तेबहालको ‘क्वाःपा:द्यो छेँ’को शिलान्यास, उपभोक्ता समितिले लगभग १ करोड लागतमा पुन:निर्माण गर्दै

काठमाडौं । काठमाडौं महानगर पालिकाका मेयर बिद्यासुन्दर शाक्यले आज राजकीर्ति महाविहार तेबहालको ‘क्वाःपा:द्यो छेँ’ को शिलान्यास गरेका छन्। २०७२ सालको भूकम्पले क्षतिपुर्‍याएपछि पुननिर्माण गर्नुपर्ने अवस्थामा पुगेको यस बहालको महत्त्वपूर्ण सम्पदाको रुपमा रहेको यस द्य:छेंको पुन:निर्माणको जिम्मेवारी ‘संकटा संरक्षण समिति’ ले उठाएको छ । उसले ९९ लाख ३८ हजार ६२२ रुपैयाँ लागतमा यस सम्पदाको निर्माण गर्नेछ ।
काठमाडौंको बहाबहीको आधारमा मध्ये भागमा अवस्थित राजिकीर्ति महाविहार तेबहालमा प्रसिद्ध पा:लाद्यो संकटाको मन्दिर रहेको छ । यसै मन्दिरका पूजारीहरुको विविध चर्यासँग सम्बन्ध भएको द्य:छें हो अहिले पुन:निर्माण हुन लागेको सम्पदा । सामान्यत नेवार बौद्ध धर्म अनुसार हरेक बहाल- बहीमा यसप्रक्रार क्वा:पा:द्यो रहेको हुन्छ । त्यस महाविहारका सदस्यहरुको चुडाकर्मदेखि बिभिन्न धार्मिक सामाजिक गतिविधि यस्तै क्वापाद्योको आधारमा हुने गर्दछ ।
यस महाबिहार नेपालमण्डलका प्रसिद्ध बज्राचार्य बन्धुदत्त आचार्यको महाबिहारको रुपमा पनि परिचित छ । राजा नरेन्द्र देवले गुरु बन्धुदत्तको लागि यो विहार बनाइदिएको हुँदा राजकीर्ति महाविहार भनिएको भन्ने कथन पनि रहेको छ ।

द्योछें सिलान्यासपछि मेयर शाक्यले काठमाडौं मूर्त अमूर्त सम्पदाको केन्द्र रहेको बताउँदै भने ‘हाम्रा सम्पदा बनाउने पैसा हामीसँगै छ । कसैसँग हार गुहार गर्नु पर्दैन । यो संरचनाको पुननिर्माण संकटा संरक्षण समितिले गर्नु झनै सकारात्मक कुरा हो । यसले महानगर, स्थानीय र सम्पदाबीचको त्रिपक्षीय सम्बन्ध दिगो बनाउँछ ।’