ख्याच्वः (निब्व) !!

मथुरा सायमि

जिं न्हापां ब्वंकागु कलेज धयागु भोताहितिया ललित कला क्याम्पस हे खः । अन जिं बि.सं. 2026 सालय् नियुक्ति कयाः अंग्रेजी बिषय प्राध्यापन याना । 2061 सालय् अनं हे अनिवार्य अवकास नं कया ।
थ्व स्वीन्यादॅया दुने त्रिभुवन विश्वविद्यालयं आदेश ब्यूब्यू थे वं धाःधाःगु कलेजय् ब्वंकः वना । थ्व स्वनिगलय् जक मखु , छकः तापाक्क बागलुङ् क्याम्पसय् तक्क नं छ्वत। छगू सेमेष्टर च्वनावया ।
थ्व हे सिलसिलाय् छकः जितः बाग बजारया पद्म कन्या क्याम्पसय् नं सुथसिया सेशनय् ब्वंकः वनेत अस्थायी पुर्जा बिल । म्हाः धायेगु ला खॅ हे मदु । जागिरदार जि । उकीसं मिसातयगु क्याम्पसय् ब्वंकः वनेगु नं छगू रहर हे । सुथय् पद्म कन्याय् अले न्हिनय् थःगु हे क्याम्पसय् ब्वंकाच्वना ।
सुथ सेशन संचालन यानाच्वंनादीम्ह उबले राजाराम कर्माचार्य सर । वयकलं जितः सर्टिफिकेत लेबल व डिप्लोमा लेबलय् नं छगूछगू क्लाश कयाबिल। ब्वंकः वना । अनया बिद्यार्थीतयत युनिफर्म ड्रेस ला न्हापांनिसें हे दुगु । शिक्षक-शिक्षिकातयगु लागि नं युनिफर्म वसः दु । मिजंतयत लं-सुरूवाः व कोत अनिवार्य । ड्रेसय् वनेबले जि नं बफादारम्ह सरकारी कर्मचारीचा थे च्वं ।
पद्म कन्याय् क्लाश कयागु प्यन्हु हे मदुनि ; छम्ह मिसाचा खनेव जि झसङ्ग वन । म्हस्यूम्ह हे खः । सु खः । छु खः । गन खनाम्ह खः।धाये हे मफुत ।
कन्हे कुन्हु नं व मिसाचा जिं खना । व घाॅसय् छपुचः पासापिंलिसे फ्यतुना गफ मुइकाच्वनी । वं मखं । जिं जक वयात खनाच्वना ।
कन्हेकुन्हु वं दः तापालं खन । जिगु मिखा नं वयाके हे जूवन । व जिपाखे भाताभाता हे वल । न्ह्योने थ्यनेवं न्हिलाहल, ” चिन्नु भयन सरले ? मलाइ नि हो कि हैन जस्तो लागेको ।सरत दौरा सुरवालमा । क्या हिरो । क्या मज्जा । ”
झसङ्ग वन । अय् थ्व ला रामप्यारी । रूम्जातारय् च्वंम्ह । ननि
हे वाये म्वाःम्ह । आः ला च्वाकिंचा थे त्वारात्वारा । सारिं सिनातःबले मनू हे मेम्ह थे च्वन । भचा हाकु नयाच्वन । भचा उप्वलं ग्वारा चिनाच्वन । ल्ह्वंपा ।
जिं धया , ” मैले नि अस्तिदेखी देख्याः हो , रामप्यारीलाइ । नाम बिर्स्या छैन । मान्छे चिन्नै गार्हो भो । के के खायर मोटायको हो यस्तो । अय् नेवाःभाय् ल्हायेसःनि छिपिं ला । थ्व खॅय् भाय् छाय् ? ”
“भाय् वः भन्छ । मछाःका ” वं न्याकुं काये थे यात । भाय् वःसा वलका । वइगु हे यः दः । गुलि दत हाॅइ , जि छिम्थाय् देशय् वैगु ? छ ला पास नं जुयाः थन कलेजय् ब्वं वयाच्वन । खोला तर्यो , लौरो बिर्स्यो । खै-खबर छुं दुगु मखु । वा रे फ्यतुनाः खॅ ल्हाये । ”
जि वयात खनाः म्हगसय् म्हं थे जुयाच्वन । व जि खनाः साप लयताया च्वन । निम्हसियां छु छु खॅ ल्हाये थे , छु छु खॅ ल्हाये थे मन तुलुबुलु जुयाच्वन । गेट् लिक्क दना च्वनापिं निम्हं । खॅ ल्हाल्हां कलेजया ल्यूनेसंच्वंगु क्यान्टीनपाखे स्वयावना । निम्हं चुलिंचू फ्यतुना । वं दः मिखा फुति मयासे स्वयाच्वन । जितः नं उमिगु व गां रूम्जातार व उमि मां-अबुपिं नापं सकतां सकतां लुमना वयाच्वन । सारी खनागु जुयाः जिं वयात म्हसीके मफयाच्वंगु जुयाच्वन । ल्ह्वंगु नं अस्यारं ।
चिया हल । त्वत्वं खॅ ल्हाना ।
” अले मांबापिं म्हं फु ला ? थन कि अन हे वयकःपिं ? ”
” मां बाः उखे । जि मात्र थुखे ” व फिसिक्क न्हिल ।
” अहोसा, रामप्यारीया खॅ ला लक्ष्मीद्यःया प्यारामरि स्वयाः सानाच्वन । नमवाःसिंचा थे च्वंम्ह मैचा ला पाकय् जूगु हलवाबेच थे जुयाच्वन ।” जिं नं ख्यालि भासं धया ।
व मुसुमुसु कायाच्वन ।
” पास जूगु नं मस्यू , फेल जूगु नं मस्यू । थन खनाः सकाः सिल । मयजु ला पास हे जुयाच्वन । आः भ्वय् नये मालका । गबले नकेगु ? ” जिं हायके थे याना ।
” भ्वय् जक मखु , सरं धाःधाःगु नके । झासॅ नु जिम्थाय् । ”
” जिम्थाय् धैगु सुम्थाय् ? ” जिं उत्सुकता क्यना ।
” यलय् का, जिम्थाय् छेय् । सरं मयासा जिं यस .यल .सी पास यानाः नैम्ह हे मखु का । सरं थ्व नये धैदिसॅ । व हे नके । पक्का । गुणया बदला छु यानाः पुले थे जुयाच्वंगु दः। कंस शनिवाः । जिम्सं काःवये । थायबाय् धैदिसॅ । मोबाइल नम्बर छगू नं बियादिसॅ । ”
जिं भ्वं छकुती थायबाय् व नम्बर च्वयाच्वना ।
थुबलय् हे पासाम्ह छम्हसिनं वयात दुने वयाः खबर याःवल ,” बाहिर खोजिरा छ , बुढाले। मैसाब भित्र ।”
उघ्रिमय् हे ल्यायम्हचाम्ह छम्ह मिजं जिमिगु न्ह्यःने दंवल । रामप्यारी वाथाक्क दन । वपाखे ल्हाः ब्वयेकाः दः म्हसीकाबिल, ” लौ सुन्नुस्। उहाॅ मेरो बच्चाको बाउ । श्रीमान साब ।”
अले जिपाखे ल्हाः भाय् यानाः नवानाहल, ” ह्यां मेरो सर । मेरो गाउॅमा पाल्नु भा थियो । मैले भन्या थिय नि हजुरलाइ । यकदम भलादमी , यकदम ज्ञानी ।”
व मिजनं जितः नमस्ते यात । जिं नं ल्हाः निपां प्यपुंका । गनं थ्यंकः वनेमाःपिं थे निम्हं हथाय् हथाय् चाल । रामप्यारीं धयाहल,” सर, लिपा नापलाये न्हिं सर । ”
निम्हं पिहाॅ वन । लुखाय् तक्क वनाः उमित स्वःवना । निम्हं मोटर साइकलय् च्वनाः हुत्तय् जुयावन ।
थायबाय् च्वयागु भ्वं जिगु ल्हाःतीसं !!!