्यु ब्वाँय् ब्वाँय् जुल ।
ब्वाँय् ब्वाँय् जुजुं राम लुँया संसारय् तन ।
००