नेपाली पत्रकारिता-अभ्यासमा आएको विकृतिमा के गर्ने त!

                                                दीपक खनाल
नेपाली पत्रकारिता-अभ्यासमा किन विकृति आयो भन्ने विषयमा क्वाँ क्वाँ रोएर, दुरुपयोगका एउटा-दुइटा तस्बिर पोस्ट गरेर मात्रै निष्कर्षमा पुगिदैँन । त्यसैले तँ:तँ हैन सबैले म:म: भनौं र विहङ्गम छलफल गरी समाधानका उपाय निकालौं :
१. पत्रकार र पत्रकारितालाई आफूअनुकूल नबनाउन राजनीतिक दल, विभिन्न शक्ति केन्द्रहरू र मिडिया-मालिक, सञ्चालकहरू इमान्दार छन् ?
२. शासक/प्रशासकहरू स्वच्छ, निष्पक्ष पत्रकारिता हुँदा खुसी हुन्छन् ? युट्युबजस्ता यस क्षेत्रका समयानुकूल समस्याको सम्बोधन गर्न सकेका छन् ?
३. पत्रकार स्वयम् आफ्नो पेसाप्रति इमान्दार छन् ? भोट र पार्टीगत आस्थाका नाममा गैरपत्रकारलाई आँखा चिम्लेर सदस्यता दिलाउनेहरूले छाती छामेर प्रायश्चित गर्न सक्छन् ? बिट पत्रकारिताका नाममा स्रोतहरूसँगै सोर्सफोर्स मिलाउनेहरूले सुनपानी छर्केर पाप हरणम् पाप हरणम् भन्न सक्छन् ?
४. पत्रकार, पत्रकारिता र पत्रकारिता मास्टरीको आवरणमा राजनीतिक दाल गलाउनेहरूले राजनीतिक पार्टी प्रवेशपछि आफ्नो विगतबारे श्वेतपत्र जारी गरेर आम नागरिकसामु इमान्दारिता देखाउन सक्छन् ?
५. पत्रकारिता तथा आमसञ्चारका हामी सबै गुरूहरू, अनुसन्धाताले हाम्रो पढाउने, अनुसन्धान गर्ने ड्यूटी मात्रै पूरा गरेऊँ‌ कि सरोकारवालाहरूलाई घच्घच्यायौँ पनि ?
६. प्रेस काउन्सिल, पत्रकार महासंघ तथा यस्तै अन्य निकाय, संस्थाको कमजोरी, प्रभावहीनता कहाँ-कहाँ रह्यो ?
-दीपवाणी, २०७७/०५/२४
(लेखक प्रेस काउन्सिलका वरिष्ठ प्रशासकीय अधिकृत हुन्)