लक्ष्मीद्यःया परसात !!

मथुरा सायमि

बि.सं. 2002 साल पाखे । जि
खुदॅति दुम्ह मचा । मां-बौया प्यम्ह मस्तय् जि दक्कय् तःधीम्ह । भचा स्यूम्ह थूम्ह अले छेय् ज्या नं मालीबले भचाभचा यानाबी फुम्ह । ताकातुकु न्यायेत गबलें पिनेतक्क पसं नं वनाबी । मेगु मखुसां मांया ज्याय् लिमलाना च्वनीबले किजा क्यहेचापिं सां म्हितकाः च्वनेफुम्ह । मचा पाछायेकाः म्हय् स्वत्ताक जनिखं चिनाबी जितः । अले पिने चुकय् मचा छम्ह बुयाः नं जि म्हितः वनेगु , गुलिगुलि ।

मां-अबुया क्वथाय् जिपिं सकलें । मस्त प्यम्ह नं जिपिं झ्वःलिं अन हे देनेगु । बैठक धयागु नं व हे । छम्हनिम्ह द्यःपिनिगु किपा अंगलय् दु । दराज दु । अंगःघडि दु । न्हायकं दु । अन हे छकुने सेफ छगः नं दु ,चिक्चाग्वःगु । सच्छि दामं न्याना हैगु धकाः ब्वां खॅ कना च्वनीगु ।
छताबता छुं न्याये मालकि मामं जितः पसः छ्वइ । पसः वनेत भचा भचा चाःचू धिबा दराजय् छगः पंया बांलासेच्वंक दयकातःगु बत्ताचाय् तयातइ । जिं मचाबलेनिसें खं । फ्वंसां बीमखु । थःत मालकि छगःनिगः धिबा मसीक कायेगु । पिने लाःलाःगु न्यानाः नः वनेगु । गबलें “धिबा कया ला छं ? “धकाः मामं न्यनी । कया गबलें मधया ।

मेबले स्वयाः नखःचखः वलकि सकसियां छेय् झझःधाइ । बांबिंलाकी । नसा-त्वॅसा नं ज्वरय् याइ । भ्वय् न्याइ । सकसितं न्ह्याइपु । मोहनी वइ , भुतिमालि ब्वइ । धारमय् स्वन्ति वइ । दः स्वन्ति वइगु मोहनी स्वयाः यः ।
पंचक ।सुथ न्हापनंनिसें जू च्वयेकः वइ , बाजनं थानाः। को-पुजांनिसें जू म्हिती , म्हितकी । अले कानुनी रूपं जू म्हितूसां जिल । थ्व नखःजःछि किजापुजा तक्क न्ह्याइ । लॅय् लॅय् छिंछिंथाय् , तिन्ख्यलय् ला झ्वःलिं हे कौ ह्वायेगु खायल तइ । जू म्हितकी । लङ्गुर बुर्जा खः मस्तयत । जि नं सुथंनिसें लङ्गुर बुर्जाय् भुनाच्वने । गबलें भचाभचा धिबा म्हिचाय् दइ , गब्लें दुगु फुकं सुचुइ ।

लक्ष्मीपुजाकुन्हु मांया इपांथिपां मसीक लिमलाना च्वनी । प्यता घासाया भ्वय् नं ज्वरय् याइ। नये, त्वने । न्हि वं चाइमखु । बहनी झन न्ह्याइपु । दनादन मत च्याकी । पाल्चां च्याकी। लक्ष्मीद्यः पुज्यायेगु ज्या नं जुइ । सेफय् स्वनातःम्ह लक्ष्मीद्यःया किपाय् पुजा याइ । मरिचरिं छाइ । जिपिं मस्तयत नं झ्वःलिं जाकिं पुज्याकाः द्यः भागि याकी ।

सेफ दुने लक्ष्मीद्यःया किपा जवंखवं नितक्कि कम्पनी ( भारतीय धिबा) द्यःयात छानातःगुली जिगु मिखा वन । व गबलें क्वकाइगु धिबा मखु । गुलि वंगु । गय् खः मस्यू । जिगु ध्यान व दामय् तक्यन । छगू क्वकाये दु सा गुलि जिउ ।
खुॅया खुइता बुध्दि । सेफय् निथाय् ताःचा दुछ्वयाः चायेके धुनकि हाण्डल सनी। चाली । छगू मेगु नं ताःफ्वः ग्वयातःगु दु । सेफ चायेके अःपु मजू । स्वजु स्वजु ताः चायेकातिनि खापा चाली । जिं थ्व फुक्क सीका । ताःचा नं सकसिनं खंक दराजय् तानातःगु नकिनय् जक खाइगु ।

छन्हु ह्वःताः चूलाःबले सुं मदुगु इलय् मन भाराभारा मिंसां काचकाचां ताः चायेका । कम्पनी छगू स्वहायेकाकथं खापाखिपा ध्याम्म तिनाः ताःचाप्वाॅय् नं थासय् तयाबिया । अहो! तुइसेच्वंगु पाॅयमो छमो । देशी धिबा । गुलिवंगु थे । मन ध्वाकाध्वाका सनाच्वंसां तसकं अचम्म । आः छु यायेगु थ्व ?
पिने पसलय् गनं मकाः । भारतयागु छतकावंगु डबल धकाः सिल । थ्व हिलेत असनय् कि वंघलय् वनेमाः थाल । धात्थें असनय् ह्यूवना । डबल पुत्तुपुइकाः पसल्यां स्वत अले न्यना,” गन कैहैगु , बाउ ? ”
जिं धया, ” जिम्ब्वां हिलेत बियाहःगु ।”
पसल्यां नेपाली दां छतका व स्वाःना धिबा बिल । कयाकिया काचकिचां छेय् वया । न्यागः धिबा जक दःसां हे साःसाः भिंभिं न्याना नयेत गाइगु । आःला भ्वय् हे न्याइगु जुल । व धिबां छु छु छतांबेस न्यानाः नया , धाये हे मसल । जिगु ला म्हुतु हे साःम्हुतु जुल । नःलिसे फुत । च्यान्हु झिन्हुयात घ्यःधक्काः तये फत ।

बानि स्यन । फुत फुत कि सेफ चायेकाः छगू छगू कम्पनी क्वकयाः मोज याये सयावन । निगू कम्पनी नं छकलं क्वमकया । फुइ धकाः ग्याः । छगू छगू यायां माल मालकि लिकायेगु । प्यला न्यालाया दुने नीगुति हे सिक्का पाः जुल जुइ । दां तकि ला खने हे मदयावन ।
सेफ चायेकाः पुज्यायेत चीकेचायके याःबले ब्वां दां पाः जुयाच्वंगु खन । जि बाहेक मेपिं सुं दुगु हे मखु । न्यन । जिं छ्यों क्वछुनाः मस्यु मस्यु यानाच्वना । ब्वां मारसंक ब्वःबियाः, मे-मिखा कनाः जितः कक्कु ज्वन । सॅ पुयाः झ्वायात । लाकमं कि लाकमं च्वात । भेल्लुक दायाः स्वाहानें क्वफायेत सन । मामं झातापाता सनाः जितः बचय यात ।
जि ह्वाॅय् ह्वाॅय् ख्वया ,” आः खुइ मखुत बाःबाः खुइ मखुत ।”
!!!!!