काठमाडौं उपत्यका नगर पालिका फोरमको कोरोना नियन्त्रणका निम्ति बैठक

काठमाडौं / संक्रमण धमाधम बढ्दै गएपछि यसलाई थप फैलन नदिने उपाय खोज्नका निम्ति उपत्यका नगरपालिका फोरमका तीन पदाधिकारीहरुबीच बैठक भएको छ ।
हिजो शनिबार यसरी काठमाडौंको राष्ट्रिय सभागृहमा फोरमका अध्यक्ष काठमाडौं महानगर पालिकाका मेयर विद्यासुन्दर शाक्य, उपाध्यक्ष एवं ललितपुर महानगरपालिकाका मेयर चिरिबाबु महर्जन र सचिव मध्यपुर थिमि नगरपालिकाका मेयर मदनसुन्दर श्रेष्ठका बीच बैठक भएको हो । खासगरि बाहिरबाट मानिसहरु उपत्यका प्रवेश गरेपछि ऊनीहरुका कारण संक्रमण बढ्दै गएको र त्यसप्रति चिन्ता प्रकट गर्दै यसका निम्ति केकस्ता कदम चाल्नुपर्ने हो भन्ने विषयमा सर्वसाधारणको पनि बिचार बुझ्ने निर्णय बैठकले गरेको छ । स्थिति भयावह हुने देखिएपछि उपत्यकामा लकडाउन हुने चर्चा व्यापक भएपनि स्थानीय सरकारले यस्तो निर्णय भने गरेको छैन।
यतिबेला उपत्यकामा दिनदिनै संक्रमितको संख्या तीब्र रुपले बढ्दै गएको छ । बहुसंख्यक उपत्यकाबासी सुरक्षाको निम्ति लकडाउनको पक्षमा देखिएका छन् ।
यसैबीच काठमाडौंको मूख्य बजार सिल गरिने आज आइतबारदेखि शट डाउन गरिने कुरा शुक्रबार बाहिर आएपनि त्यस्तो केही कार्य भने भएको देखिएन । संघीय सरकारमा सत्ता चलाईरहेको दल नेकपाका नेताहरूको विवाद चुलिएको कारण सरकारले यस्तै गर्ने भन्ने कुनै निर्णय दिन नसकिरहेको बेला स्थानीय सरकारका कार्य पनि प्रभावकारी बन्न नसक्दा संक्रमणको जोखिम अझ बढेको देखिन्छ ।