जाकि मानांं छम्व: ….!!

    ” धात्थें छमना जाकिया छम्वः पाॅयम्वः पुला नयेमाःसा छु यायेगु काः। गय् यायेगु काः । ”                                                      हलू- बूजा धयागु जाकिइ हलू भचा चि भचा तया: छ्वाल्लुक थुया नयेगु जा । अथेहे माय्-बूजा धयागुली जाकि, माय् ,हलू ,चि, घ्यो भचा तया दाबुक्क दायेका तैयार याइगु ज्योना/बेलि।थुकी यःयःपिनि थः ययःगु छताबता मेगु नं ल्वाकछ्यानाः थुइगु याः। न्हापा यक्वसिनं थुयाः नः।सा नं साः। जाकि नं भचा म्हं चाः ।

मथुरा सायमि                                                                   छन्हु । 

सॅ हाःहू धाःगु ई । बैगलय् जिपिं मस्त सकलें । उखेच्वंम्ह सिरिमाया अजि नं दी। मां भुतुली । जिमित धाल, ” स्व मस्त थौ माय्- बूजा थुइगु । मयःमियः हालाच्वने मदु । जा थुइत जाकि नं फुत । सुंक नयेगु खंला। ”
जिमिसं जिउ दय् धयाथें छ्यं संका । हलू-जा मयः धका खिचिखिचि याना च्वनीम्ह किजाभाजु प्रेमकृष्ण छम्ह। माय्-बूजा वयात नं मयः मजू । मामं बिजुलिया हिटरय् जा थुल । फ्वयातःगु माय् नं क्वफात । ला नं भचा दुगु ल्वाकछ्यात । जा नं, क्ये नं, तरकारी नं फुकं व हे । मसला- मिसला नं छताबता छु छु तल । जा मबूनिसां साक्क न्हासय् बास वयाच्वन । याकन बुकाः याकन नयेत सकलें हथाय् चाल ।
मामं सिरिमाया अजियात धाल, ” तःमांया नं थौ थन हे भपियादिसॅ। याकःचिया उखे छु नये छु नये जुयाच्वनी। ”
अजिं लिसः बिल , ज्यूज्यू का , न्हुच्छे कुमारी । दः छख्वल्चा दयव गाः।”
सकलें जा बुत धाःगु न्यनेत आयबू । मबूनि । जिमित स्वस्वं अजि याकःचा पुतुपुतु हालाहल , ” आः छु यायेगु काः। आः झनझन थिके जुयावनी हॅ । गय् याना नयेगु , गय् याना त्वनेगु । कन्हेकंस जा हे नये खनी ला मखनी ला। मानां छम्वः (पचास पैसा) थ्यनीगु हॅ जाकिया भाः। नये फइला न्यानाः। थुल्ला मस्त छिम्सं ? ”
मस्त मध्ये तःधीम्ह जि हे । खॅ थूम्हं जि हे । जिगु नुगः ख्वाउॅसे च्वनावन । ” धात्थें छमना जाकिया छम्वः पाॅयम्वः पुला नयेमाःसा छु यायेगु काः। गय् यायेगु काः । ”
दः सासः ल्हाक्वपतिं कथं सू थे च्वास्सच्वास्स सुयाच्वन — जाकि मानां छम्वः थ्यंसा गय् यायेगु काः !!!