… बाखं क्वचाल !!

मथुरा सायमि

स्कूल ब्वनाच्वनागु इलय् । गनया साहित्य सम्मेलन अले सुनां न्यायेकूगु मसिल । महाबतीया दथु-चुकय् थें च्वं । दबू-प्याखं क्यनीबले दयेकीगु दबू थें च्वं व दबू नं ।
नकतिनि नकतिनि बाखं च्वये सःगु ई । सम्मेलनय् ब्वति कयागु नं न्हापां खुसी थें च्वं । पासापिं निम्ह नं दु । भचालं मनू जायेक हे धैथें मुन। माइकया सलं सर्गः हे थ्वः थें जुल । सम्मेलन न्ह्यात । माइकं धमाधम नां कया सःतेव मनूत दबुली थाहाॅ वना थःथःगु रचना पाठ यात । रचना पाठया ज्या सुथां लानांवन । स्कूल ब्वनाच्वनागु इलयया खॅ थ्व । नेपाल सम्बत 1078 पाखेया खॅ ।

सम्मेलन गतिशील जुयांच्वन । दथुइ दथुइ छम्ह निम्हेसित म्ये नं हायेकू । जिगु नं बाखं दु । जितः नं माइकं नां कयाः सःतीतिनि । दबुली थाहाॅ वनाः सकसियां न्ह्योने बाखं ब्वनेमानि । आः सःती ला अले सःती ला जुयाच्वन । प्यखेरं छकः स्वया । उलि उलि मछि मनूया न्ह्योने …। जिं बाखं ब्वने सइ ला मसइ ला , फइ ला मफइ ला । नुगः धुकधुक मिनावल । सम्मेलनं बिस्युं वने ला धया थें जुल। जिं बाखं ब्वनीगु स्वये धकाः निम्ह पासापिं नाप हे च्वंच्वंगु दु । दः धाःसा च्वना च्वना थे मछुल । नां कयाः मसःतूसां जिउ धैथे च्वनावल । ग्यानावःगु उलिथुलि हे मदु ।

धाधामधां ई त्यल । माइकं जिगु नां कयाः स हे सःतल । जिगु पाः वल । जिं मताःछु यानाः क्वछुना बिया । मदना ।जिगु नां हानं कयाहल । पासापिसं जितः थना हे बिल । जि मवंसे मगात । दबुली थाहाॅ वना । बाखं जिगु ल्हाःती ज्वंका बिल । जि मेमेपिं थें माइक लिक्क दं वना । माइकय् छु छु नवाना । जिं हे मचाल ।
बाखं ब्वना । नुगः भाराभारा मिनावःगु धयां मब्याः । ल्हाःतुति फ्यारफ्यार खाना वयाच्वन । बाखं ब्वनां वना । छु ब्वनाच्वना जिं मस्यू । सर्गः कुतुं वयाः ल्हाना च्वं थें च्वं जितः । बल्लतल्ल बाखं ब्वनागु क्वचाल । जिं छु ब्वनाच्वना; जिं हे धाये मसल । ल्हाः थरथर खानाच्वंगु सकसिनं चाः ।
थःगु थासय् च्वं वये धुंकाःतिनि जि होसय् वः थें जुल । बाखं ला ब्वने क्वचाल नि भाइ 🐽 !!