सफू-कुथिया निम्ह कीचात !!

मथुरा सायमि

बि.सं . २०१८ सालय् बी.य. पास यानासां जिं २०२५ सालय् तिनि यम.य. जाॅच बीखन । थ्व न्हयदॅ बिश्व बिद्यालये नं ब्वं वना, स्कूल स्कूलय् नं ब्वंकः वना । नेपाल युवक शिक्षालयया संस्थापक शिक्षक अले शान्ति शिक्षा मन्दिरया नं प्रधानाध्यापक। उलि जक मखु उगु इलय् अंग्रेजी ट्यूशन ब्वंकेगु ज्या नं दिपाः मकासे याना । थायमदु त्वाःया भाजु गंभिरमान मास्के व जि निम्ह येय् ब्वंकेगु ज्याय् तसकं नांजाःपिं। जा नयेत फुर्फद मदुपिं ।
थथे मायबिलिचां त्यप घयेपुइ थे सना जुयागुलिं बिश्व बिद्यालये उलि ध्यान बी मफुत । लाःबले वन , मलाःबले मवन । न्ह्याःबले वन , म्हाःबले मवन । राम-राज्य ।
धायेबले मछालापु , युनिभर्सितिया बिद्यार्थी धकाः ब्वना च्वनागु इलय् पाठ्य सफू तक नं फुक्क न्यानागु मदु । पुस्तकालयें हल , छकः स्वल हानं बी यन। बास्तबय् जाॅच खनाः मग्याःगु । सफू ब्वनाः पास जुइगु ला न्ह्याम्हस्यां याइ , ब्वॅ हे मब्वॅसे पास यायेगु सकाः बहादुरी। बिचाः अजागु ।
ब्वंकः झाइपिं प्राध्यापक भाजुपिं नेपालीत नं दु , भारतीय प्रोफेसरत नं दु। थःथःगु बिषये सकलें निपुण। व झ्वलय् म्हस्यूम्ह धयाम्ह छम्ह डा. कमलप्रकाश मल्ल। नाप लाइबले कमलदाइ जक धायेगु । वयकलं जितः म्हस्यू। शैक्षिक ख्यलं मखु , साहित्यिक ख्यलं । नेपाल भासाया छम्ह च्वमि , छम्ह बाखंमि धकाः वयकलं दः बांलाक म्हस्यू । अले जिं नं वयकःयात छम्ह तसकं स्याचुम्ह समालोचक धकाः म्हस्यू । सभा सम्मेलनय् नं खॅ ब्याः ।
छन्हु नापलायेगु खॅ जुल । जि अनयाथाय् थायमदु छेय् वना । मु-लुखां दुहाॅ वनेसाथ चुकचा । जवपाखे स्वाहाने । पुलां छेय्। स्वाहाने गये सिधयवं मातनय् वयकःया क्वथा। व बैठक क्वथा धायेला, सफू-कुथि धायेला । क्वथा दन्न च्वं । यचुपिचु । धू छफुति गनं खने मदु ।मेगु स्वयाः अन तजागु व चिजागु सफू-रायक दु । उकी जायक तन्न सफू ब्वयातःगु दु। फुक्क फुक्क हे अंग्रेजी भायया सफू ख्वाः वः। द्वलंद्वः हे सफू जुइला । उबले छु छु खॅ ल्हाना । ल्वःमन । जिगु ध्यान केवल व सफुती जक वनाच्वन ।
” अहो ! थ्व गुलिमछि सफू कमलदाइया ” धकाः जिगु म्हुतुं अजूचाः सः पिज्वयाच्वनी । मुसुमुसु न्हिलाः वयकलं धयादी , ” थन मन्ह्यंगु तले दनि , मथुराजी । ”
जि वाताहाॅ वयकःयात स्वयाच्वने ।
वयकःया थासं लिहाॅ वसांनिसें जिगु न्ह्यपु थासय् मलात । उलिउलिमछि सफू ब्वनातःम्ह छम्ह बिध्वान । उकिं वयाके भाय् नं वः अले ब्वंके नं सः । थःत माःमाःगु सफू न्ह्यःने पुइकाः उकी स्वस्वं क्लाश कयादीत। छघौ वयकःया लेक्चर न्यनेबले स्वपाना प्यपाना कापी नोट-डाउन जुइ। नेपालय् अंग्रेजी बांलाक वःपिं मध्ये छम्ह थ्व नं खः धया थे जुइ ।
मेतां मखु , व कमलदाइ लॅ दापा यानाः जिगु क्वथाय् दुहाॅ वइ धयाथे जिगु ग्याःचिकु । यम.य.या बिद्यार्थी जुयाच्वना । ब्वनेमाःगु पाठ्यसफू हे फुक्कं थःके मदु । स्यूसा छु धाइगु जुइ वं । पासजूसा क्याम्पस क्याम्पसय् ब्वंकः वनीम्ह काजी । सफू कां , मनू ध्वां ।
वयकःयाथाय् खनागु व सफू-पॅ जिगु न्ह्यपुइ न्हिंचां फनफन चाहिलाच्वन । छम्ह बिध्वानं धयातःगु छगू धापू नं लुमंसेवल … wear your old coat but buy new books .
जि सुंक च्वने मफुत । भोटाहिती रत्न पुस्तक भण्डार सफू पसः दु । अनया मालिक रत्नदाइ । म्हस्यू । कुने पसः , तले धुकू । जि न्ह्याथाय् वंसां जिउ । जिं थःत माःमाःगु , थःके मदुमदुगु सफू मात्तुमां ल्यत्तुल्यया हया। न्हीन्ही धया थे छरू अन दुस्वयेगु । प्यंगू न्यागू सफू ल्यया हयेगु । पाठ्य सफू जक मखु , अंग्रेजी साहित्यया लूलूगु , थःत ज्याय् ख्यले दइ थजागु सफू खनकि मत्वःता ।स्वला प्यलाया दुने जिं थःगु क्वथाया दराज सफुलिं जायेका। सफू खचाखच जुल । जिगु क्वथाखंपिं दक्वसिनं पुस्तकालय हे जुल धाल। मतिं मतिं धया — आः कमलदाइ छकः दुहाॅ वयाः स्वः वा रे ।
यम.य. या फाइनल यर । जिगु सफूकुथिया खॅ सुनां सुनां क्लाशय् बयबय् यानाबिल । गुलिं छेय् वया हे स्वःवल । जिगु सफूया चर्चा प्यख्यरं जुल । सफू सुयातं बिया मछ्वया । वास्तबय् न्याब्वय् छब्व जक नं सफू जिं पुइकाः स्वयेधुन धयागु मदुनि ।
दच्छि लिपा छम्ह पासा द्वारिकाजु सफू छकः स्वये धकाः जिथाय् झाल । जाॅच बीगु धाल। सफू ल्यल्यं वं २३गू सफू अलग्ग तल , ” मथुराजी , म यति किताब अहिले लान्छु । जम्मै फर्काउछु ” धकाः भ्वं छपातय् दक्व सफूया नां-धलः च्वत । जि वाताहाॅ । मन ख्वाउसे च्वन । सफूया नां नं दु, वं सहि यानाथकूगु भ्वं नं दु । उकिं जि धुक्क । न्ययदॅ फुत। वं सफू आःतलें लित बी महः । आः ला गनं खंसां मनू हे म्हसी मखुत ।
वं सके थ्व खॅ लुमंकल जुइ — सफू त्यायेबीम्ह मूर्ख खः । अले त्याना यनेधुंगु सफू लित बी हैम्ह झं पट-मूर्ख !!!